திருவிளையாடலில் தர்க்கித்த, பெண்களுடைய கூந்தலின் மணம் இயற்கையா இல்லை செயற்கையா? உண்மை என்ன?

திருவிளையாடலில் தர்க்கித்த, பெண்களுடைய கூந்தலின் மணம் இயற்கையா இல்லை செயற்கையா? உண்மை என்ன?

முதலில் அந்தப் பாடலையும்,பின்னர் அறிவியல் தரும் விளக்கத்தையும் காண்போம்.

இந்தக் கேள்வியை வைத்ததும்,உங்களிடம் உடனே வருவது திருவிளையாடல் படம் தான். திருவிளையாடல் ஒரு சினிமா என்பதால் சில பல சேர்க்கைகளை சேர்த்து படத்தை உருவாக்கி உள்ளார்கள்.அவை சேர்க்கை மட்டுமல்ல செயற்கையும் தான். இந்தப் படத்தில் சிவபெருமானை கொண்டு வந்து தருமியுடனும்,நக்கீரனுடனும் சேர்த்து கதையை கொண்டு சென்றுள்ளார்கள். ஆனால் அது உண்மையல்ல. அங்கே வரும் பாடல் இதுதான்.

கொங்குதேர் வாழ்க்கை அஞ்சிறைத் தும்பி
காமம் செப்பாது கண்டது மொழிமோ
பயிலியது கெழீஇய நட்பின் மயிலியல்
செறியெயிற் றரிவை கூந்தலின்
நறியவும் உளவோ நீயறியும் பூவே.
-இறையனார்.

இந்தப் பாடல் எட்டுத் தொகையில் ஒன்றான குறுந்தொகையில் உள்ள குறிஞ்சி நிலப்பாடலில் இரண்டாவது பாடல்.இதை எழுதியவர் இறையனார் என்ற புலவர். இறையனார் என்பதை சிவனாக்கி கதையை கொண்டு சென்றுள்ளனர்.
இந்தப் பாடலின் பொருள்,

பூக்களில் உள்ள மணத்தை,தேர்ந்து ஆராய்ந்து தேனை உண்ணுகின்ற வாழ்கையினையும், அகத்தே சிறகுகளையும் கொண்ட வண்டே,நீ என்னுடைய நிலத்திலுள்ள வண்டு என்பதால் என்னுடைய விருப்பத்தை உரைக்காமல், எனக்கு இன்பம் தருவதற்காகப் பொய் கூறாமல், நீ கண்கூடாக அறிந்த உண்மையைக் கூறுவாயாக!
பழகுதற்கு இனிய, மயிலைப் போன்ற சாயலையும், செறிந்த பற்களையும் உடைய இவ்வரிவையின்,தலைவியின் கூந்தலைப் போன்ற மணம் நீ அறிந்த மலர்களுக்கு உண்டா..?
என்பதாகும்.

அவன், தலைவன்,தலைவியின் மேலுள்ள இயற்கையான காதலினால்,அவளை சந்தித்த போது,அன்போடும்,காதல் உணர்வோடும் அவளைப் பார்க்கிறான்.தலைவி வெட்கம் மேலிட நாணத்தால் தலை குனிந்து நிலத்தைப் பார்க்கிறாள்.தலைவியின் நாணத்தைக் கண்ட அவன்,அதைப் போக்கும் நோக்குடன் அவள் தலையை வருடி, நெஞ்சில் பதிக்கிறான்.அந்த நிலையில் தலைவியின் கூந்தலில் இருந்து இனிய மணம் வருகிறது.(அவன் அது மலரின் மணமா இல்லை தலைவியின் கூந்தலில் இருந்து வருகிறதா என்ற சந்தேகம்.இது சினிமாவில்)

பேசா மடந்தையாகி விட்ட அவளின் நாணத்தை நீக்க, தலைவி சூடியுள்ள பூவில் மொய்க்கும் தும்பி என்னும் வண்டைப் பார்த்து பேசுகிறான்.தேன் தேடும் வாழ்க்கை கொண்ட அழகிய சிறகுகளை உடைய தும்பியே! தேன் உன்னும் காம ஆசையால் சொல்லாமல், உண்மையாக நீ கண்டதைச் சொல். நீ அறிந்த பூக்களில் என் தலைவியின் கூந்தலைக் காட்டிலும் நல்ல மணமுள்ள பூவை அறிந்ததுண்டா?
என்று வினவிக்கொண்டே அவளது உச்சியை முகர்கிறான்.

