ஒமரால் சமாளிக்க முடியவில்லை: காஷ்மீரில் அமைதிகாண மத்திய அரசு ஏற்பாடு

by **அருள்** Tue Aug 03, 2010 10:27 am

புதுடில்லி : காஷ்மீர் கலவரத்தை முடிவுக்கு கொண்டு வரும் நடவடிக்கைகளை
மத்திய அரசு தீவிரப்படுத்தியுள்ளது. முதல்வர் ஒமர் அப்துல்லாவின்
வேண்டுகோளை ஏற்று, பிரச்னைக்கு தீர்வு காண அரசியல் ரீதியான நடவடிக்கைகளை
எடுக்க மத்திய அரசு திட்டமிட்டுள்ளது.
காஷ்மீரில் கடந்த 30ம் தேதி முதல் மீண்டும் கலவரம் வெடித்துள்ளது.
போராட்டக்காரர்களுக்கும், பாதுகாப்புப் படையினருக்கும் இடையே ஏற்பட்ட இந்த
மோதலில் கடந்த சில தினங்களில் மட்டும் பத்துக்கும் மேற்பட்டோர்
பலியாகியுள்ளனர். வன்முறை தொடர்வதை அடுத்து, பிரச்னைக்கு தீர்வு
காணும்படி, மத்திய அரசை வலியுறுத்துவதற்காக, காஷ்மீர் முதல்வர் ஒமர்
அப்துல்லா நேற்று டில்லி வந்து, பிரதமர் மன்மோகன் சிங்கை சந்தித்து
பேசினார்.மத்திய அமைச்சரவை உயர்மட்ட கமிட்டியுடன் அவர் ஆலோசனை நடத்தினார்.
இந்த கூட்டத்தில் நிதி அமைச்சர் பிரணாப் முகர்ஜி, உள்துறை அமைச்சர்
சிதம்பரம், ராணுவ அமைச்சர் அந்தோணி, வெளியுறவு அமைச்சர் கிருஷ்ணா
உள்ளிட்டோர் கலந்து கொண்டார்.
கூட்டத்தில் பேசப்பட்ட விவரங்கள் குறித்து மத்திய அரசு வட்டாரங்கள் கூறியதாவது:கலவரம்
தொடர்பாக சம்பந்தப்பட்ட அமைப்புகள் மற்றும் நபர்களுடன் மத்திய அரசு
பேச்சுவார்த்தையை துவக்க வேண்டும் என்றும், நிலைமையை சமாளிக்க கூடுதல்
படையை அனுப்பி வைக்க வேண்டும் என்றும் ஒமர் அப்துல்லா வலியுறுத்தினார்.
வன்முறையை முடிவுக்கு கொண்டு வர, அரசியல் ரீதியான நடவடிக்கை எடுக்கும்படி
அவர் வலியுறுத்தினார். பயங்கரவாத அமைப்புகளில் ஏற்கனவே இருந்தவர்கள் தான்,
கல்வீச்சு போன்ற வன்முறைகளில் ஈடுபடுகின்றனர் என்றும், இவர்கள் தற்போது
வேலை இல்லாமல் இருப்பதால் இதுபோன்ற வன்முறையில் இறங்குகின்றனர் என்றும்
காஷ்மீர் மாநில அரசு தரப்பில் தெரிவிக்கப்பட்டது.முன்னாள்
பயங்கரவாதிகளுக்கான மறுவாழ்வு திட்டங்களை செயல்படுத்த
திட்டமிட்டுள்ளதாகவும் காஷ்மீர் அரசு தரப்பில் தெரிவிக்கப்பட்டது.ஒமர்
அப்துல்லாவின் வேண்டுகோளை ஏற்று, பிரச்னையை தீர்க்க, அரசியல் ரீதியான
நடவடிக்கைகளை எடுக்க மத்திய அரசு திட்டமிட்டுள்ளது. மேலும், கலவரத்தை
சமாளிக்கும் பணியில், மாநில போலீசாருக்கு உதவுவதற்காக கூடுதல் படைகளை
அனுப்பி வைக்கவும் மத்திய அரசு சம்மதித்துள்ளது.
கூட்டம் முடிந்ததும், செய்தியாளர்களிடம் ஒமர் அப்துல்லா கூறியதாவது: காஷ்மீரில்
தற்போது நிலைமை மிகவும் மோசமாக உள்ளது. இதற்கு உடனடியாக தீர்வு காண
வேண்டும். தனி ஆளாக இந்த பிரச்னைக்கு என்னால் தீர்வு காண முடியாது. கூட்டு
முயற்சி அவசியம். காஷ்மீர் பிரச்னையை முடிவுக்கு கொண்டு வருவதற்கு
பொருளாதார ரீதியான உதவி தேவை இல்லை. அரசியல் ரீதியான நடவடிக்கைகளே
தேவை.சிறப்பு அதிகார சட்டத்துக்கு உட்பட்டு ராணுவம் செயல்படும் அதே
நேரத்தில், எதிர் முகாமில் இருந்து வரும் இளைஞர்களின் நலனுக்கு உதவும்
வகையிலான திட்டங்கள் அவசியம். தற்போதைய கலவரத்தில்
பாதிக்கப்பட்டவர்களுக்கு தகுந்த இழப்பீடு அளிக்க வேண்டும். காஷ்மீரில்
தற்போது நிலவும் பிரச்னைக்கு தனிப்பட்ட நபரோ, தனிப்பட்ட அமைப்போ காரணம்
இல்லை என்பதை உறுதியாக நம்புகிறேன்.இப்பிரச்னையை பெரிதாக்கி சிலர் ஆதாயம்
தேட முயற்சிக்கின்றனர். பிரச்னையை தீர்ப்பதற்கு தேவையான அனைத்து
நடவடிக்கைகளையும் எடுப்பதாக உள்துறை அமைச்சர் சிதம்பரம் உறுதி
அளித்துள்ளார். கட்டுப்பாடு என்பது ஒரு தரப்பினர் மட்டும் பின்பற்ற
வேண்டிய விஷயம் அல்ல என்றும், இரு தரப்புமே இதை பின்பற்ற வேண்டும் என்றும்
அவர் கூறினார். கலவரத்தை அடக்க, ஊரடங்கு உத்தரவை தீவிரமாக அமல்படுத்துவதை
தவிர, தற்போது வேறு வழியில்லை. இவ்வாறு ஒமர் அப்துல்லா கூறினார்.