ஒரத்தநாடு அருகே டெங்கு காய்ச்சலுக்கு 7 வயது சிறுமி பலி

by **KAPILS** Fri Oct 12, 2012 12:50 pm

தஞ்சை, நாகை மாவட்டத்தில் டெங்கு காய்ச்சல் வேகமாக பரவிவருகிறது.

நாகை அருகே உள்ள கீச்சாங்குப்பம், எம்.ஜி.ஆர். நகர், அக்கரைப்பேட்டை உள்பட பல்வேறு மீனவ கிராமங்களில் 100க்கும் மேற்பட்ட குழந்தைகள் டெங்கு காய்ச்சலால் பாதிக்கப்பட்டுள்ளனர். இதில் 10க்கும் மேற்பட்ட குழந்தைகள் பலியாகி உள்ளனர்.

பாதிக்கப்பட்ட குழந்தைகள் நாகை, தஞ்சை அரசு ஆஸ்பத்திரியில் அனுமதிக்கப்பட்டு சிகிச்சை பெற்று வருகின்றனர். சுகாதாரத்துறையும், மாவட்ட நிர்வாகமும் டெங்கு காய்ச்சலை கட்டுப்படுத்த தீவிர நடவடிக்கை எடுத்து வருகிறது.

நாகை மாவட்டத்தை தொடர்ந்து தஞ்சை மாவட்டத்திலும் டெங்கு காய்ச்சல் பரவ தொடங்கியுள்ளது.

தஞ்சை மாவட்டம் ஒரத்தநாடு அருகே உள்ள ஊரணிபுரத்தில் டெங்கு காய்ச்சலுக்கு 9-ம் வகுப்பு படிக்கும் 14 வயது சிறுவன் சபரி பலியானான். பட்டுக்கோட்டை அரசு ஆஸ்பத்திரியில் அனுமதிக்கப்பட்டு சிகிச்சை பலனின்றி பரிதாபமாக இறந்தான்.

இதனால் ஆத்திரமடைந்த பொதுமக்கள் மற்றும் மாணவ, மாணவிகள் சாலை மறியலில் ஈடுபட்டனர். இதனால் போக்குவரத்து பாதிக்கப்பட்டது.

ஊரணிபுரத்தில் டெங்கு காய்ச்சலுக்கு தற்போது மேலும் ஒரு சிறுமி பலியாகியுள்ளார். இதுபற்றிய விவரம் வருமாறு:-

ஒரத்தநாடு அடுத்த திருவோணம் பகுதி ஊரணிபுரத்தில் வசிப்பவர் வஹாப். இவரது மகள் ரிஷ்வானா (வயது7).

ரிஷ்வானா கடந்த சில நாட்களாக கடுமையான காய்ச்சலால் பாதிக்கப்பட்டிருந்தார். இதையொட்டி ஊரணிபுரம் ஆரம்ப சுகாதார நிலையத்தில் சிகிச்சை அளிக்கப்பட்டு மேல் சிகிச்சைக்காக பட்டுக்கோட்டை அரசு ஆஸ்பத்திரியில் அனுமதிப்பட்டாள்.

அங்கு ரிஷ்வானாவின் சளி, ரத்தத்தை பரிசோதித்த டாக்டர்கள் டெங்கு காய்ச்சலுக்கான அறிகுறி இருப்பதாக தெரிவித்தனர்.

இதையொட்டி அவளுக்கு தீவிர சிகிச்சை அளிக்கப்பட்டது. இந்த நிலையில் சிகிச்சை பலனளிக்காமல் ரிஷ்வானா இன்று காலை பரிதாபமாக இறந்தாள்.

இதுகுறித்து தகவல் அறிந்த ஒரத்தநாடு டி.எஸ்.பி. விவேகானந்தன், தாசில்தார் மோகன் மற்றும் வருவாய் துறை அதிகாரிகள் பலரும் முன்னெச்சரிக்கையாக ஊரணிபுரம் சென்று இறந்த குழந்தையின் குடும்பத்தினருக்கு ஆறுதல் கூறினார்கள்.

நேற்று மாணவன் ஒருவன் மர்ம காய்ச்சலால் பலியானதையொட்டி பொதுமக்கள் சாலை மறியலில் ஈடுபட்டனர். மேலும் இது போன்ற சம்பவங்கள் நடைபெறாமல் தடுக்க அங்கு போலீசார் குவிக்கப்பட்டுள்ளனர். ஊரணிபுரத்தில் அடுத்தடுத்து டெங்கு காய்ச்சலுக்கு 2 குழந்தைகள் பலியான சம்பவம் அந்த பகுதியில் பெரும் சோகத்தை ஏற்படுத்தியுள்ளது ஒரத்தநாடு அருகே டெங்கு காய்ச்சலுக்கு 7 வயது சிறுமி பலி 3c2d5235c8804f4cb971fa2

ஒரத்தநாடு அருகே டெங்கு காய்ச்சலுக்கு 7 வயது சிறுமி பலி 3c2d5235c8804f4cb971fa2