கர்நாடக சட்டசபையில் இன்று ஓட்டெடுப்பு: எடியூரப்பா - குமாரசாமி கடைசி கட்ட முயற்சி

பெங்களூரு:முதல்வர் எடியூரப்பா இன்று சட்டசபையை கூட்டியுள்ளார்.
நம்பிக்கை ஓட்டெடுப்புக்கு பிறகு கர்நாடகாவில் பா.ஜ., ஆட்சி நீடிக்குமா,
இல்லையா என்பது தெரிந்து விடும். இந்நிலையில், பா.ஜ., அதிருப்தி
எம்.எல்.ஏ.,க்கள் 11 பேருக்கு விளக்கம் கேட்டு, சட்டசபை செயலர் நோட்டீஸ்
அனுப்பியுள்ளது பெரும் பரபரப்பை ஏற்படுத்தியுள்ளது.

கர்நாடக பாரதிய ஜனதா அரசுக்கு அளித்து வந்த ஆதரவை, அந்தக் கட்சியைச்
சேர்ந்த 19 எம்.எல்.ஏ.,க்கள் வாபஸ் பெற்றதால், அக்டோபர் 12ம் தேதி மாலை 5
மணிக்குள், சட்டசபையில் மெஜாரிடியை நிரூபிக்க வேண்டும் என, முதல்வர்
எடியூரப்பாவுக்கு கவர்னர் பரத்வாஜ் உத்தரவிட்டார். ஆனால், முதல்வர்
எடியூரப்பாவோ, ஒருநாள் முன்னதாகவே, அதாவது, இன்று தனது பலத்தை
நிரூபிப்பதாக அறிவித்தார்.இதற்காக இன்று காலை 10 மணிக்கு சட்டசபை கூட்டம்
நடக்கிறது. இதனால், சட்டசபையை சுற்றி 2 கி.மீ. சுற்றளவிற்கு "144' தடை
உத்தரவு பிறப்பிக்கப்பட்டுள்ளது. மதுபான விற்பனைக்கு தடை விதிக்கப்பட்டது.
நேற்று முழுவதும் ஆளுங்கட்சி தரப்பிலும், எதிர்க்கட்சி தரப்பிலும் பெரும்
பரபரப்பு நிலவியது. முதல்வர் எடியூரப்பா தனது அமைச்சர்களுடனும்,
அதிகாரிகளுடனும் தொடர்ந்து ஆலோசனை நடத்தினார். போலீஸ் டி.ஜி.பி.,
அஜய்குமார்சிங்குடன் பாதுகாப்பு ஏற்பாடுகள் குறித்து தீவிரமாக விசாரித்து
அறிந்தார்.
அதிருப்தி பா.ஜ., எம்.எல்.ஏ.,க்கள் சென்னையில் முகாமிட்டுள்ளனர்.
கோவாவிலிருந்து சென்னைக்கு அழைத்து செல்லப்பட்ட அவர்கள், ஷெரட்டன்
ஓட்டலில் பாதுகாப்பாக வைக்கப்பட்டனர். முன்னாள் முதல்வர் குமாரசாமி,
அவர்களை சந்தித்து பேசினார். "நம்பிக்கை ஓட்டெடுப்பில் பாரதிய ஜனதா அரசு
கவிழ்வது உறுதி. அதிருப்தி எம்.எல்.ஏ.,க்களை பா.ஜ.,வினர் தொடர்ந்து
மிரட்டி வருகின்றனர்' என்று அவர் கூறினார். பின், அதிருப்தி எம்.எல்.ஏ.,
க்களுடன் குமாரசாமி, மதசார்பற்ற ஜனதா தளம் எம்.பி., செலுவராயசுவாமி
ஆகியோரும் சொகுசு பஸ்சில் பெங்களூரு புறப்பட்டனர்.
