செம்மரக்கடத்தில் கைதான சென்னை சப்–இன்ஸ்பெக்டருக்கு ரூ.10 ஆயிரம் கோடி சொத்து

செம்மரக்கடத்தில் கைதான சென்னை சப்–இன்ஸ்பெக்டருக்கு ரூ.10 ஆயிரம் கோடி சொத்து

ஆந்திராவில் செம்மரக் கட்டைகளை வெட்டி கடத்திய கும்பலை பிடிக்க ஆந்திர போலீசார் நேற்று முன்தினம் அதிரடி சோதனை நடத்தினார்கள். செம்மரக்கட்டை கடத்தலில் கடந்த 11 ஆண்டுகளாக ஆந்திராவை கலங்கடித்து வந்த சென்னை துறைமுகத்தில் போலீஸ் சப்–இன்ஸ்பெக்டராக இருந்த மலியக்கல்மூசா என்பவரை ஆந்திர போலீசார் கைது செய்தனர்.

கடந்த 2003–ம் ஆண்டு முதல் செம்மரக் கடத்தலில் ஈடுபட்டு வரும் இவர் ஆந்திர மாநிலம் சித்தூர், நெல்லூர் ஆகிய பகுதிகள் வழியாக செம்மரங்களை கடத்தி வந்து சென்னை துறைமுகம் மூலமாக வெளிநாடுகளுக்கு கடத்தி வந்தார். சென்னையில் குடும்பத்துடன் தங்கி உள்ள இவரை ஆந்திர போலீசார் தேடி வந்தனர்.

இந்த நிலையில் செங்குன்றத்தில் தங்கியிருந்த அவரை தமிழக போலீஸ் உதவியுடன் ஆந்திர போலீசார் கைது செய்தனர்.

பின்னர் அவர் ஆந்திரா கொண்டு செல்லப்பட்டு கூடூர் கோர்ட்டில் நீதிபதி சாய்ராம் முன்னிலையில் ஆஜர்படுத்தப்பட்டார். அவரை 14 நாள் நீதிமன்ற காவலில் வைக்க நீதிபதி உத்தரவிட்டார்.

இதையடுத்து அவர் நெல்லூர் மாவட்ட சிறையில் அடைக்கப்பட்டார். கைதான மூசாவுக்கு ஆந்திர வனத்துறை போலீசார் ராஜமரியாதை அளித்தனர். அவரை குற்றவாளிபோல் கருதாமல் காரில் உட்கார வைத்து டிபன், டீ வாங்கி கொடுத்தனர். மேலும் செல்போன் வசதியும் செய்து கொடுத்தனர்.

போலீசார் முன்னிலையிலேயே அவர் செல்போனில் பலரிடம் பேசினார். பின்னர் அவர் சிறைக்கு கொண்டு செல்லப்பட்டார்.

கைதான மூசா மீது ஆந்திராவில் பல்வேறு வழக்குகள் உள்ளது. துறைமுகம் போலீஸ் சப்– இன்ஸ்பெக்டராக இருந்தபோது போலீசாரையே குற்றச் செயல்களில் ஈடுபட வைத்தார். இதன் காரணமாக அவர் போலீஸ் வேலையில் இருந்து நீக்கப்பட்டார்.

அதன் பின்னர்தான் ஆந்திரா சென்று செம்மரக் கடத்தலில் ஈடுபட்டார். துறைமுகத்தில் பணியாற்றியதால் அங்குள்ள அதிகாரிகள் துணையுடன் செம்மரங்களை வெளிநாடுகளுக்கு கடத்தி பலகோடிக்கு அதிபதியானார்.

அவருக்கு சென்னை உள்பட இந்தியாவின் பல நகரங்களில் ரூ.10 ஆயிரம் கோடிக்கு அதிகமான சொத்து உள்ளது தெரியவந்து உள்ளது. அவற்றை பறிமுதல் செய்யவும், முடக்கவும் ஆந்திர போலீசார் திட்ட மிட்டுள்ளனர்.
-மாலைமலர் -