திருச்சி அருகே மாயமான 4 வயது சிறுமி நரபலி?: குவாரி குட்டையில் உடல் மீட்பு

திருச்சி மாவட்டம் துவாக்குடி அருகே உள்ள வடக்கு மலை அய்யனார் கோவில் தெருவை சேர்ந்தவர் முனியப்பன், லாரி டிரைவர். இவரது மனைவி அமராவதி. இவர் திருமண மண்டபத்தில் வேலை செய்து வருகிறார். இவர்களுக்கு ராகவி (7), இன்பரசி (4) என்ற இரண்டு குழந்தைகள் இருந்தனர்.

இந்த நிலையில் முனியப்பன் சபரிமலைக்கு விரதம் மேற்கொண்டு சென்றுள்ளார். கடந்த 30–ந்தேதி அமராவதி வேலைக்கு சென்றார். அப்போது தனது மகள் இன்பரசியை அதே பகுதியில் வசிக்கும் நாத்தனார் நாகராணி வீட்டில் விட்டு சென்றார்.
வேலை முடிந்து திரும்பி வந்த போது இன்பரசி நாத்தனார் வீட்டில் இல்லாதது கண்டு அமராவதி அதிர்ச்சி அடைந்தார். பின்னர் அந்த பகுதி முழுவதும் நாத்தனார் மற்றும் உறவினர்களோடு சேர்ந்து மகளை அமராவதி தேடினார். இதையடுத்து துவாக்குடி போலீசிலும் புகார் செய்தார். புகாரின் பேரில் வழக்கு பதிவு செய்த போலீசார் சிறுமி இன்பரசியை தேடிவந்தனர்.
இதற்கிடையில் அந்த பகுதியில் வசிக்கும் தனம் என்ற பெண் மீது அமராவதி உறவினர்களுக்கும், அந்த பகுதியை சேர்ந்தவர்களுக்கும் சந்தேகம் எழுந்துள்ளது. கடந்த பல வருடங்களாக தனம் குறி சொல்லும் தொழில் செய்து வருகிறார். மேலும் கடந்த 2007–2008 ஆம் ஆண்டு 3 குழந்தைகள் கடத்தப்பட்ட சம்பவத்திலும் தனம் முக்கிய குற்றவாளியாக இருந்துள்ளார்.
இது போன்று அந்த பகுதியில் அடிக்கடி குழந்தைகள் மாயமாகி வந்ததால் தனத்தின் மீது சந்தேகம் அடைந்த பொது மக்கள் போலீசாரிடமும் கூறி நடவடிக்கை எடுக்க கேட்டு வந்துள்ளனர்.
மேலும் தற்போது மாயமான இன்பரசியை, தனம் கடத்தி வைத்திருக்கலாம் என்ற சந்தேகத்தின் பேரில் அவரிடம் உறவினர்கள் விசாரித்தனர். அதற்கு அவர் சரியாக பதில் கூறவில்லை. கடந்த 2 நாட்களுக்கு முன்பு தனத்தின் வீட்டின் உள் பகுதியில் பூச்சு வேலை நடந்துள்ளது. இன்பரசியை கொன்று புதைத்திருக்கலாம் என்ற சந்தேகத்தில் தனத்தின் வீட்டிற்கு சென்ற உறவினர்கள் அதனை மீண்டும் தோண்டி பார்த்துள்ளனர்.

இது பற்றி போலீசாருக்கும் தெரியப்படுத்தி அவர்கள் விசாரணை நடத்தும் படியும் வற்புறுத்தி உள்ளனர். ஆனால் தனத்திடம் போலீசார் விசாரணை நடத்தவில்லை என கூறப்படுகிறது. பொறுத்திருந்து பார்த்த பொதுமக்கள் இன்று காலை தனத்தின் வீட்டிற்கு சென்று மீண்டும் சிறுமி இன்பரசியை பற்றி விசாரித்தனர்.
அப்போது ‘என்னிடம் கேட்க வேண்டாம், குழந்தை எங்காவது குவாரியில் இறந்து கிடக்கலாம், அங்கு சென்று பாருங்கள்’ என கோபமாக கூறியுள்ளார். இதைக்கேட்டு அதிர்ச்சி அடைந்த உறவினர்களும், பொதுமக்களும் தனம் சொன்ன குவாரிக்கு சென்று பார்த்த போது அவர்கள் கண்ட காட்சி அதிர வைத்தது.
மாயமான சிறுமி இன்பரசி குவாரியில் இருந்த தண்ணீரில் இறந்த நிலையில் தலைகுப்புற கிடந்ததை கண்டனர். இது பற்றி துவாக்குடி போலீசாருக்கு தகவல் கொடுத்தனர். தகவலின் பேரில் அங்கு வந்த போலீசார் திருச்சி தீயணைப்பு படை வீரர்கள் உதவியுடன் இன்பரசி உடலை மீட்டு அரசு ஆஸ்பத்திரிக்கு பிரேத பரிசோதனைக்காக அனுப்பி வைத்தனர்.
மேலும் துப்பறியும் நாய் வரவழைக்கப்பட்டு துப்பு துலக்கினார்கள். அந்த நாய் சம்பவ இடத்தில் இருந்து மோப்பம் பிடித்தபடி தனம் வசிக்கும் தெருவில் பாய்ந்து சென்றது.
எனவே நரபலிக்காக இன்பரசியை கடத்தி வைத்துக்கொண்டு உறவினர்கள் கொடுத்த நெருக்கடியால் தனம் குழந்தையை கொன்று குவாரியில் வீசியிருக்கலாம் என்ற கோணத்தில் போலீசார் விசாரணையை தொடங்கி உள்ளனர்.
இதற்கிடையே குழந்தை மர்மமாக இறந்ததை கண்டித்து பொது மக்கள் திடீர் சாலை மறியலில் ஈடுபட்டனர். இதனால் போக்குவரத்து பாதிக்கப்பட்டது. அவர்களுடன் போலீசாரும், தாசில்தாரும் பேச்சுவார்த்தை நடத்தினார்கள்.
அப்போது பொது மக்கள் பரபரப்பு புகார் தெரிவித்தனர். ஏற்கனவே இந்த பகுதியில் அடிக்கடி குழந்தைகள் மாயமாகி வருகிறார்கள் என்றும், அதற்கு தனம் தான் காரணம் என்றும் தெரிவித்த பொதுமக்கள் சிறுமி இன்பரசி சாவுக்கும் தனத்திற்கும் தொடர்பு உள்ளது. எனவே தனத்தை பிடித்து தீவிர விசாரணை நடத்தினால் உண்மை வெளிவரும் என்றும் நரபலிக்காக சிறுமியை கடத்தி செல்ல முயற்சி நடந்திருக்கலாம் என்றும் பரபரப்பாக கூறினார்கள்.
விசாரணை நடத்துவதாக உறுதி அளித்ததை தொடர்ந்து மறியலை பொது மக்கள் கைவிட்டனர். இந்த சம்பவம் இன்று பெரும் பரபரப்பை ஏற்படுத்தி உள்ளது.