228 எம்.எல்.ஏ.க்கள் பதவியேற்றனர்: ஜெயலலிதா, விஜயகாந்த், ஸ்டாலின் பதவி ஏற்பு

by **அருள்** Tue May 24, 2011 9:26 am

சட்டப் பேரவை உறுப்பினராக உறுதிமொழி எடுத்துக் கொண்ட தமிழக முதல்வர் ஜெ.ஜெயலலிதா.

சென்னை, மே 23: முதல்வர் ஜெயலலிதா, தேமுதிக தலைவர் விஜயகாந்த், திமுக
பொருளாளர் மு.க.ஸ்டாலின் உட்பட 228 பேர் எம்.எல்.ஏ.க்களாக பதவியேற்றுக் கொண்டனர்.
முன்னாள் முதல்வர் கருணாநிதி, முன்னாள் அமைச்சர் துரைமுருகன், அமைச்சர் சிவபதி,
அதிமுக எம்.எல்.ஏ. ஒருவர் என 4 பேர் பேரவைக்கு வரவில்லை.
அவர்கள் வேறொரு நாளில் பேரவைத் தலைவரின் அறையில் பதவியேற்றுக் கொள்வார்கள் என
சட்டப் பேரவையின் தாற்காலிகத் தலைவர் செ.கு.தமிழரசன் தெரிவித்தார்.
14-வது சட்டப் பேரவையின் முதல் கூட்டம் திங்கள்கிழமை நண்பகல் 12.30 மணிக்குக்
கூடியது. கூட்டம் தொடங்குவதற்கு முன்பாகவே புதிதாகத் தேர்ந்தெடுக்கப்பட்ட அதிமுக
எம்.எல்.ஏ.க்கள் பேரவைக்கு வந்தனர். அவர்கள் ஆர்வத்துடன் பேரவை மண்டபத்தை பார்த்துக்
கொண்டிருந்தனர்.
காலை 11.30 மணிக்கு மார்க்சிஸ்ட் கம்யூனிஸ்ட் கட்சியைச் சேர்ந்தவர்களும்,
அவர்களைத் தொடர்ந்து சமத்துவ மக்கள் கட்சித் தலைவர் சரத்குமாரும் பேரவைக்கு வந்தனர்.
முதல்வர் வருகை: நண்பகல் 12 மணிக்குப் பிறகு அமைச்சர்கள் பேரவைக்கு வந்து
இருக்கைகளில் அமர்ந்தனர். அவர்களின் இருக்கைகளில் மட்டும் பெயர்கள் குறிப்பிடப்பட்டு
இருந்தன. இதனால், அவர்கள் இடம் தேடி அலையாமல் எளிதாக அமர முடிந்தது.
நண்பகல் 12.10 மணிக்கு தேமுதிக தலைவர் விஜயகாந்த் தனது கட்சியைச் சேர்ந்த 28
எம்.எல்.ஏ.க்களுடன் பேரவைக்குள் வந்தார். விஜயகாந்த், அந்தக் கட்சியின் அவைத் தலைவர்
பண்ருட்டி ராமச்சந்திரனைத் தவிர மற்ற எம்.எல்.ஏ.க்கள் தங்களது தோளில் தேமுதிக கொடி
நிறத்திலான துண்டுகளை அணிந்திருந்தனர். 2 பெண் எம்.எல்.ஏ.க்களும் துண்டு
அணிந்திருந்தனர்.
விஜயகாந்த் பேரவைக்குள் நுழைந்தபோது எதிர்க்கட்சி வரிசையின் முன் இருக்கைகள்
அனைத்தும் நிரம்பி இருந்தன. எங்கே உட்காருவது என நின்று கொண்டிருந்த விஜயகாந்த்,
பண்ருட்டி ராமச்சந்திரன் ஆகியோரை அழைத்து முதல் வரிசையில் இடம் கொடுத்தனர்,
மார்க்சிஸ்ட் கம்யூனிஸ்ட் கட்சியினர்.
நண்பகல் 12.24 மணிக்கு பேரவைக்குள் வந்தார், முதல்வர் ஜெயலலிதா. சரியாக 12.30
மணிக்கு பேரவையின் தாற்காலிகத் தலைவரான செ.கு.தமிழரசன் பேரவைக்கு வருகை தந்தார்.
இதைத் தொடர்ந்து பேரவை நடவடிக்கைகள் தொடங்கின.
228 பேர் பதவியேற்பு: பதவியேற்பு நிகழ்வு முதல்வர் ஜெயலலிதாவில் இருந்து
தொடங்கியது. முதலில் அவர் பதவியேற்றுக் கொண்டார். அப்போது, ஆளும்கட்சி,
எதிர்க்கட்சியைச் சேர்ந்த அனைவரும் எழுந்து நின்றனர். முதலில் எழுந்திருக்க தயக்கம்
காட்டிய தேமுதிகவினர், கட்சித் தலைவர் விஜயகாந்த் எழுந்தவுடன் அனைவரும் எழுந்து
நின்றனர். முதல்வரைத் தொடர்ந்து, நிதியமைச்சர் ஓ.பன்னீர் செல்வம், வேளாண் துறை
அமைச்சர் கே.ஏ.செங்கோட்டையன் உள்ளிட்ட 31 பேர் பதவியேற்றுக் கொண்டனர். நண்பகல்
12.45 மணிக்கு பேரவையில் இருந்து வெளியேறினார் ஜெயலலிதா. அவரைத் தொடர்ந்து ஓ.பன்னீர்
செல்வம், கே.ஏ.செங்கோட்டையன் ஆகியோரும் வெளியே சென்றனர்.
அமைச்சர்களைத் தொடர்ந்து, பேரவைக் குழுத் தலைவர்களான விஜயகாந்த் (தேமுதிக),
ஏ.சௌந்தரராஜன் (மார்க்சிஸ்ட்), ஆறுமுகம் (இந்திய கம்யூனிஸ்ட்), ஜெ.குரு (பாமக),
க.கிருஷ்ணசாமி (புதிய தமிழகம்), ஜவாஹிருல்லா (மனித நேய மக்கள் கட்சி), சரத்குமார் (சமத்துவ
மக்கள் கட்சி), பி.வி.கதிரவன் (பார்வர்டு பிளாக்) ஆகியோர் பதவியேற்றுக் கொண்டனர்.

