ஆந்திர அரசை கவிழ்க்க திட்டம் இல்லை : ஜெகன் பேட்டி

புதுடில்லி : ஆந்திராவில் காங்கிரஸ் அரசை நிலைகுலையச் செய்யும் திட்டமில்லை என, ஜெகன் மோகன் ரெட்டி தெரிவித்துள்ளார்.
ஆந்திர முன்னாள் முதல்வர் மறைந்த ராஜசேகர ரெட்டியின் மகன் ஜெகன் மோகன்
ரெட்டி, கட்சி மேலிடத்துடன் ஏற்பட்ட கருத்து வேறுபாட்டால் கட்சியிலிருந்து
விலகியுள்ளார். விரைவில் புதிய கட்சியைத் துவக்க
திட்டமிட்டுள்ளார்.காங்கிரஸ் கட்சியின் சார்பில் கடப்பா தொகுதி
எம்.பி.,யானதால், அந்த பதவியை ராஜினாமா செய்துள்ளார். ராஜசேகர ரெட்டியின்
மனைவி விஜயலட்சுமி, தன் கணவர் போட்டியிட்ட புலிவெந்துலா சட்டசபை
தொகுதியில் போட்டியிட்டு எம்.எல்.ஏ., ஆனார். மகன் காங்கிரஸ்
கட்சியிலிருந்து விலகியதால் இவரும் எம்.எல்.ஏ., பதவியை ராஜினாமா
செய்தார்.இந்த தொகுதிகளுக்கு நடைபெறும் இடைத்தேர்தலில் இருவரும் போட்டியிட
உள்ளனர்.
இது குறித்து ஜெகன் மோகன் ரெட்டி கூறியதாவது:இடைத்தேர்தலுக்கு
முன்னதாக கட்சியை துவக்கும் வேலை விரைவாக நடக்கிறது. தற்போதைக்கு மாநில
அரசியலில் கவனம் செலுத்தும் திட்டமில்லை. கடப்பா எம்.பி., தொகுதி
இடைத்தேர்தலில் தான் போட்டியிடப் போகிறேன். புலிவெந்துலா தொகுதியில்
போட்டியிட்டு எம்.எல்.ஏ.,வாகி சட்டசபைக்கு சென்றால், காங்கிரஸ் கட்சி
எம்.எல்.ஏ.,க்களை நான், என் பக்கம் இழுப்பதாகக் கூறுவர். காங்கிரஸ் அரசை
நிலைகுலையச் செய்யும் திட்டமில்லை. வரும் 2014ம் ஆண்டு நடைபெற உள்ள
தேர்தலில் தான், மாநில அரசில் முழு கவனம் செலுத்த திட்டமிட்டுள்ளேன். தனி
மனிதனாக நான் ஒன்றும் செய்ய முடியாது. 2014ம் ஆண்டு வரை பொறுத்திருக்க
வேண்டும். இரண்டு லட்சம் ஓட்டுகள் பெற்று எம்.எல்.ஏ., ஆவதை விட, 10 லட்சம்
ஓட்டுகள் பெற்று தற்போதைக்கு எம்.பி.,யாக தேர்வு செய்யப்படுவதை
விரும்புகிறேன்.
எனது கட்சியை தேர்தல் கமிஷனில் பதிவு செய்யும் வேலைகள் நடக்கின்றன.
இப்போதே கட்சி பெயரை வெளியிட விரும்பவில்லை. இப்போது சொன்னால், இதே
பெயரில் யாராவது பதிவு செய்து விடுவர். இதனால், தேவையில்லாத குழப்பம் தான்
ஏற்படும். எனது தந்தையின் இறப்பின் போது உயிர் நீத்தவர்களுக்கு இரங்கல்
தெரிவிப்பதற்கு நான் மேற்கொண்ட யாத்திரையை, காங்கிரஸ் மேலிடம்
அனுமதிக்கவில்லை. எனது உணர்வை புரிந்து கொள்ளாததால் அந்த கட்சியிலிருந்து
விலகினேன்.ஆந்திராவில் காங்கிரஸ் அரசை கவிழ்க்க வேண்டும் என்ற எண்ணம்
எனக்கில்லை. அப்படியொரு எண்ணம் இருந்தால், கடந்த ஆண்டே அதை
செய்திருப்பேன். எனக்கு 150 எம்.எல்.ஏ.,க்களின் ஆதரவு இருந்தது. அவர்கள்
என்னை முதல்வராக்க விரும்பினர்.இவ்வாறு ஜெகன் மோகன் கூறினார்.