போகலாம் வாங்க – சிங்கப்பூர் –

போகலாம் வாங்க – சிங்கப்பூர் –

சிங்கப்பூர் பிரித்தானிய கிழக்கிந்தியக் கம்பனியால் 1819ல் ஆக்கிரமிக்கப்பட்டது. இரண்டாம் உலகப்போரின் போது ஜப்பானியர்களால் சிறிது காலம் ஆட்சியில் இருந்த சிங்கப்பூர், மறுபடியும் 1945ல் ஆங்கிலேயர் ஆட்சியின் கீழ் வந்து பிறகு 1963ல் மலேசியாவோடு இணைக்கப்பட்டது. ஆகஸ்ட் 9, 1965 அன்று மலேசியாவில் இருந்து பிரிந்து, விடுதலை பெற்று தனி குடியரசு நாடாக உருவானது.

இங்கே உள்ள முக்கிய சின்னம் சிங்க-மீன் இணைந்த சின்னமாகும்.


மலாய் சொற்களான சிங்கா (சிங்கம்) மற்றும் பூரா (ஊர்) சேர்ந்து சிங்கப்பூரா என்று அழைக்கப்படுகிறது. சிங்கப்பூர் நகரமும் ஒரு தீவுதான் என்றாலும்,அறுபத்துமூன்று சிறிய தீவுகளை கொண்ட நாடாக உள்ளது..


சிங்கப்பூரின் சாலைகளின் மொத்த தொலைவு 3,356 கி.மீட்டர், இதில் 161 கிலோ மீட்டர் விரைவுச் சாலைகளாகும்.


சிங்கப்பூரில் நான்கு அலுவலக மொழிகள் – மலேய் மொழி (தேசிய மொழி) சீனமொழி (மேண்டரின்), தமிழ், ஆங்கிலம் முதலிய மொழிகள் இருக்கின்றன. நிர்வாக மொழியாக ஆங்கிலம் இருக்கின்றது.

புத்தசமயம், இசுலாம், கிறித்துவமதம், இந்து சமயம் முதலிய சமயங்களைப் பெரும்பான்மையான மக்கள் சிங்கப்பூரில் பின்பற்றுகின்றார்கள். பெரும்பான்மையான சீனர்கள் புத்த சமயத்தையோ அல்லது தாயிஸ சமயத்தையோ தழுவியிருக்கிறார்கள்.

சிங்கப்பூர் என்றால் சுத்தம் என்று சொல்லிவிடலாம். அங்கே உள்ள அரசு விதிகளும் அதை மக்கள் மீற முடியாத அளவுக்கு இருக்கும் கட்டுப்பாடுகளும் தான் இதற்குக் காரணம். எங்கும் விளம்பரப் பலகைகள், அரசியல் கட் அவுட், சினிமா போஸ்டர்கள் எதையும் காண முடியாது.

சீனாவில் உள்ள கட்டுப்பாடு போல் இங்கும் மக்கள் பேருந்து, வாடகையுந்து, தொடருந்து அனைத்திலும் ஒழுங்கை வரிசையில் காத்து நின்று செல்வதைக் காண முடிகிறது. ஆட்டோக்களை எங்கும் காண முடியவில்லை.

அனேகமாக எல்லாப் பொது இடங்களிலும் கண்காணிப்புக் கேமராக்களும் , கமெரா இருக்கும் எச்சரிக்கையும் காணப்படுகிறது.

இந்தியாவைப் போன்ற வெப்ப நிலையும்,இந்தியர்கள் குறிப்பாக தமிழர்களும் அதிகமாக வாழ்கின்றனர். லிட்டில் இந்தியா என ஒரு பகுதி அங்கிருப்பதையும், அங்கு இந்துக் கோவில் இருப்பதையும் குறிப்பாக சொல்லியாக வேண்டும்.

தீபாவளி நாளில் தமிழர்கள் அதிகம் வாழும் லிட்டில் இந்தியா-Little India-


சிறிய நகரம் என்பதாலும்,சாலை நெரிசலை தவிர்க்கவும்,சுற்றுச் சூழல் மாசுபடுவதை தவிர்க்கவும் மகிழுந்து வைத்துக்கொள்ள பல கட்டுப்பாடுகளை அரசு விதித்துள்ளது. சாரதி அனுமதிப்பத்திரம் தவிர, மகிழுந்து வாங்கி 10 ஆண்டுகளுக்கு மகிழுந்தை சிங்கப்பூரில் ஓட்ட அனுமதிக்கும் தகுதி சான்றிதழ் (COE -Certificate of Entitlement ) ஒன்றையும் பெற்றுக் கொள்ள வேண்டும்.

