டிஜிட்டல் தொழில்நுட்பத்தில் அரசு கேபிள் "டிவி': ஏற்பாடுகள் தீவிரம்

சென்னை: சென்னையில் டிஜிட்டல் தொழில்நுட்பத்தில், அரசு
கேபிள், "டிவி' ஒளிபரப்பு துவங்குவதற்கான பணிகள் விரைவாக நடந்து வருகின்றன.
வரும் செப்டம்பர் 15ம் தேதி, இலக்கு நிர்ணயிக்கப்பட்டுள்ளதாகக்
கூறப்படுகிறது.

முதல்வராக ஜெயலலிதா பொறுப்பேற்றதும், கேபிள், "டிவி'
அரசுடைமையாக்கப்படும் என்று அறிவித்தார். இதனால், கடந்த தி.மு.க.,
ஆட்சியில் சற்றே முடங்கிப் போயிருந்த தமிழ்நாடு அரசு கேபிள், "டிவி'
மீண்டும் புத்துயிர் பெற்றது. ஏற்கனவே, தமிழகத்தில் சென்னை தவிர மற்ற
மாவட்டங்களில் அரசு கேபிள் ஒளிபரப்பு தொடர்ந்து வந்த நிலையில், சென்னையில்
கொண்டு வருவதற்கான முயற்சிகள் மேற்கொள்ளப்பட்டன.

டிஜிட்டல்: இதற்கிடையில், சென்னை உள்ளிட்ட பெருநகரங்களில்
டிஜிட்டல் தொழில்நுட்பத்துடன், வரும் ஜூலை 1ம் தேதி முதல், ஒளிபரப்பு
செய்யப்பட வேண்டும் என்று, "டிராய்' உத்தரவிட்டது. இந்த உத்தரவை
நிறைவேற்றுவதில், பல்வேறு சிக்கல்கள் இருப்பதாலும், கண்ணாடி இழை கேபிள்கள்,
செட்-ஆப் பாக்ஸ்கள், கேபிள், "டிவி' இணைப்பு பெற்ற அனைவருக்கும் வழங்கப்பட
வேண்டும் என்பதாலும், இதற்கு ஆறு மாதம் அவகாசம் வேண்டும் என்று தமிழக அரசு
கேபிள், "டிவி' சார்பில் ஏற்கனவே கோரிக்கை விடுக்கப்பட்டுள்ளது.
இருந்தாலும், சென்னையில் அரசு கேபிள், "டிவி' ஒளிபரப்பை வரும் செப்டம்பர்
மாதம் 15ம் தேதி, அண்ணா பிறந்த நாளன்று துவங்கி விட வேண்டும் என்ற
இலக்குடன், சம்பந்தப்பட்ட துறையினர் முனைப்புடன் பணியாற்றி வருகின்றனர்.

டெண்டர்: டிஜிட்டல் தொழில்நுட்பத்துடன் கேபிள் ஒளிபரப்பை
வழங்குவதற்கான, செட்-ஆப் பாக்ஸ் தொடர்பான டெண்டர், அடுத்த வாரத்தில்
முடிகிறது. இதைத் தொடர்ந்து, 40 நாட்களில் ஒப்பந்தம் முடிவு
செய்யப்பட்டுவிடும். இதில், சென்னைக்கு தேவையான செட்-ஆப் பாக்ஸ்கள்
முழுவதுமாக வாங்கப்படும் எனத் தெரிகிறது. இதற்கிடையில், சென்னைக்கு தேவையான
செட்-ஆப் பாக்ஸ்கள் குறித்து உள்ளூர் கேபிள் ஆபரேட்டர்கள், பதிவு
செய்வதற்கான காலக்கெடுவும் நீட்டிக்கப்பட்டுள்ளதால், தொடர்ந்து கேபிள்
ஆபரேட்டர்கள் பதிந்து வருகின்றனர். அதே நேரத்தில், அரசு கேபிள் நிறுவனமும்,
முதல்கட்டமாக பதிந்தவர்களைக் கொண்டு, அவர்களுக்கு தேவையான செட்-ஆப்
பாக்ஸ்களை வழங்கி, விரைவில் துவக்கிவிட முடிவெடுத்து செயல்பட்டு வருவதாகக்
கூறப்படுகிறது.