அனைத்து மாநகராட்சிகளிலும் போட்டியின்றி தேர்வு 10 துணை மேயர்கள் இன்று பதவியேற்றனர் : நகராட்சி, பேரூராட்சிகளிலும் துணை தலைவர்கள் பதவி ஏற்றனர்

by **ஜனனி** Sat Oct 29, 2011 4:39 pm

சென்னை : சென்னை உள்பட 10 மாநகராட்சிகளிலும் துணை மேயர்கள் போட்டியின்றி
தேர்வு செய்யப்பட்டனர். அவர்கள் இன்று காலை பதவி ஏற்றுக் கொண்டனர்.
நகராட்சி, பேரூராட்சிகளில் துணை தலைவர்களும் மாவட்ட பஞ்சாயத்து மற்றும்
ஒன்றியக்குழு தலைவர்களும் இன்று பதவியேற்றனர். தமிழகம் முழுவதும் கடந்த 17,
19 ஆகிய தேதிகளில் இரண்டு கட்டமாக உள்ளாட்சித் தேர்தல் நடத்தப்பட்டது.
தேர்தலில் வெற்றி பெற்ற மேயர்கள், நகராட்சி, பேரூராட்சி தலைவர்கள்,
கவுன்சிலர்கள் மற்றும் ஒன்றியக்குழு, மாவட்ட பஞ்சாயத்து கவுன்சிலர்கள்
கடந்த 25-ம் தேதி பதவியேற்றுக் கொண்டனர். இதைத்தொடர்ந்து துணை மேயர்,
நகராட்சி, பேரூராட்சி துணை தலைவர், மாவட்ட ஊராட்சி குழு தலைவர், ஊராட்சி
ஒன்றிய தலைவர், துணைத் தலைவர் ஆகிய 14,020 உள்ளாட்சி பதவிகளுக்கான மறைமுக
தேர்தல் இன்று நடந்தது. இந்த பதவிகளுக்கு போட்டியிடும் அதிமுக வேட்பாளர்
பட்டியலை முதல்வர் ஜெயலலிதா நேற்று வெளியிட்டார். சென்னை உள்பட 10
மாநகராட்சிகளிலும் அதிமுகவுக்கு பெரும்பான்மை பலம் இருப்பதால் துணை மேயர்
பதவிகளையும் அந்த கட்சியே கைப்பற்றியது. 10 துணை மேயர்களும் போட்டியின்றி
தேர்வு செய்யப்பட்டு பதவி ஏற்றனர். அதேபோல, 31 மாவட்ட ஊராட்சி குழு தலைவர்
பதவிகளையும் அதிமுகவினரே கைப்பற்றினர். 125 நகராட்சி, 529 பேரூராட்சிகளில்
நடந்த துணைத் தலைவர் தேர்தலிலும் பெரும்பாலான இடங்களில் அதிமுக
வேட்பாளர்கள் வெற்றி பெற்றுள்ளனர். சில இடங்களில் திமுகவினரும் துணை தலைவர்
பதவியை பிடித்துள்ளனர்.