தனிப்பட்ட முறையில் மகிழுந்து வைத்துக்கொள்ளப் பல கட்டுப்பாடுகள் இருப்பதாலும் பேருந்து தொடருந்து வசதி நன்றாக இருப்பதாலும் பெரும்பாலான சிங்கப்பூர்வாசிகள் பேருந்து, தொடருந்து, வாடகை மகிழுந்து, மிதிவண்டி மூலம் பயணம் மேற்கொள்கின்றனர்.

கண்களைக் கவரும் சுற்றுலாப் பயணிகளின் சொர்க்கமாக இருப்பது செந்தோசா Sentosa Island தீவாகும்.

யாழ்ப்பாணத் தமிழர்கள் போல் மலேசியா சிங்கப்பூர் தமிழர்களும் நல்ல தமிழைப் பேசுவதையும், தமிழ் பற்றுக் கொண்டவர்களாக இருப்பதையும் காண முடிகிறது.

ஆனாலும் பேச்சுத் தமிழைப் பொறுத்த வரை, சிங்கையில் பிறந்தவர்கள் யாழ்ப்பாணத் தமிழையும்,சமீபத்தில் வந்த தமிழ் நாட்டவர்கள் தமிழகத் தமிழையும்,தமிழர்களைப் போல் அதிகம் உள்ள மலையாளிகள் பேசும் தமிழ் வேறாகவும் மூன்று விதமாகப் பேசப்படுகிறது.

தமிழ் தொலைக்காட்சி ஒன்றில் தமிழ் தவிர்ந்த ஆங்கிலச் சொற்களைப் பயன்படுத்தியதன் விளைவாக கொதிதெழுந்து போராட்டம் நடத்தி, அகற்றச் செய்த தமிழ் உணர்வு கொண்ட தமிழர்களை சிங்கையில் காண முடிகிறது.

தமிழுக்கு அரசு உதவி செய்வதும் சிங்கப்பூரின் தகவல் கலை அமைச்சின் (MICA) மேற்பார்வையில் வளர்தமிழ் இயக்கம் ஒன்றை உருவாக்கி நடத்தி வருவதையும் குறிப்பிடலாம்.


தமிழர்கள் மேல் குறிப்பாக ஈழத் தமிழர்கள் மேல் பாசம் கொண்ட சிங்கப்பூரின் முதல் பிரதமரும்,முன்னாள் பிரதமர் -லீ குவான் இயூ-Lee Kuan Yew -வின் மூத்த மகன் லீ சியன் லூங் -Lee Hsien Loong- தற்போதைய பிரதமராக இருக்கிறார்.

சிங்கப்பூரின் ஜனாதிபதி என்று சொல்லும் போது செல்லப்பன் ராமநாதன் (எஸ். ஆர். நாதன்-S.R. Nathan ) இரண்டு முறை பதவிக்காலத்தை நிறைவேற்றி இருக்கிறார். 1991 ஆம் ஆண்டில் நடந்த சாசன மாற்றங்களால், குடியரசுத் தலைவருக்கு சில தனிப்பட்ட உறிமைகள் அளிக்கப்பட்டது. குடியரசுத் தலைவரின் அதிகாரப்பூர்வ வாழுமிடம் இஸ்தானா -Istana -ஆகும் .தற்போதைய அதிபர் டோனி டான் கெங் யாம் – Tony Tan Keng Yam ஆவார்.


சிங்கப்பூர் வளர்ந்ததை இந்த இரண்டு படங்களை ஒப்பிட்டுப் பார்ப்பதன் மூலம் தெரிந்து கொள்ளலாம். செரங்கூன் வீதி முன்னரும் இன்றும்,அங்காடி வீதி-Market Place- அன்றும் இன்றும் காட்சிகள்.








China Town ஐ இரவில் ரிக்சாவில் சுற்றிப் பார்க்க இன்றும் விரும்புகிறார்கள்.


ஆனாலும் உலகெங்கும் பொருட்களை நேசிக்கத் தெரிந்த மனிதனுக்கு, மனிதனை நேசிக்கத் தெரியவில்லையே என்ற ஆதங்கத்தை தெரிவித்துத் தான் ஆக வேண்டும்.

சிங்கபூரை பற்றிய உங்களின் விளக்கமான பதிவு அருமை