இது சினிமாவில் மாற்றப்பட்டு இருந்தாலும் கூட,பெண்களின் கூந்தலுக்கு இயற்கையாகவே மணம் உண்டா?

இப்போது அறிவியல் ரீதியில் பெண்களுடைய கூந்தலில் மணம் உண்டா? என்ற கேள்வியை வைத்தால், ஆம் என்றே பதில் சொல்ல வேண்டும்.

வண்டு எறும்பு,பூச்சி , போன்ற உயிரினங்களுக்கு உடலில் சில சமயங்களில்,ஆண் பெண் இனத் தொடர்பின் போதும்,மற்றைய உயிரினங்களில் இருந்து காப்பாற்றிக் கொள்ளவும் ஒரு வகை சுரப்பிகள் சுரக்கப்பட்டு ஒரு வகை மணம்,அனேகமாக பெண் இனத்திற்கு, வருவதை நீங்கள் பார்த்திருக்கலாம்.இதற்குக் காரணம் Pheromones எனப்படும் ஒரு இரசாயணப் பொருளாகும். எறும்பு உணவைக் கண்டதும் போகும் வழியில் இந்த பெரமோனை சுரப்பதால் மற்றைய எறும்புகள் அதை உணர்ந்து இடத்தைக் கண்டு பிடிக்கிறது.இதே போல் தேனீக்களிலும் இராணித் தேனீக்களில் முக்கியமாக தாடைப் பகுதியில் இருந்து சுரக்கும் இந்த பெரமோனால்,மற்றத் தேனீக்கள் கிட்டே வர முடியாமலும்,இன்னொரு இராணித் தேனீ வராதிருக்கவும் பயன்படுத்துகிறது.இந்த பெரமோன் என்பது அந்த உயிரினத்தின் உள் உணர்வினால் ஏற்படுகிறது.அதாவது,மற்ற உயிரினங்களின் பெண் இனத்திற்கு,அரசித் தேனீ போல் சுரக்கும் பெரமோன், ஆண் இனத்தை நெருங்கவோ அல்லது நெருங்க விடாமல் தடுக்கவோ அல்லது எச்சரிக்கை செய்யவோ சுரக்கிறது. அதனால் தான் மனிதனைத் தவிர, மற்றைய உயிரினங்கள் பாலியல் பலாத்காரம்,கற்பழித்தலை செய்வதில்லை.

இந்த வித பெரமோன் வேதிப் பொருள் சில தாவரங்களிலும், வண்டினங்களை கவர சுரக்கப்படுவது கண்டறியப்பட்டுள்ளது. வண்டினங்களைக் கவருவதால்,பூக்களின் மகரந்தச் சேர்க்கை சுலபமாகி விடுகிறது.என்னே படைப்பின் அதிசயம்.

மனிதனைப் பொறுத்த வரையிலும் இந்த பெரமோன் மூன்று விதமாக வெவ்வேறு வகைகளில்,(axillary steroids, vaginal aliphatic acids, and stimulators of the vomeronasal organ,) சுரக்கிறது.பெண்களுக்கு தலையில் சுரக்கும் இந்த பெரமோன் கூந்தலில் மணத்தைக் கொடுத்து ஆண்களைக் கவர வைக்கிறது.(நன்றாக சுத்தமாக வைத்திருந்தால்......,இல்லையேல் தலையில் தேய்க்கும் எண்ணைகளின் மணமும் சேர்ந்து..........?)அதற்காக உடனே தலையைக் குனி என்று கேட்காதீர்கள்.ஏனென்றால்,உள் உணர்வின் வெளிப்பாடு காரணமாகவே அந்த வாசனை வரும். இவை ஒரு விதத்தில் ஆண் பெண்ணையும், பெண் ஆணையும் பாலியல் ரீதியில் கவரவோ, எச்சரிக்கை செய்யவோ சுரக்கப்பட்டாலும்,மனிதன் அவற்றைக் கண்டு கொள்ளவில்லை.(மனிதன் யார் பேச்சைத்தான் கேட்டான்.)
தலைவி தலைவனின் நெஞ்சில் சாய்கிறாள்,தலைவி நாணம் கொள்கிறாள்,காதல் உணர்வு மேலிடுகிறது,அது காம உணர்வைத் தூண்டுகிறது,பெரமோன் சுரப்பிகள் சுரக்கின்றன,கூந்தலில் மணம் கமழுகிறது.இது அறிவியலின் முடிவு.