அதிருப்தி எம்.எல்.ஏ.,க்களுக்கு சட்டசபை செயலர் நோட்டீஸ் அளித்தது
சரியல்ல என்று கோரி, ம.ஜ.த., - காங்கிரஸ் தலைவர்கள், கவர்னர் பரத்வாஜை
சந்தித்து நேற்று முறையிட்டனர்.சட்டசபையில் மொத்த உறுப்பினர்கள் எண்ணிக்கை
224. இதில் பா.ஜ., அதிருப்தி எம்.எல்.ஏ., க்கள் 14 பேர் உள்ளனர்.
இவர்களில், 11 பேருக்கு விளக்கம் கேட்டு சட்டசபை செயலர் பாட்டீல் நோட்டீஸ்
அனுப்பியுள்ளார். இது தவிர, 2009 டிசம்பரில் நடந்த சபாநாயகர் தேர்தலின்
போது ரகளையில் ஈடுபட்ட மூன்று காங்கிரஸ் உறுப்பினர்கள் காகா சாஹேப்
பாட்டீல், மஞ்சு, ரகீம்கான், ம.ஜ.த., உறுப்பினர் ஜமீர் அகமதுகான் ஆகிய
நான்கு பேர் மீதான நடவடிக்கையை, சபாநாயகர் போப்பய்யா அறிவிக்கிறார்.
எனவே, விளக்கம் கேட்டு நோட்டீஸ் அனுப்பிய 11 பேரும், நடவடிக்கை பாயும்
நான்கு பேரும் சபையிலிருந்து சஸ்பெண்ட் செய்யப்படுவர் என்று தெரிகிறது.
இதனால், சட்டசபையின் உறுப்பினர்கள் எண்ணிக்கை 209 ஆக குறைந்து விடுகிறது.
பாரதிய ஜனதாவுக்கு தற்போதுள்ள உறுப்பினர்கள் பலம் 103. இதுமட்டுமின்றி
ம.ஜ.த., உறுப்பினர் அஸ்வத்தும் பா.ஜ.,வுக்கு ஆதரவு அளிக்கிறார். எனவே,
பாரதிய ஜனதாவின் பலம் 104 ஆக உள்ளது.காங்கிரஸ் உறுப்பினர்கள் 73 பேர்,
ம.ஜ.த., உறுப்பினர்கள் 28 பேர் ஆக மொத்தம் 101 பேர் உள்ளனர். இவர்களிடம்
இருக்கும் அதிருப்தி பா.ஜ., எம்.எல்.ஏ.,க்கள் 17 பேர் என்று கூறுகின்றனர்.
ஆனால், ஆளும் கட்சியினரோ அதை மறுக்கின்றனர்.
நோட்டீஸ் அனுப்பப்பட்ட அதிருப்தி எம்.எல்.ஏ., க்கள் 11 பேர் மீது
எடுக்கப்படும் நடவடிக்கையை பொறுத்தே பா.ஜ., ஆட்சி நீடிக்குமா என்பது
தெரியவரும். மொத்தத்தில் பா.ஜ., ஆட்சியின் கதி சபாநாயகர் கையில் உள்ளது.
ஆனால், எதிர்க்கட்சி தலைவர்களோ, சபாநாயகர் பா.ஜ.,வுக்கு ஆதரவாக
செயல்படுகிறார் என்று குற்றம் சாட்டியுள்ளனர்.
இதுமட்டுமின்றி
காங்கிரஸ், ம.ஜ.த., எம்.எல்.ஏ.,க்கள் மாற்றி ஓட்டு போடுவார்கள் என்று
பா.ஜ., தலைவர்கள் கருதுகின்றனர். "எப்படியும் வெற்றி பெற்று விடுவோம்.
மெஜாரிடியை விட அதிக எண்ணிக்கையில் பா.ஜ., வெற்றி பெறுவது உறுதி' என்று
அமைச்சர் ஜனார்த்தன் ரெட்டி கூறியுள்ளார்.