திக்..திக்..திக்... *கடைசி பந்தில் போட்டி "டை' *காம்பிர், தோனி அபாரம்

அடிலெய்டு:
இந்தியா, இலங்கை அணிகள் மோதிய பரபரப்பான முத்தரப்பு போட்டி, கடைசி பந்தில்
"டை' ஆனது. 4 ரன்கள் தேவை என்ற நிலையில் 3 ரன்கள் மட்டுமே
எடுக்கப்பட்டதால், இந்திய வெற்றி கைநழுவியது. காம்பிர், தோனி மீண்டும்
அசத்தினர்.
ஆஸ்திரேலியாவில் முத்தரப்பு ஒருநாள் போட்டி தொடர் நடக்கிறது.
நேற்று அடிலெய்டில் நடந்த 5வது லீக் போட்டியில் இந்தியா, இலங்கை அணிகள்
இரண்டாவது முறையாக மோதின.
இர்பான் வாய்ப்பு:
"டாஸ்'
வென்ற இலங்கை அணி கேப்டன் ஜெயவர்தனா, "பேட்டிங்' தேர்வு செய்தார். இந்திய
அணியில் சேவக், ஜாகிர் கான் நீக்கப்பட்டு சச்சின், இர்பான் பதான் வாய்ப்பு
பெற்றனர்.
சண்டிமால் அரைசதம்:
இலங்கை
அணிக்கு மீண்டும் தரங்கா(0) ஏமாற்றினார். தில்ஷன் (16), சங்ககரா (31)
சொல்லிக் கொள்ளும்படி விளையாடவில்லை. பின் சண்டிமால், ஜெயவர்தனா இணைந்து
எவ்வித பதட்டமும் இல்லாமல் பேட் செய்ய, ஸ்கோர் சீராக உயர்ந்தது. ஜெயவர்தனா
43 ரன்கள் எடுத்த போது, வினய் குமார் பந்தில் அவுட்டாக, போட்டியில்
திருப்பு முனை ஏற்பட்டது. இதன் பின் இந்திய பவுலர்கள் எழுச்சி பெற்றனர்.
அரைசதம் கடந்த சண்டிமால் (81) ரன் அவுட்டானார்.
மாத்யூஸ் (17), பெரேரா
(5), குலசேகரா (12) தாக்குப்பிடிக்கவில்லை. கடைசி நேரத்தில் சேனநாயகே,
சற்று அதிரடி காட்டினார். இலங்கை அணி 50 ஓவரில் 9 விக்கெட்டுக்கு 236
ரன்கள் எடுத்தது. சேனநாயகே (22), ஹெராத் (1) அவுட்டாகாமல் இருந்தனர்.
இந்தியா சார்பில் வினய் குமார் 3, அஷ்வின் 2 விக்கெட் வீழ்த்தினர்.
சச்சின் "அவுட்':
எட்டிவிடும்
இலக்கை துரத்திய இந்திய அணிக்கு, இம்முறை காம்பிருடன் சச்சின் இணைந்து
துவக்கம் தந்தார். 100வது சதம் அடிக்கும் முயற்சியில் சச்சின் (15)
மீண்டும் தோற்றார். ரோகித் சர்மா, விராத் கோஹ்லி தலா 15 ரன்களில் பெவிலியன்
திரும்பினர்.
நழுவிய சதம்:
பின்
காம்பிருடன் இணைந்த தோனி மந்தமான ஆட்டத்தை வெளிப்படுத்தினார். இதனால்
"ரன்ரேட்' அதிகரித்தது. காம்பிர் சர்வதேச ஒருநாள் அரங்கில் 30வது அரைசதம்
அடித்தார். கடந்த போட்டியில் சதம் அடிக்கும் வாய்ப்பை நழுவவிட்ட காம்பிர்,
இம்முறை 91 ரன்களுக்கு ரன் அவுட்டாகி, சோகத்துடன் வெளியேறினார். ரவிந்திர
ஜடேஜா (3), அஷ்வின் (14) நிலைக்கவில்லை. ஒரு சிக்சர் அடித்த இர்பான் பதான்
(8), ரன் அவுட்டானார்.
"திரில்' முடிவு:
கடைசி
ஓவரில் இந்திய அணியின் வெற்றிக்கு 9 ரன்கள் தேவைப்பட்டன. மலிங்கா வீசிய
முதல் பந்தில் 2 ரன்கள் எடுத்த தோனி, அடுத்த பந்தில் 1 ரன் எடுத்தார்.
மூன்றாவது பந்தில் வினய் குமார் 1 ரன் எடுத்தார். நான்காவது பந்தில் ஒரு
ரன். அடுத்த பந்தில் வினய் குமார் (1) ரன் அவுட்டாக, போட்டியில் "டென்ஷன்'
எகிறியது.
கடைசி ஒரு பந்தில், தேவை 4 ரன்கள். பந்தை எதிர்கொண்ட தோனி,
பவுண்டரி நோக்கி பலமாக அடித்தார். இதனை விரட்டிய இலங்கை "பீல்டர்கள்'
எல்லைக் கோட்டு அருகே தடுத்தனர். அதற்குள் தோனி ஓடியே 3 ரன்கள் எடுக்க,
இந்திய அணி 50 ஓவரில் 9 விக்கெட்டுக்கு 236 ரன்கள் எடுத்தது. இரு அணிகளும்
ஒரே ஸ்கோர் எடுத்ததால், போட்டி "டை' ஆனது. தோனி (58), உமேஷ் யாதவ் (0)
அவுட்டாகாமல் இருந்தனர்.
ஆட்ட நாயகன் விருதை தோனி வென்றார்.