முன்னாள் துணை முதல்வர் பங்கேற்பு: பேரவைக் குழுத் தலைவர்களைத் தொடர்ந்து,
முன்னாள் முதல்வர், முன்னாள் துணை முதல்வர் ஆகியோர் பதவியேற்றுக் கொள்வார்கள் என
தாற்காலிக பேரவைத் தலைவர் கூட்ட ஆரம்பித்திலேயே அறிவித்தார். முன்னாள் முதல்வர்
கருணாநிதி பேரவைக்கு வராத காரணத்தால், முன்னாள் துணை முதல்வர் மு.க.ஸ்டாலின்,
எம்.எல்.ஏ.வாக பதவியேற்றுக் கொண்டார். அதிமுக, தேமுதிகவைச் சேர்ந்த எம்.எல்.ஏ.க்கள்
அனைவரும் கடவுள் மீது ஆணையிட்டு உறுதி கூறுவதாகக் கூறினர். திமுக, மார்க்சிஸ்ட்,
இந்திய கம்யூனிஸ்ட், பாமக, புதிய தமிழகம் ஆகிய கட்சிகளைச் சேர்ந்தவர்கள் உளமார உறுதி
கூறி பதவியேற்றுக் கொண்டனர்.
பங்கேற்காத பிரமுகர்கள்: முன்னாள் முதல்வர் கருணாநிதி, முன்னாள் அமைச்சர்கள்
துரைமுருகன், இளைஞர் நலன்- விளையாட்டுத் துறை அமைச்சர் சிவபதி, திருச்சி கிழக்கு
தொகுதி எம்.எல்.ஏ. மனோகரன் ஆகியோர் எம்.எல்.ஏ.க்களாக பதவியேற்றுக் கொள்ள பேரவைக்கு
வரவில்லை. அமைச்சர் மரியம் பிச்சை விபத்தில் மரணம் அடைந்தார். மொத்தம் ஐந்து பேர்
பதவி ஏற்றுக் கொள்ளவில்லை. தாற்காலிகத் தலைவரான தமிழரசனுக்கு ஆளுநர் பர்னாலா
ஏற்கெனவே பதவிப் பிரமாணம் செய்து வைத்துள்ளது குறிப்பிடத்தக்கது. மொத்தம் 228 பேர்
எம்.எல்.ஏ.க்களாக பதவியேற்றுக் கொண்டனர்.