10 கி.மீட்டரில் திரும்பி உயிர்பிழைத்தவர் : 8 பேர் கருகிய சம்பவத்தில் "திக்... திக்...'

by **மாலதி** Thu Aug 12, 2010 7:59 am

கும்பகோணம்: தூத்துக்குடி அருகே நடந்த கோர விபத்தில் குடந்தை பகுதியைச்
சேர்ந்த எட்டுப்பேர் காரில் கருகி இறந்த சம்பவத்தில் உடன் சென்ற
டீக்கடைக்காரர், 10 கி. மீ., தூரத்தில் பயணத்தை தவிர்த்து திரும்பியதால்
உயிர் தப்பினார்.
தஞ்சை மாவட்டம் கும்பகோணம் அடுத்த நாச்சியார்கோவிலில் இருந்து பாத்திர
மொத்த வியாபாரிகள் உட்பட எட்டுப்பேர் கடந்த ஒன்பதாம் தேதி இரவு 10.45
மணிக்கு குற்றாலத்துக்கு சுற்றுலா செல்ல டிரவேரா காரில் சென்றனர்.
நாச்சியார்கோவில் கம்மாளத்தெருவில் வசிக்கும் தசரதன் மகன் சந்தானகிருஷ்ணன்
(48) நாச்சியார்கோவில் கடைத்தெருவில் டீக்கடை நடத்துகிறார். இவர் சுற்றுலா
சென்ற பாவாடைசாமிக்கு நெருங்கிய நண்பர். இவர் சந்தானகிருஷ்ணனையும்
சுற்றுலா செல்லும் போதெல்லாம் அழைத்துச் செல்வது வழக்கம். கடந்த ஒன்பதாம்
தேதி இரவு சுற்றுலா செல்லும்போதும் சந்தானகிருஷ்ணனையும் காரில் அழைத்துச்
சென்றார். சந்தானகிருஷ்ணன் திடீரென புறப்பட்டதால் வீட்டில் தகவல்
சொல்லவில்லை. கடையில் வேலைக்கும் ஆளில்லை என்று புலம்பியவாறு காரில்
வந்தார். இவர்களது கார் கும்பகோணம் நெருங்கும் முன், "நான் சுற்றுலா
வரவில்லை. கடைக்கு ஆள் இல்லை. வீட்டிலும் சொல்லவில்லை' என, கூறி பாதியில்
இறங்கி ஊர் திரும்பினார். இவர் வீட்டுக்கு வந்துவிட்டு அதிகாலை
வழக்கம்போல் கடைக்கு சென்றார். சுற்றுலா சென்ற கார் தூத்துக்குடி அருகே
லாரியுடன் மோதி காரில் சென்ற எட்டுப்பேரும் கருகி இறந்தனர் என்ற செய்தி
வந்தது.
சந்தானகிருஷ்ணன் மனைவி பானுமதி கூறியதாவது: என் கணவர் காரில்
சென்று பாதியில் திரும்பி வந்தது காலையில்தான் தெரியும். என் வீட்டுக்கு
ஒரு சிலர் வந்து, "பாஸ்புக், ஃபோட்டோ ஏதாவது இருந்தால் எடுத்துக்கொண்டு
பஞ்சாயத்து தலைவரை பார். சுற்றுலா சென்ற கார் விபத்துக்குள்ளாகி விட்டது'
என்றனர். எனக்கு ஒன்றுமே புரியவில்லை. அக்கம்பக்கத்தினர்
சொல்லியதின்பேரில் என் கணவருக்கு ஃபோன் செய்தேன். "நான் டீக்கடையில் தான்
உள்ளேன். நான் இரவு புறப்பட்டு பாதியில் வந்துவிட்டேன்' என்றார். எனக்கு
பெரும் அதிர்ச்சியாகிவிட்டது. நண்பர்களாக சேர்ந்து சுற்றுலா செல்லும்போது,
என் கணவரையும் எப்போதும் அழைத்துச் செல்வார்கள். இம்முறை என்னிடம்
சொல்லாமல், துணியும் எடுக்காமல் சென்றுவிட்டார். அதனால், பாதியில்
வந்ததையும் சொல்லவில்லை. நடந்த சம்பவத்தை இப்போது நினைத்தாலும் என்னால்
தாங்க முடியவில்லை. இவ்வாறு அவர் கூறினார்.