ஜெகன் மோகன் வெற்றியால் ஆந்திர காங்கிரஸ் கலக்கம்

ஆந்திராவில் சமீபத்தில் நடந்த இடைத்தேர்தலில், ஜெகன்
மோகன் ரெட்டியின் ஒய்.எஸ்.ஆர்.காங்கிரஸ் கட்சி அமோக வெற்றி பெற்றது,
காங்கிரஸ் தலைவர்களை கலக்கமடையச் செய்துள்ளது. மாநிலத்தில் தங்கள்
கட்சியின் எதிர்காலம் கேள்விக்குறியாகி விடுமோ எனவும் அஞ்சத்
துவங்கியுள்ளனர். அத்துடன் மேலும் பல, காங்கிரஸ் எம்.எல்.ஏ.,க்கள் ஒய்.எஸ்.
ஆர்.காங்கிரசுக்குத் தாவ திட்டமிட்டுள்ளதாகக் கூறப்படுகிறது.

கடந்த 2009ல் நடந்த லோக்சபா தேர்தலில், ஆந்திராவில் இருந்து
காங்கிரஸ் கட்சி சார்பில் 33 எம்.பி.,க்கள் தேர்ந்தெடுக்கப்பட்டனர்.
தற்போது மாநிலத்திலும் ஆட்சியில் உள்ள அந்தக் கட்சி, சமீபத்தில் 18 சட்டசபை
தொகுதிகளுக்கும், நெல்லூர் லோக்சபா தொகுதிக்கும் நடந்த இடைத் தேர்தலில்,
இரண்டு இடங்களில் மட்டுமே வெற்றி பெற்றது. 15 தொகுதிகளை, ஜெகன் மோகனின்
ஒய்.எஸ்.ஆர்.காங்கிரஸ் கட்சி கைப்பற்றியது.வருமானத்திற்கு அதிகமாக சொத்து
சேர்த்ததாக தொடரப்பட்ட வழக்கில், ஜெகன் மோகன் கைது செய்யப்பட்டு, சிறையில்
உள்ள நிலையில், அவரது கட்சி இந்த அளவுக்கு வெற்றி பெற்றிருப்பது, மாநில
அரசியலில் மாற்றம் நிகழுமோ, எதிர்காலத்தில் காங்கிரஸ் கட்சிக்கு வீழ்ச்சி
ஏற்படுமோ என்ற கலக்கத்தையும், அச்சத்தையும் அந்தக் கட்சித் தலைவர்கள்
மத்தியில் உருவாக்கியுள்ளது.

எச்சரிக்கை அறிவிப்பு :பல ஆண்டு காலமாக ஆந்திர மாநில அரசியலில்
ஆதிக்கம் செலுத்தி வந்த காங்கிரஸ் மற்றும் தெலுங்கு தேசம் கட்சிகளை மீறி,
துவங்கிய 15 மாத காலத்தில் ஜெகன் மோகன் கட்சி இந்த வெற்றியை பெற்றிருப்பது,
அரசியல் நோக்கர்கள் பலரையும் வியப்படைய வைத்துள்ளது. மேலும், நடந்து
முடிந்த இடைத்தேர்தல், 2014ல் நடைபெறவுள்ள சட்டசபை தேர்தலுக்கான அரையிறுதி
போல கருதப்பட்ட நிலையில், ஜெகனின் வெற்றி, அடுத்த தேர்தலில் அவர் ஆட்சியைப்
பிடிப்பதற்கான ஒரு அறிகுறியாகவே நம்பப்படுகிறது. அத்துடன், காங்கிரசுக்கு
இது ஒரு எச்சரிக்கை அறிவிப்பாகவும் கருதப்படுகிறது.

