ஈழம் இல்லாத ஒன்றா? தமிழர்களுக்கு விழுந்த சாட்டை அடி.

by **sakthy** Sat Aug 11, 2012 8:23 pm

ஈழம் இல்லாத ஒன்றா? தமிழர்களுக்கு விழுந்த சாட்டை அடி.

மத்திய அரசின் நேற்றைய அறிவிப்பும்,அதற்கு தப்பு தாளம் போட்ட, தங்களை தமிழர்களாக காட்டிக் கொள்ளும் தமிழக காங்கிரசும்,(புதிய தலைமுறை நேற்றைய நிகழ்ச்சி) அனைத்து தமிழர்களையும் அவமதித்து விட்டது.தமிழ் நூல்கள்,சங்ககால அழியா இலக்கிய செல்வங்கள், கல்வெட்டுக்கள்,தொல்பொருள் ஆராய்ச்சி முடிவுகள் அனைத்தையும் புறம்தள்ளி, இலங்கையை திருப்திப்படுத்த,சோனியா காங்கிரஸ்,ஈழம் இல்லாத ஒன்று என்று தெரிவித்ததன் மூலம், எடுத்த முடிவு ஈழத் தமிழர்களை மட்டுமல்ல தமிழ் இனத்தையே அவமானப்படுத்தி விட்டது. தமிழ் இலக்கியங்கள்,கல்வெட்டுக்கள்,தொல்பொருள் ஆய்வுகள் அனைத்தையும் பொய் என மறைமுகமாக அறிவித்து விட்ட இந்த அறிவிப்பினால் இதுவரை எந்த தமிழனும் துடித்து எழவில்லை.
இலக்கியம் பேசியவர்கள் வாய் மூடியது ஏன்?இரண்டாயிரம் ஆண்டுகளுக்கு முன்னர் ஆரியர்களால் அடிக்கப்பட்டு குனிந்தவன்,மீண்டும் அடிக்கப்பட்டு இருக்கிறான். இது முதல் விழுந்த அடி.இனி விழப் போகும் சாட்டை அடிகளால் தமிழன் குனியப் போகிறானா இல்லை எழுந்து நின்று போராடப் போகிறானா?

நான் படித்த,பார்த்த,நினைவில் உள்ள சில தகவல்களை உங்கள் பார்வைக்கு தருகிறேன்.கற்றது கையளவு.நான் படிக்காத எத்தனை சாட்சியங்கள் இன்னமும் எடுத்துக் கூற இருக்கும் என்பதில் சந்தேகம் எனக்கில்லை.

--முன்றனக் குடைந்த தென் மண்டல
முழுவ துமிழந் தென் கடல் ஈழம்
புக்க விலங்கேச நாகிய விக்கிரம
பாண்டியன் பரு மணி மகுடமும்... என்கிறது தென் இந்திய சாகச தொகுதி, கி.பி 1017

--அகநானூற்றிலும்,நற்றிணையிலும்,குறுந்தொகையிலும் பாடல்களைப் பாடிய சங்ககால புலவர், மதுரை ஈழத்து பூதந்தேவனாரை (கி.மு.180-125) மறக்க சொல்கிறார்களா?
--எண்திசை புகழ் தர ஈழ மண்டலமும்...என புகழாரம் பெற்ற 1ம் இராஜராஜன் மெய்கீர்த்திகனை மறக்க சொல்கிறார்களா?
--முதலாம் இராசேந்திரனின் சாசனத்தில், பெருங்கடல் ஈழத்தரசர் தம் முடியும்...,எனவும்,பட்டினப்பாலையில், ஈழத்துணவும் காழகத் தாக்கமும்...
என்ற வரிகளையும் தமிழ் இலக்கியத்தில் இருந்து அழித்து விட சொல்கிறார்களா?
--மதுரையும் ஈழமும் கொண்டவன்... என 1ம் இராசாதிராசனை புகழ்ந்ததை மறந்து விட வேண்டும் என்கிறார்களா?
--இராமனாதபுரத்தில் கண்டெடுக்கப்பட்ட கல்வெட்டுக்களில்,எரு கோடூர் ஈழக்குடிம்பிகன்(ஈழக் குடிமகன்) போலாலையாம் செய்த ஆச்சன் நெடுசாதன்... என்று குறிப்பிட்டிருக்கும் கல்வெட்டுக்களை அழித்து விட வேண்டுமா?
--கலிங்கத்துபரணியில், ஈழமும் தமிழ்க்கடலும் சிதைந்து ….என்று தொடங்கும் பாடல் வரிகளை கலிங்கத்துப்பரணியில் இருந்து எடுத்து விட வேண்டுமா?
--ஏன்,சிங்களவர்களின் சமய நூலான மகாவம்சமே,
கி.மு. 95 – 101 வரை ஈழ நாகன் ஆட்சி செய்ததாக சொல்கிறதே.அதையும் அழித்து விடுவீர்களா?

--ஈழ பரதகி தமிட சமண நே கரிதே தமிட கபதிக ந பசதே(ஈழ பரதத்தில் வாழும் சமணரும் தமிழ்க் குடும்பத் தலைவனும்),என ஈழத்து கல்வெட்டு ஒன்று சொல்கிறதே,அந்தக் கல்வெட்டையும் அடித்து நொருக்கி விடுவீர்களா?

சரித்திரத்தில் பொன் எழுத்துக்களால் பொறிக்கப்படும் என்கிறார்களே,அது பொய்யாகி விடுமா? எத்தனை சரித்திரங்கள் சிதைக்கப்பட்டன,திரிவு படுத்தப்பட்டன, மறைக்கப்பட்டன, மறக்கப்பட்டன.தாஜ்மகால் காதல் சின்னமாக்கப்பட்டது போல்,நம் இலக்கியங்கள், பழம்பெரும் தொல்பொருட்கள் எல்லாம் சிறிது சிறிதாக அழிக்கப்பட்டு விடுமா என்ற அச்சம் வரவே செய்கிறது.ஈராக்கில் அமெரிக்க படையெடுப்பு திசை மாறியது போல்,ஈழத்து படுகொலைகளும் மாற்றப்பட்டு விடுமா? அதிகாரமும்,பலமும் பல சரித்திரங்களை மாற்றியதை நாம் மறந்து விட முடியாது.தமிழன் சிந்திப்பானா?