கோஹ்லி "3000'
நேற்று
இந்தியாவின் விராத் கோஹ்லி 14 ரன்கள் எடுத்த போது, ஒருநாள் கிரிக்கெட்டில்
அதிவேகமாக 3000 ரன்களை(75 போட்டி) எட்டிய வீரர்கள் வரிசையில் நான்காவது
இடம் பெற்றார். முதல் மூன்று இடத்தில் வெஸ்ட் இண்டீசின் ரிச்சர்ட்ஸ் (69
போட்டி), கிரீனிட்ஜ் (72), தென் ஆப்ரிக்காவின் கிறிஸ்டன் (72) உள்ளனர்.
* இந்திய அளவில் வேகமாக இந்த இலக்கை எட்டிய முதல் வீரர் இவர் தான்.
இப்பட்டியலில்
சித்து (79 போட்டி), கங்குலி (82), காம்பிர் (87), டிராவிட் (89), தோனி
(90), சச்சின் (93), வெங்சர்க்கார் (98), சேவக் (100), கவாஸ்கர் (101)
ஆகியோர் "டாப்-10' ல் உள்ளனர்.

ஒரு ஓவரில் 5 பந்துகள்
அம்பயர் தவறால் சர்ச்சை
கிரிக்கெட்டில்
ஒரு ஓவருக்கு 6 பந்துகள் வீச வேண்டும். ஆனால், போட்டியின் 30வது ஓவரில்
மலிங்கா 5 பந்துகள் மட்டுமே வீசினார். இதனை இங்கிலாந்து அம்பயர்கள் சைமன்
பிரை, நிஜல் லாங் ஆகியோர் கண்டுகொள்ளவில்லை. மூன்றாவது அம்பயராக இருந்த
ஆஸ்திரேலியாவின் புருஸ் ஆக்சம்போர்டும் கவனிக்க தவறினார். இப்பந்து
வீசப்படாதது மர்மமாகவே இருந்தது. ஒருவேளை இது வீசப்பட்டு இருந்தால் இந்தியா
வென்றிருக்கலாம். அம்பயர்களின் தவறால் இந்திய வெற்றி பறிபோனதாக ரசிகர்கள்
புகார் தெரிவித்தனர்.
இது குறித்து கேப்டன் தோனி கூறுகையில்,""கடந்த
காலங்களில் மூன்றாவது அம்பயர் தலையிட்டு விட்டுப் போன அந்த பந்தை மீண்டும்
வீசச் சொல்வார். இம்முறை அப்படி எதுவும் நடக்கவில்லை. எல்லாம் முடிந்து
விட்டது. தற்போது எதுவும் செய்ய இயலாத நிலையில், சர்ச்சை கிளப்புவதால் பலன்
இல்லை. இது போன்ற தவறுகள் இனிமேல் நடக்காமல் இருக்க வேண்டும்,''என்றார்.

முதல் முறை
இந்தியா,
இலங்கை அணிகள் மோதிய போட்டி, "டை' ஆவது இது தான் முதன்முறை. ஒரு நாள்
அரங்கில் 26வது "டை'. இது இந்தியாவின் 6வது "டை'. இதற்கு முன் ஜிம்பாப்வே,
இங்கிலாந்து அணிகளுக்கு எதிராக தலா 2, வெஸ்ட் இண்டீஸ் அணிக்கு எதிராக ஒரு
போட்டியை "டை' செய்துள்ளது.
* ஆஸ்திரேலியாவில் நடக்கும் முத்தரப்பு ஒருநாள் தொடரில், ஐந்தாவது முறையாக போட்டி "டை' ஆனது.
* அடிலெய்டில் முதன் முதலாக போட்டி "டை' ஆனது.

காம்பிர் அதிகம்
முத்தரப்பு
தொடரில் இதுவரை அதிக ரன் எடுத்துள்ளவர்கள் பட்டியலில் இந்தியாவின்
காம்பிர்(188 ரன்கள்) முதலிடத்தில் உள்ளார். இரண்டாவது இடத்தில் இலங்கையின்
சண்டிமால் (182) உள்ளார்.
* அடிலெய்டில் அடுத்தடுத்த போட்டிகளில் காம்பிர் 92, 92 ரன்கள் எடுத்துள்ளார்.

முதல் விக்கெட் கீப்பர்
ஆஸ்திரேலிய
முத்தரப்பு தொடரில் அதிக விக்கெட் சரிவுக்கு (14 போட்டி, 22 கேட்ச், 4
ஸ்டம்பிங் என மொத்தம் 26) காரணமான முதல் இந்திய விக்கெட் கீப்பர் என்ற
பெருமை பெற்றார் தோனி.
* நேற்றைய போட்டியில் ஆட்டநாயகன் விருது பெற்ற
தோனிக்கு, இது 16வது விருது. தனது 200வது போட்டியில் பங்கேற்ற இவர், 44வது
அரைசதம் அடித்தார். இலங்கைக்கு எதிராக 15வது அரைசதம் இது.
* தென்
ஆப்ரிக்காவின் மார்க் பவுச்சர் (294), ஆஸ்திரேலியாவின் கில்கிறிஸ்ட் (282),
இலங்கையின் சங்ககரா (270), பாகிஸ்தானின் மொயின் கானுக்கு(211) அடுத்து,
200வது ஒருநாள் போட்டியில் பங்கேற்ற 5வது விக்கெட் கீப்பரானார் தோனி.