சாக்குபோக்கு:ஜெகன் மோகன் கட்சியின் வெற்றி குறித்து கருத்து
தெரிவிக்கும் காங்கிரஸ் மற்றும் தெலுங்கு தேசம் கட்சித் தலைவர்கள், "கைது
செய்யப்பட்டதால் ஏற்பட்ட அனுதாப அலையால் தான் ஜெகன் வெற்றி பெற்றார்' என,
சாக்கு போக்கு சொன்னாலும், அவருக்கு எதிரான ஊழல் புகார்களை மக்கள்
நிராகரித்துள்ளதையும், அரசுக்கு எதிராக எதிர்ப்பு அலை உருவாகியுள்ளதையுமே
காட்டுகிறது.ஆந்திராவில் சமீபத்தில் இடைத் தேர்தல் நடந்த 18 சட்டசபை
தொகுதிகளும், அங்கு மொத்தமுள்ள 23 மாவட்டங்களில் 12 மாவட்டங்களில்
பரவியுள்ளன. இந்தப் பகுதிகளில் எல்லாம் ஜெகன் கட்சி வெற்றி பெற்றுள்ளது.
மேலும், தனி மாநில கோரிக்கை தீவிரமாக வலுப் பெற்றுள்ள தெலுங்கானா
பகுதிகளிலும், ஜெகனின் ஒய்.எஸ்.ஆர்.காங்கிரஸ் பெரு வெற்றி பெற்றுள்ளது,
அவருக்குள்ள செல்வாக்கை பறை சாற்றுவதாக உள்ளது. அத்துடன் தெலுங்கானா
பகுதியில் உள்ள பரகலா தொகுதியில், ஜெகன் கட்சி வேட்பாளர், தெலுங்கானா
ராஷ்டிரிய சமிதி கட்சி வேட்பாளரிடம் 1,500 ஓட்டுகள் வித்தியாசத்தில் தான்
தோல்வி அடைந்துள்ளார். அதனால், அங்கும் அவருக்கு நல்ல செல்வாக்கு உள்ளது
நிரூபணமாகியுள்ளது.

காங்கிரசுக்கு சிக்கல்:ஆந்திர சட்டசபை மொத்த உறுப்பினர்கள்
எண்ணிக்கை 294. இதில், காங்கிரஸ் கட்சிக்கு 154 எம்.எல்.ஏ.,க்கள் உள்ளனர்.
பெரும்பான்மைக்கு தேவையான 148ஐ விட, ஆறு உறுப்பினர்களே அதிகமாக உள்ளனர்.
ஜெகன் கட்சியின் தற்போதைய வெற்றியைப் பார்த்து, காங்கிரஸ் அணியில் உள்ள
குறிப்பிட்ட அளவு எம்.எல்.ஏ.,க்கள், ஜெகனின் ஒய்.எஸ்.ஆர்.காங்கிரசுக்கு
தாவினால், முதல்வர் கிரண்குமார் ரெட்டி தலைமையிலான காங்கிரஸ் அரசுக்கு
நிச்சயம் சிக்கல் ஏற்படும் என்பது உண்மையே. அப்படி சிலர் கட்சி தாவ
திட்டமிட்டுள்ளதாகவும் கூறப்படுகிறது.

நம்பிக்கை :ஏற்கனவே உட்கட்சி பூசலில் தவிக்கும் காங்கிரஸ்
கட்சியில் எந்த நேரத்திலும், கட்சி தாவல் நடக்கவும் வாய்ப்பு உள்ளது.
அதற்கு ஏற்றார் போல் ஏற்கனவே, காங்கிரஸ் எம்.எல்.ஏ.,க்கள் இருவர், தங்களின்
பதவியை ராஜினாமா செய்வதாக கடிதம் கொடுத்து விட்டு, ஜெகனுக்கு ஆதரவு
தெரிவித்துள்ளனர்.இருந்தாலும், தற்போதைக்கு சிறையில் இருக்கும் ஜெகன்
மோகன், காங்கிரஸ் அரசை கவிழ்க்கும் வேலையில் ஈடுபட மாட்டார். அரசுக்கு
எதிராக உள்ள அலையை இன்னும் தீவிரப்படுத்தி, 2014 சட்டசபை தேர்தலில் வெற்றி
பெறுவதையே அவர் விரும்புவார். அதற்கு மற்றொரு காரணம், மாநில அரசு கவிழும்
சூழ்நிலை உருவானால், சட்டசபைக்கு முன்னதாகவே தேர்தல் வருவதை விரும்பாத
தெலுங்கு தேசம் கட்சி, காங்கிரஸ் கட்சிக்கு வெளியில் இருந்து ஆதரவு
கொடுத்தாலும் ஆச்சர்யப்படுவதற்கு இல்லை. அதையும் கருத்தில் கொண்டே ஜெகன்
செயல்படுவார் என, அவருக்கு நெருக்கமான வட்டாரங்கள் தெரிவிக்கின்றன.

