ஜெயலலிதா கோரிக்கை ஏற்பு: சொத்துக்குவிப்பு வழக்கின் தீர்ப்பு செப்.27ஆம் தேதிக்கு மாற்றம்!

பெங்களூரு: முதல்வர் ஜெயலலிதா மீதான சொத்துக் குவிப்பு வழக்கின் தீர்ப்பு செப்டம்பர் 27ஆம் தேதி வழங்கப்படும் என்று பெங்களூரு சிறப்பு நீதிமன்றம் அறிவித்துள்ளது.

தமிழக முதல்வர் ஜெயலலிதா, அவரது தோழி சசிகலா, சுதாகரன், இளவரசி ஆகியோர் மீதான சொத்து குவிப்பு வழக்கு பெங்களூரு சிறப்பு நீதிமன்றத்தில் நடைபெற்று வருகிறது. இந்த வழக்கில் இறுதி வாதம் நிறைவடைந்து 20ஆம் தீர்ப்பு வழங்கப்படும் என்று பெங்களூரு நீதிமன்றம் அறிவித்திருந்தது.

இந்நிலையில், தனக்கு அச்சுறுத்தல் இருப்பதால் நீதிமன்றத்தை பரப்பன அக்ரஹாராவுக்கு மாற்றக் கோரி முதல்வர் ஜெயலலிதா, பெங்களூரு நீதிமன்றத்தில் நேற்று மனு ஒன்றை தாக்கல் செய்தார்.

ஜெயலலிதா சார்பில் தாக்கல் செய்யப்பட்ட மனுவில், "சொத்து குவிப்பு வழக்கில் 20ஆம் தேதி தீர்ப்பு வழங்கப்படும் என்றும், வழக்கில் குற்றம் சாட்டப்பட்டு உள்ளவர்கள் நேரில் ஆஜராக வேண்டும் என்றும் நீதிமன்றம் உத்தரவிட்டுள்ளது. தமிழக முதல்வராக உள்ள ஜெயலலிதா ‘இசட்’ பிரிவு பாதுகாப்பில் உள்ளார். தற்போது வழக்கு நடைபெறும் சிறப்பு நீதிமன்றத்தில் போதிய பாதுகாப்பு வசதிகள் இல்லை. ஜெயலலிதா நேரில் வந்து வாக்குமூலம் அளித்தபோது உச்ச நீதிமன்றம் உத்தரவுப்படி பரப்பன அக்ரஹாராவுக்கு நீதிமன்றம் தற்காலிகமாக மாற்றப்பட்டது.

அதேபோல் தீர்ப்பு வழங்கப்படும் தினத்தன்று நீதிமன்றத்தை பரப்பன அக்ரஹாராவுக்கு மாற்ற வேண்டும். போதிய பாதுகாப்பு ஏற்பாடுகளை செய்யுமாறு கர்நாடக அரசுக்கு உத்தரவிட வேண்டும்" என்று கூறப்பட்டிருந்தது.

ஜெயலலிதா கோரிக்கை ஏற்பு: சொத்துக்குவிப்பு வழக்கின் தீர்ப்பு செப்.27ஆம் தேதிக்கு மாற்றம்!

இந்த மனுவை இன்று விசாரித்த நீதிபதி ஜான் மைக்கேல் குன்ஹா, ஜெயலலிதாவின் கோரிக்கையை ஏற்றுக் கொண்டார்.

பாதுகாப்பு கருதி பரப்பன அக்ரஹாரம் சிறை வளாக நீதிமன்றத்தில் தீர்ப்பு வழங்கப்படும் என்றும் செப்டம்பர் 20ஆம் தேதிக்கு பதில் 27ஆம் தேதிக்கு தீர்ப்பு வழங்கப்படும் என்றும் நீதிபதி உத்தரவிட்டார்.
இதற்கிடையே, ஜெயலலிதாவுக்கு பாதுகாப்பு வழங்க தயாராக உள்ளதாகவும், இந்தப் பணியில் 5 ஆயிரம் போலீசார் ஈடுபட இருப்பதாகவும், பெங்களூரு சிறப்பு நீதிமன்றத்தில் அம்மாநில காவல்துறை அபிடவிட் தாக்கல் செய்துள்ளது.