சாமை சாம்பார் சாதம்

by **mmani** Fri Sep 19, 2014 7:30 am

சாமை சாம்பார் சாதம்

தேவையானவை: சாமை அரிசி 4 கப், பீன்ஸ், காரட் 250 கிராம், கத்திரிக்காய், தக்காளி தலா 50 கிராம், காய்ந்த மிளகாய் 8, துவரம் பருப்பு, உளுந்தம் பருப்பு தலா ஒரு கப், சின்ன வெங்காயம் 10, முருங்கைக்காய் 2, உப்பு, கடுகு, மஞ்சள்தூள், கொத்தமல்லித்தழை, கறிவேப்பிலை தேவையான அளவு, சாம்பார் பொடி, நெய், சீரகத்தூள், பெருங்காயத்தூள், நல்லெண்ணெய் சிறிதளவு.
சாமை சாம்பார் சாதம் 10523312_715871615170134_384372235313567214_n

செய்முறை: சாமை அரிசியை தண்ணீரில் கழுவி ஊறவைக்கவும். துவரம் பருப்பை மஞ்சள்தூள் சேர்த்துக் குழைய வேகவிடவும். கடாயில் எண்ணெய் விட்டு கடுகு, உளுந்தம் பருப்பு, காய்ந்த மிளகாய், கறிவேப்பிலை சேர்த்துப் பொரித்து, சின்ன வெங்காயம் சேர்த்து வதக்கி, காய்கறிகளை நறுக்கிச் சேர்க்கவும். காய்கள் நன்கு வெந்ததும், வேகவைத்த பருப்பைச் சேர்த்து, சிறிது புளிக் கரைசலை விட்டுக் கொதிக்கவிடவும். ஊறவைத்த சாமை அரிசியைக் கொட்டி உப்பு சேர்த்துக் கிளறவும். ஏழரை கப் தண்ணீர் சேர்த்து பெருங்காயத்தூள், சாம்பார் பொடி சேர்த்து நன்கு கிளறவும். அரிசி வெந்ததும், நெய் ஊற்றிக் கிளறிவிடவும். நறுக்கிய கொத்தமல்லித்தழை, சீரகத்தூள் தூவிப் பரிமாறவும்.

பலன்கள்: சாமை உடல் அசதி மற்றும் தளர்ச்சியைப் போக்கி சுறுசுறுப்பைத் தரும். எலும்புகளுக்கு ஊட்டம் அளிக்கும். தொடர்ந்து சாப்பிட்டால், முதுகெலும்பு பலப்படும். குறிப்பாக, இரு சக்கர வாகனங்களில் அடிக்கடி பயணம் செய்வதால் ஏற்படும் முதுகுவலி குறையும்.

by **logu** Fri Sep 19, 2014 7:18 pm

சாமை அரிசி - ஒரு கப்
துவரம் பருப்பு - அரை கப்
சின்ன வெங்காயம் - ஒரு கப்
கறிவேப்பிலை - 4 இணுக்கு
தக்காளி - 2
புளி - பெரிய நெல்லிக்காய் அளவு
தண்ணீர் - 3 கப்
உப்பு - தேவையான அளவு
அரைக்க:
பூண்டு - 4 பல்
இஞ்சி - ஒரு அங்குலத் துண்டு
சோம்பு - அரை தேக்கரண்டி
தனியா - 2 மேசைக்கரண்டி
சீரகம் - ஒரு தேக்கரண்டி
மஞ்சள் - சிறு துண்டு
வரமிளகாய் - 2
கறிவேப்பிலை - 2 இணுக்கு
தாளிக்க:
சீரகம் - ஒரு தேக்கரண்டி
கடுகு - ஒரு தேக்கரண்டி
எண்ணெய் - தாளிக்க
தேவையானவற்றைத் தயாராக எடுத்துக் கொள்ளவும். சின்ன வெங்காயம், பூண்டு, இஞ்சி ஆகியவற்றைத் தோலுரித்துக் கொள்ளவும். நான் மஞ்சள் பொடிக்கு பதிலாக பொங்கல் பானையில் வைத்த பச்சை மஞ்சள் உபயோகித்துள்ளேன். (பச்சை மஞ்சள் சேர்ப்பதாக இருந்தால் அதையும் தோலுரித்துக் கொள்ளவும்). இவற்றுடன் விருப்பமான காய்கறிகளையும் நறுக்கி எடுத்துக் கொள்ளவும்.
சாமை அரிசியை நன்றாகக் களைந்து கல் போக அரித்து எடுத்துக் கொள்ளவும். துவரம் பருப்பையும் நன்கு கழுவி அரிசியுடன் சேர்த்து தண்ணீர் ஊற்றி ஊறவைக்கவும். அரிசி ஊறவைத்த தண்ணீரில் சிறிதளவு எடுத்து அதில் புளியை ஊறவைத்து கரைத்துக் கொள்ளவும்
அரைக்கக் கொடுத்துள்ளவற்றை நைசாக அரைத்துக் கொள்ளவும்.
குக்கரில் எண்ணெய் ஊற்றி தாளிக்கக் கொடுத்துள்ளவற்றைத் தாளித்து, சின்ன வெங்காயம் மற்றும் கறிவேப்பிலை போட்டு வதக்கவும்.
வெங்காயம் வதங்கியதும் தக்காளியைச் சேர்த்து வதக்கவும்.தக்காளி குழைய வதங்கியதும் அரைத்து வைத்துள்ள விழுதைச் சேர்த்து பச்சை வாசனை போக வதக்கி, நறுக்கிய காய்கறிகளைச் சேர்த்து வதக்கவும். (நான் கேரட் மட்டும் சேர்த்துள்ளேன். முள்ளங்கி, முருங்கைக்காய், கத்தரிக்காய், பீன்ஸ் என எது வேண்டுமானாலும் சேர்க்கலாம்).
அதனுடன் புளித்தண்ணீரை வடிகட்டி ஊற்றவும். பிறகு ஊறவைத்த சாமை அரிசியையும், துவரம் பருப்பையும் தண்ணீருடன் சேர்க்கவும். தேவையான அளவு உப்பு சேர்த்து கொதிக்கவிடவும். நன்கு கொதி வந்தவுடன் நன்றாகக் கலந்து குக்கரை மூடி வேகவைக்கவும்.
4 விசில் வந்ததும் இறக்கிவிடவும். ஆவி வெளியேறியவுடன் நன்றாக கிளறிவிட்டு வேறு பாத்திரத்தில் எடுத்து வைக்கவும். மேலே தளதளவென்று நீர் அதிகமாக இருப்பது போல தெரியும். ஆனால், கிளறும்போது சரியாகிவிடும். இது சிறுதானியம் என்பதினால் எளிதில் அடிபிடிக்கும் தன்மையுடையது.
சுவையான சாமை சாம்பார் சாதம் தயார். குழந்தைகளுக்கு நெய் ஊற்றி கொடுத்தால் விரும்பி உண்பர்.
குறிப்பு :சாமை, வரகு, குதிரைவாலி மூன்றும் தானிய வகையைச் சேர்ந்தது. பார்பதற்கு ஒன்று போலவே தெரியும். சாமை அரிசியானது குதிரைவாலியை விட சிறியதாகவும், வரகினை விட பெரியதாகவும் இருக்கும்

சாமை சாம்பார் சாதம்

சாமை சாம்பார் சாதம்

சாமை சாம்பார் சாதம்

Re: சாமை சாம்பார் சாதம்