மண்ணை கவ்விய கவர்ச்சி அரசியல்வாதி:ஆந்திராவில் ஆடம்பரமான
விருந்தளிப்பதில் பெயர் பெற்ற, எதிலும் வீண் ஆரவாரத்துடன் செயல்படக்கூடிய,
காங்கிரஸ் தலைவரான டி.சுப்பராமி ரெட்டி, சமீபத்தில் நெல்லூர் லோக்சபா
தொகுதியில் நடந்த இடைத் தேர்தலில், படுதோல்வி அடைந்தது, அவரது ஆதரவாளர்களை
அதிர்ச்சி அடைய வைத்துள்ளது. 69 வயதான அவர், ஒய்.எஸ்.ஆர். காங்கிரஸ்
வேட்பாளர் ராஜமோகன் ரெட்டியிடம், 2.91 லட்சம் ஓட்டுகள் வித்தியாசத்தில்
தோற்றுள்ளார். இதன் மூலம், நெல்லூர் லோக்சபா தொகுதிக்கு உட்பட்ட ஏழு
சட்டசபை தொகுதிகளிலும் ஒய்.எஸ்.ஆர்.காங்கிரசுக்கு அமோக ஆதரவு இருப்பது
வெட்ட வெளிச்சமாகியுள்ளது. திரைப்பட தயாரிப்பாளர், நன்கொடையாளர்,
தொழிலதிபர் என, பல முகங்களைக் கொண்ட, காங்கிரஸ் மேலிடத் தலைவர்களுக்கு
மிகவும் நெருக்கமான சுப்பராமி ரெட்டியே, ஒய்.எஸ்.ஆர்.காங்கிரஸ் கட்சியை
வீழ்த்த சரியான நபர் என நினைத்து, காங்கிரஸ் மேலிடம் அவரை வேட்பாளராக
நிறுத்தியும், அவரும், வாக்காளர்களுக்கு தங்க ஆபரணங்கள் உட்பட பல பரிசுப்
பொருட்களை அள்ளி வீசியும் தோல்வியைச் சந்தித்திருப்பது, மக்கள் மத்தியில்
மாற்றம் ஏற்பட்டுள்ளதையே காட்டுகிறது.

ஆந்திர காங்கிரசில் இப்போது என்ன பிரச்னை?
* ஒய்.எஸ்.ராஜசேகர ரெட்டி மறைவுக்குப் பின், அவரின் இடத்தை நிரப்ப தகுதியான தலைவர்கள் இல்லை.
*அதிகரித்துள்ள உட்கட்சி பூசல்.
*ஒரு பலமான அரசியல் சக்தியாக ஜெகன் உருவாகியிருப்பது.
* தனி தெலுங்கானா மாநில கோரிக்கை விவகாரத்தில், காங்கிரஸ் கட்சி இக்கட்டான சூழ்நிலையில் சிக்கியிருப்பது.
*மாநிலம் முழுவதும் உள்ள மக்கள் விரும்பும், அனைவரையும் சமாளிக்கக் கூடிய திறமையான தலைவர் இல்லாதது.
இவை எல்லாம் காங்கிரஸ் கட்சிக்கு பின்னடைவை ஏற்படுத்தியுள்ளன.