ஆனாலும் ஆய்வாளர்கள் இதைக் கண்டு கொண்டு, இதே வகையான செயற்கை பெரொமோன்களை கண்டறிந்து செயற்கை வாசனைத் திரவியங்களை(body spray)ஆண்களுக்கு தனியாகவும், பெண்களுக்கு தனியாகவும் தயாரிக்கிறார்கள்.இவற்றால் கவரப்படுகிறார்களோ இல்லையோ, நிச்சயமாக தொலைக்காட்சி விளம்பரங்களில் கவரப்படுகிறார்கள்.

நமது ஆதித் தமிழனின் அறிவியல் எப்படி வேலை செய்துள்ளது என்பதை இந்தப் பாடலால் கண்டு கொள்ள முடிகிறது.ஆக முடிவாக,நிச்சயமாக,உறுதியாக பெண்களின் கூந்தலுக்கு இயற்கையிலே மணம் உண்டு. பெண் மீது ஆணுக்கும், ஆண் மீது பெண்ணுக்கும் கவர்ச்சி ஏற்பட இந்த இரசாயணப் பொருள்(வேதியியல் கூறுகள்) பின்னின்று பணியாற்றுகின்றன. மேற்கண்ட கருத்துக்களின் வழியாகப் பெண்களின் கூந்தலுக்கு இயற்கையிலேயெ மணம் உண்டு என்பது அறிவியல் ரீதியாக உறுதியாகிறது. நக்கீரன் தவறாக தருமிக்கு தீர்ப்புக் கூறியதால்,இறையனார்(திருவிளையாடலில், சிவபெருமான் நெற்றிக் கண்ணைக் காட்டி) அறிவியலை படிச்சுக்கோ என்று கூறியதையும் எண்ணிப் பார்க்கலாம்.

ஆனாலும் நக்கீரனின் கூற்றுப்படி,ஒரு பாடலை,எழுதும் போதும் சரி, பாடும் போதும் சரி, மூன்று முக்கிய விதிகளைக் கருத்தில் கொள்ள வேண்டும்.சொற்குற்றம்,பொருட்குற்றம்,இலக்கணக் குற்றம் என்ற வரிசைப்படி ஆய்ந்து தீர்ப்புக் கூறல் வேண்டும்.(தொலைக்காட்சியில் தமிழ் தெரியாது வரும் நடுவர்களுக்கு கொஞ்சம் சொல்லி வையுங்க) இலக்கணம் சரியாகி பொருள் தவறானால் பாடலையும்,பாடுவதையும் ஏற்றுக் கொள்ள முடியாது. எனவே நக்கீரனின் உயர்ந்த புலமைக்கு தலை தாழ்த்தி.......................

தொடர்ந்து தலைவன் கூற்றால் மகிழ்ந்த தலைவியின் நாணம் நீங்கி உறவு மலர்கிறது.

இடையே யாராவது வந்து பழித்தோ கிண்டல் செய்வதொ வழக்கம் தானே. தலைவியை தோழி கிண்டல் செய்கிறாள்.அதற்கு தலைவி சாட்டை அடி கொடுத்து பதில் சொல்கிறாள் இப்படி.......................

நிலத்தினும் பெரிதே வானினும் உயர்ந்தன்று
நீரினும் ஆரள வின்றே சாரல்
கருங்கோற் குறிஞ்சிப் பூக்கொண்டு
பெருந்தேன் இழைக்கும் நாடனொடு நட்பே ….................குறுந்தொகையில் தேவகுலத்தார் என்ற புலவர் எழுதியது.
இதன் பொருள்......................
மலைச்சாரலில் வளரக் கூடிய, கரிய கிளைகளையுடைய குறிஞ்சி மரத்தின் பூவிலிருந்து பெருமளவு தேன் உருவாகும் நாட்டைச் சேர்ந்தவனாகிய தலைவனிடம் நான் கொண்ட நட்பானது, இந்தப் புவியைக் காட்டிலும் பெரியது, வானை விடவும் உயர்ந்தது, கடலின் ஆழத்தை விடவும் அளத்தற்கரிய ஆழம் உடையது.
ஆகா இப்படியல்லவோ காதலின் ஆழம் இருக்க வேண்டும்.

சக்தி.