டெல்லி சட்டசபையில் இன்று நம்பிக்கை ஓட்டெடுப்பு: காங்கிரஸ், பா.ஜனதாவுக்கு ஆம் ஆத்மி வேண்டுகோள்

by **mmani** Thu Jan 02, 2014 8:16 am

புதுடெல்லி, ஜன.2-

டெல்லி சட்டமன்ற தேர்தலில் 28 இடங்களில் வெற்றி பெற்ற ஆம் ஆத்மி கட்சி, பல்வேறு இழுபறிக்குப்பின் ஆட்சி அமைத்தது. அதன்படி அக்கட்சித்தலைவர் அரவிந்த் கெஜ்ரிவால், கடந்த 28-ந்தேதி முதல்-மந்திரியாக பதவி ஏற்றுக்கொண்டார். அவருடன் 6 பேர் மாநில மந்திரிகளாக பதவி ஏற்றனர்.

ஆம் ஆத்மியின் தேர்தல் வாக்குறுதிகளில் முக்கியமானவையாக கருதப்பட்ட இலவச குடிநீர் வினியோகம் மற்றும் மின் கட்டணம் பாதியாக குறைப்பு ஆகிய திட்டங்களை புதிய அரசு பதவியேற்ற 2 நாட்களிலேயே அரவிந்த் கெஜ்ரிவால் அறிவித்தார். மேலும் டெல்லி மக்களுக்கு பல்வேறு நலத்திட்டங்களை நிறைவேற்ற இருப்பதாகவும் அக்கட்சி தலைவர்கள் கூறியுள்ளனர்.

இந்தநிலையில் புதிய சட்டமன்றத்தின் முதல் கூட்டத்தொடர் நேற்று தொடங்கியது. இதில் முதல்-மந்திரி அரவிந்த் கெஜ்ரிவால் உள்ளிட்ட அனைத்து உறுப்பினர்களும் கலந்து கொண்டனர். கடந்த 2 நாட்களாக அரவிந்த் கெஜ்ரிவாலுக்கு உடல் நலக்குறைவு இருந்த போதும் இந்த கூட்டத்தில் அவர் கலந்து கொண்டது குறிப்பிடத்தக்கது.

சபை கூடியதும் தற்காலிக சபாநாயகர் தேர்வு நடைபெற்றது. அதன்படி தற்காலிக சபாநாயகர் பதவியை பா.ஜனதா உறுப்பினர் ஜெகதிஷ் முகிக்கு வழங்க ஆம் ஆத்மி முன் வந்தது. ஆனால் இதை பா.ஜனதா ஏற்க மறுத்ததால், காங்கிரஸ் உறுப்பினர் மதின் அகமது தற்காலிக சபாநாயகராக தேர்வு செய்யப்பட்டார்.

இதைத்தொடர்ந்து முதல்-மந்திரி அரவிந்த் கெஜ்ரிவால் உள்பட அனைத்து உறுப்பினர்களுக்கும் தற்காலிக சபாநாயகர் மதின் அகமது எம்.எல்.ஏ.க்களாக பதவி பிரமாணம் செய்து வைத்தார்.

கூட்டத்தொடரின் 2-வது நாளான இன்று, முதல்-மந்திரி அரவிந்த் கெஜ்ரிவால் சட்டமன்றத்தில் நம்பிக்கை வாக்கு கோருகிறார். 28 உறுப்பினர்களை கொண்ட ஆம் ஆத்மி கட்சி நம்பிக்கை வாக்கெடுப்பில் வெற்றி பெற 36 உறுப்பினர்களின் ஆதரவு வேண்டும். காங்கிரஸ் கட்சியின் 8 உறுப்பினர்களும் ஆம் ஆத்மிக்கு ஆதரவு தெரிவித்துள்ளதால், அரவிந்த் கெஜ்ரிவாலின் அரசு வெற்றி பெறுவதில் சிரமம் இருக்காது என தெரிகிறது.

எனினும் ஆம் ஆத்மி அரசுக்கு காங்கிரஸ், பா.ஜனதா கட்சிகள் ஆதரவளிக்க வேண்டும் என்று அக்கட்சி கோரிக்கை விடுத்துள்ளது. இது குறித்து அக்கட்சி எம்.எல்.ஏ.வான வினோத் குமார் பின்னி கூறுகையில், டெல்லி மக்களுக்கு இன்னும் பல்வேறு நலத்திட்டங்களை செயல்படுத்த வேண்டியுள்ளதால், காங்கிரஸ் மற்றும் பா.ஜனதா கட்சிகள் ஆம் ஆத்மி அரசுக்கு ஆதரவு அளிக்குமாறு கேட்டுக்கொண்டார்.

அக்கட்சித்தலைவர் சஞ்சய் சிங் கூறும்போது, "ஆம் ஆத்மி கட்சி 18 விஷயங்களை மனதில் வைத்து டெல்லியில் அரசு அமைத்துள்ளது. நாளை (இன்று) நடைபெறும் நம்பிக்கை வாக்கெடுப்பில் அரசு வெற்றி பெறுமா? என்பது குறித்து எதுவும் தெரியாது. அரசு வெற்றி பெற்றால் இந்த 18 விஷயங்களை நிறைவேற்ற நாங்கள் உழைப்போம்" என்றார்.

இந்தநிலையில் டெல்லி சட்டமன்ற சபாநாயகர் மற்றும் துணை சபாநாயகர் தேர்தல் நாளை நடக்கிறது. இதில் ஆம் ஆத்மி கட்சி சார்பில் எம்.எஸ்.திர் போட்டியிடுவார் என அக்கட்சி அறிவித்துள்ளது.

இதைத்தொடர்ந்து வருகிற 6-ந்தேதி துணைநிலை ஆளுநர் நஜீப் ஜங் சட்டமன்றத்தில் உரையாற்றுகிறார். ஆளுநரின் உரைக்கு நன்றி தெரிவிக்கும் தீர்மானம் மறுநாள் நிறைவேற்றப்படுகிறது. அன்றுடன் கூட்டத்தொடர் முடிக்கப்படும் என கூறப்படுகிறது.

டெல்லியில் முதல்-மந்திரி அரவிந்த் கெஜ்ரிவால் வெளியிட்டுள்ள இலவச குடிநீர் வினியோகம் மற்றும் மின் கட்டணம் பாதியாக குறைப்பு ஆகிய அறிவிப்புகளை பா.ஜனதா கட்சி கடுமையாக விமர்சித்துள்ள நிலையில், இந்த கூட்டத்தொடரில் அக்கட்சி புயலை கிளப்பும் என எதிர்பார்க்கப்படுகிறது.