உள்ளூர் கேபிள் "டிவி'(local tv) ஏலம் நடத்தாதது ஏன்? :அரசு கேபிள்களுக்கு நெருக்கடி

by **Tamil** Fri Jan 25, 2013 7:35 am

உள்ளூர் கேபிள் "டிவி'கள் ஏலம், இந்த ஆண்டு நடத்தப்படவில்லை. இதனால்,
பெரும் ஊழல் நடந்துள்ளதாக புகார் எழுந்துள்ளது.செயற்கைக்கோள் சேனல்கள்
தவிர, அனைத்து நகரங்களிலும், தனியார் நடத்தும் உள்ளூர் சேனல்கள், கேபிள்
"டிவி'யில் ஒளிபரப்பப்பட்டு வருகிறது. இவற்றை கட்டுப்படுத்தவும்,
ஒழுங்குபடுத்தவும், எவ்வித விதிகளும் இதுவரை வகுக்கப்படவில்லை.
மாவட்ட
கலெக்டர் தலைமையிலான குழு ஒன்று, செயற்கைக்கோள், "டிவி'களுக்கு
வகுக்கப்பட்டுள்ள, அடிப்படை விதிகளை, உள்ளூர் சேனல்களும் பின்பற்றவேண்டும்
என, உத்தரவிட்டு, கண்காணித்தும் வருகிறது.
ஆனால், இம்முறையை
ஏற்றுக்கொள்ளாத, மத்திய தகவல் மற்றும் ஒளிபரப்புத் துறை அமைச்சகம், உள்ளூர்
கேபிள் "டிவி'களை ஒழுங்குபடுத்த, தனி விதிகளை வகுக்குமாறு, தொலைத்தொடர்பு
ஒழுங்குமுறை ஆணையத்தை கேட்டுள்ளது. இதற்கான, பணிகள் தனியாக நடந்து
வருகின்றன.இதற்கிடையே, உள்ளூர் கேபிள் "டிவி' களை நடத்த ஏல முறையை, தமிழக
அரசு கேபிள் நிறுவனம் அறிமுகம் செய்தது. வட்டம் மற்றும் மாவட்டத்
தலைநகரங்களை, ஒரு மையமாகக் கொண்டு, உள்ளூர் கேபிள் "டிவி' களை இயக்க அனுமதி
அளிக்கிறது.
தமிழகத்தில், 220 வட்ட தலைநகரங்கள், 32 மாவட்ட தலைநகரங்கள்
உள்ளன. ஒரு தலைகநகருக்கு அதிகபட்சம், 10 உள்ளூர் கேபிள் "டிவி' என
நிர்ணயித்து, ஏல முறையில் அனுமதியை, அரசு கேபிள் நிறுவனம் அளிக்கிறது.
உள்ளூர்
கேபிள் "டிவி' ஏலம், 2011 டிசம்பர் மாதம் நடத்தப்பட்டு, 2012 ஜனவரி மாதம்
அனுமதி வழங்கப்பட்டது. ஓராண்டுக்கு அளிக்கப்படும் இந்த அனுமதி, 2012
டிசம்பர் மாதத்தோடு முடிகிறது. 2013 ஜனவரி மாதம் முதல் கேபிள் "டிவி'யை
தொடர்ந்து நடத்த, ஏலம் நடத்தியிருக்க வேண்டும். இல்லையேல், அனுமதி
அளிக்கப்பட்ட கேபிள் "டிவி'களுக்கு, அனுமதியை புதுப்பித்திருக்க
வேண்டும்.ஆனால், உரிமம் முடிந்து ஒரு மாதமாகியும், ஏலமும் நடத்தப்படவில்லை;
உரிமமும் புதுப்பிக்கப்படவில்லை. கேபிள் "டிவி'களை தொடர்ந்து நடத்த,
பெரும் தொகை கைமாறியதால், ஏலம் நடத்தப்படவில்லை என, குற்றச்சாட்டு
எழுந்துள்ளது.தாலூகா தலைநகர் மற்றும் மாவட்டத் தலைநகரங்களின் தொழில் நிலையை
அடிப்படையாகக் கொண்டு, ஏலத்தொகை நிர்ணயிக்கப்படுகிறது. குறைந்தபட்சம், 40
ஆயிரம் ரூபாய் முதல், 1.50 லட்சம் ரூபாய் வரை, உள்ளூர் கேபிள் "டிவி'கள்
கடந்த ஆண்டு ஏலம் போயின. நடப்பாண்டில், ஏலம் நடந்திருந்தால், இத்தொகையை விட
கூடுதல் தொகைக்கு ஏலம் சென்றிருக்கும். இதனால், அரசு கேபிள் "டிவி'க்கு
கூடுதல் வருவாய் கிடைத்திருக்கும் என, தனியார் கேபிள் ஆபரேட்டர்கள்
தரப்பில் கூறப்படுகிறது.ஏலம் நடத்தப்படாததால், போட்டியைத் தவிர்த்து,
கூடுதல் தொகை செலுத்தாமல், ஏற்கனவே இருப்பவர்கள், தொடர்ந்து கேபிள்
"டிவி'யை நடத்த அனுமதிக்கப்பட்டுள்ளனர் என்றும்,
தெரிவிக்கின்றனர்.இதுகுறித்து, அரசு கேபிள் நிறுவன நிர்வாக இயக்குனர்
விவேகானந்தன் கூறியதாவது:உள்ளூர் கேபிள் "டிவி'களுக்கான ஏலத்தை
நடப்பாண்டில் நடத்தலாமா, ஏற்கனவே இருப்பவர்களை தொடர்ந்து நடத்த
அனுமதிக்கலாமா என்பது பற்றி இன்னும் முடிவெடுக்கவில்லை. இதுகுறித்து,
விரைவில் முடிவெடுக்கப்பட்டு, உள்ளூர் கேபிள் "டிவி'கள் தொடர்ந்து நடத்த
அனுமதிக்கப்படும். ஏலம் நடத்தாதற்கு, வேறு காரணங்களைக் கூறுவது
தவறானது.இவ்வாறு, விவேகானந்தன் கூறினார்