இந்தியா வரும் ராஜபக்சேவுக்கு சிவப்புக் கம்பள மரியாதை & அறுசுவை விருந்து: மத்திய அரசு ஏற்பாடு!

மத்திய பிரதேச மாநிலம் சாஞ்சியில் புத்த பல்கலைக்கழகம் கட்ட
மத்திய அரசு திட்டமிட்டுள்ளது. இதற்கான அடிக்கல் நாட்டு விழா வருகிற 20-ந்
தேதி நடைபெற உள்ளது. சாஞ்சியில் நடைபெறும் விழாவில் கலந்து கொள்ளுமாறு
இலங்கை அதிபர் ராஜபக்சே மற்றும் பூடான் பிரதமருக்கு மத்திய அரசு அழைப்பு
விடுத்துள்ளது.

இந்த அழைப்பை ஏற்று ராஜபக்சே 20-ந் தேதி இந்தியா வர திட்டமிட்டுள்ளார்.
இதற்கு தமிழ்நாட்டில் கடும் எதிர்ப்பு கிளம்பியுள்ளது. லட்சக்கணக்கான ஈழத்
தமிழர்களை ஈவு இரக்கமின்றி கொன்று குவித்த ராஜ பக்சேயை மத்திய அரசு
வரவேற்கக்கூடாது என்று தமிழக அரசியல் தலைவர்கள் கோரிக்கை விடுத்துள்ளனர்.

ராஜபக்சேக்கு கறுப்பு கொடி காட்ட மதிமுக தலைவர் வைகோ ஏற்பாடு செய்து
வருகிறார். இந்த நிலையில் ராஜபக்சேயின் இந்திய பயணம் திட்டமிட்டப் படி
நடைபெறும் என்று இலங்கை இன்று அதிகாரப்பூர்வமாக அறிவித்தது.

தமிழ்நாட்டு தமிழர்களின் மன உணர்வுகளை எப்போதும் புறக்கணித்து வரும்
மத்திய அரசு இந்த தடவையும் தமிழர்களின் போராட்டத்தை கண்டு கொள்ளவில்லை.
சிங்கள அதிபர் ராஜபக்சேக்கு ராஜமரியாதையுடன் வரவேற்பு கொடுக்க மத்திய அரசு
எல்லா ஏற்பாடுகளையும் செய்து வருகிறது.

இதற்கிடையே இந்தியா வரும் ராஜபக்சே டெல்லியிலும் சில நிகழ்ச்சிகளில் கலந்து
கொள்கிறார். 20-ந் தேதி பிரதமர் மன்மோகன் சிங்கை சந்தித்து பேசவும்
திட்டமிட்டுள்ளார். இது தவிர ராஜபக்சேக்கு அறுசுவை விருந்து கொடுக்கவும்
மத்திய அரசு ஏற்பாடு செய்துள்ளது.

இந்த சந்திப்பின் போது விரைவில் நடைபெற உள்ள ஐ.நா. மனித உரிமை கூட்டத்தில்
ஈழத் தமிழர்களுக்கு ஆதரவு கொடுக்காமல் தங்களுக்கு ஆதரவு கொடுக்க வேண்டும்
என்று மன்மோகனை ராஜபக்சே வலியுறுத்துவார் என்று தகவல்கள் வெளியாகியுள்ளன.