ஊராட்சி ஒன்றிய துணை தலைவர் பதவிகளை
பிடிக்க அதிமுக, திமுகவினரிடையே கடும் போட்டி நிலவியது. சில இடங்களில்
சுயேச்சை வேட்பாளர்களின் ஆதரவுடன் துணை தலைவர் பதவிகளை கைப்பற்ற நடந்த
முயற்சியால் பதற்றமான சூழ்நிலை நிலவியது. அசம்பாவிதங்களை தவிர்க்க அந்த
பகுதிகளில் அதிகளவில் போலீசார் குவிக்கப்பட்டு இருந்தனர்.
ஆவடி நகராட்சி
துணைத் தலைவர் பதவியை திமுக கைப்பற்றியது. அங்கு திமுக சார்பில்
போட்டியிட்ட 40-வது வார்டு உறுப்பினர் கலைசேகர், 30 வாக்குகள் பெற்று
வெற்றி பெற்றார். இந்த நகராட்சியில் திமுகவுக்கு 17 உறுப்பினர்களே உள்ளனர்.
நாரவாரிகுப்பம் பேரூராட்சி துணைத் தலைவர் பதவியையும் திமுக கைப்பற்றியது.
திமுகவை சேர்ந்த ஆர்.இ.ஆர்.விப்ரநாராயணன், 18 வாக்குகள் பெற்று வெற்றி
பெற்றார். அவரை எதிர்த்து துணைத் தலைவருக்கு போட்டியிட்ட அதிமுகவை சேர்ந்த
ஜாகீர்உசேனுக்கு 11 வாக்குகள் கிடைத்தன.
சென்னை மாநகராட்சி துணை
மேயருக்கான மறைமுக தேர்தல் இன்று நடந்தது. இதற்காக மாநகராட்சி மன்ற கூட்டம்
காலை 9.30 மணிக்கு ரிப்பன் மாளிகையில் உள்ள மன்ற கூடத்தில் நடந்தது. மேயர்
சைதை துரைசாமி தலைமை தாங்கினார். மாநகராட்சி கமிஷனரும் மாவட்ட தேர்தல்
அதிகாரியுமான கார்த்திகேயன், ‘‘மாநில தேர்தல் கமிஷன் உத்தரவின்படி சென்னை
மாநகராட்சி துணை மேயருக்கான மறைமுக தேர்தல் இன்று நடத்தப்படுகிறது. அதற்கான
வேட்புமனுக்களை போட்டியிடுபவர்கள் சமர்ப்பிக்கலாம். காலை 9.42-க்குள்
மனுக்களை சமர்ப்பிக்க வேண்டும். அதைத்தொடர்ந்து 9.47 வரை மனுவை திரும்ப பெற
அவகாசம் வழங்கப்படும்Ó என்று அறிவித்தார். இதைத்தொடர்ந்து காலை 9.36
மணிக்கு அதிமுக வேட்பாளராக அறிவிக்கப்பட்ட 145-வது வார்டு உறுப்பினர்
பெஞ்சமின், வேட்புமனுவை கமிஷனரிடம் தாக்கல் செய்தார்.

“துணை மேயர்
பதவிக்கு 145-வது வார்டு உறுப்பினர் பெஞ்சமின் மட்டுமே மனு தாக்கல்
செய்துள்ளார். அவரது மனுவை 149-வது வார்டு உறுப்பினர் தாமோதரன்
முன்மொழிந்துள்ளார். அவரது மனு ஏற்கப்படுகிறது. வேறு யாரும் மனு
செய்யாததால் துணை மேயர் பதவிக்கு பெஞ்சமின் போட்டியின்றி
தேர்ந்தெடுக்கப்பட்டார்Ó என்று கமிஷனர் தெரிவித்தார். அப்போது அதிமுக
கவுன்சிலர்கள் வாழ்த்து கோஷங்களை எழுப்பினர். அதைத் தொடர்ந்து துணை மேயர்
பெஞ்சமினுக்கு மேயர் சைதை துரைசாமி வாழ்த்து தெரிவித்து, அவரது இருக்கையில்
அமர வைத்தார். கமிஷனர் கார்த்திகேயனும் துணை மேயருக்கு வாழ்த்து
தெரிவித்தார். அத்துடன் கூட்டம் முடிந்ததாக அறிவிக்கப்பட்டது. காலை 9.30
மணிக்கு துவங்கிய கூட்டம் 9.52 மணிக்கு முடிந்தது. இன்று நடந்த கூட்டத்தில்
திமுக, மதிமுக, தேமுதிக கவுன்சிலர்களும் பங்கேற்றனர். நில அபகரிப்பு
வழக்கில் கைது செய்யப்பட்டு சிறையில் இருக்கும் மாநகராட்சி 5-வது வார்டு
திமுக உறுப்பினர் கே.பி.சங்கர், கோர்ட் அனுமதி பெற்று மன்றத்துக்கு
வந்திருந்தார். அவருக்கு கமிஷனர் கார்த்திகேயன் பதவிப் பிரமாணம் செய்து
வைத்தார்.