மகளை கற்பழித்துக்கொன்றவருக்கு இரட்டை ஆயுளுடன் 27 ஆண்டுகள் ஜெயில்...

நாகர்கோவில், ஆக.8-

குமரி மாவட்டம் அருமனை அருகே உள்ள அம்பலக்கடையைச் சேர்ந்தவர் புரூஸ்வெல்ட் (வயது 48). முன்னாள் ராணுவ வீரர். இவருடைய முதல் மனைவி ஆஞ்சலின். இவர்களுக்கு ஷெர்லி ஜாஸ்மின் (17) என்ற ஒரே மகள் இருந்தாள். ஆஞ்சலின் ஏற்கனவே நோய்வாய்ப்பட்டு இறந்துவிட்டார். புரூஸ்வெல்ட் ராணுவத்தில் இருந்ததால் ஷெர்லி ஜாஸ்மின் தனது அத்தை வீட்டில் தங்கியிருந்து படித்துவந்தார்.

பின்னர் புரூஸ்வெல்ட் ராணுவ வேலையை விட்டுவிட்டு சொந்த ஊர் திரும்பியதும் ஐடா என்ற பெண்ணை 2-வதாக திருமணம் செய்தார். அவர்களுக்கு குழந்தை இல்லாததால், ஷெர்லி ஜாஸ்மினை தன்னுடன் அழைத்து வந்து படிக்கவைத்தார்.

அவர் பிளஸ்-1 முடித்து பிளஸ்-2 வகுப்பு செல்ல இருந்த நிலையில் ஷெர்லி ஜாஸ்மின் 29-5-2010 அன்று அவரது வீட்டில் உள்ள தண்ணீர் தொட்டியில் பிணமாக கிடந்தார். அவர் அணிந்திருந்த 6½ பவுன் நகைகள், ரூ.5 ஆயிரம் ஆகியவற்றை காணவில்லை. இதுதொடர்பாக புரூஸ்வெல்ட் அளித்த புகாரின் பேரில் போலீசார் வழக்குப்பதிவு செய்து விசாரணை நடத்தினர்.

ஷெர்லி ஜாஸ்மின் உடல் பிரேத பரிசோதனையில் அவர் 4 மாத கர்ப்பிணியாக இருந்தது கண்டுபிடிக்கப்பட்டது. அப்போது தான் இது நகைக்காக நடந்த கொலை அல்ல என தெரியவந்தது. இதனால் போலீசார் வியூகத்தை மாற்றி விசாரித்தபோது புரூஸ்வெல்ட் மீது சந்தேகம் வந்தது.

தீவிர விசாரணையில், ஷெர்லி ஜாஸ்மினை மகள் என்றும் பாராமல், புரூஸ்வெல்ட் கற்பழித்து கொலை செய்தது அம்பலமானது. புரூஸ்வெல்ட்டுக்கு நடத்தப்பட்ட டி.என்.ஏ. பரிசோதனையில் ஷெர்லி வயிற்றில் இருந்தது அவரால் உருவாக்கப்பட்ட கரு தான் என்பது உறுதியானது.

வீட்டில் ஷெர்லி ஜாஸ்மின் தனியாக இருக்கும்போதெல்லாம், 6 மாதமாக புரூஸ்வெல்ட் அவரை கற்பழித்து வந்தார். இதன்விளைவாக மகள் கர்ப்பமானதால் புரூஸ்வெல்ட் பதறினார். ஆனால் ஷெர்லிக்கு இதுபற்றி ஒன்றும் தெரியவில்லை. எனவே மகளுக்கு தெரியாமல் கருக்கலைப்பு மருந்து, மாத்திரைகளை வாங்கிக்கொடுத்து கருவை கலைக்க முயன்றார். ஆனாலும் கரு கலையாததால் இந்த விவரத்தை புரூஸ்வெல்ட் தனது மகளிடம் கூறினார்.

சம்பவத்தன்று புரூஸ்வெல்ட் தனது மனைவி ஐடாவை அவரது தாய் வீட்டில் விட்டுவிட்டு, வீட்டின் பின்பக்கம் வழியாக வீட்டுக்குள் சென்றார். ஷெர்லிக்கு 10 தூக்க மாத்திரைகளை குளிர்பானத்தில் கலந்து கொடுத்து, அவர் மயங்கியதும் குளியலறையில் இருந்த தண்ணீர் தொட்டிக்குள் அமுக்கி கொலை செய்தார். பின்னர் நகை, பணத்தை எடுத்து, வீட்டின் பின்புறம் உள்ள தோட்டத்தில் புதைத்துவைத்தார். திருட்டு நடந்ததாக நாடகம் ஆட வீட்டில் பொருட்களை சிதறிப்போட்டு, மிளகாய் பொடியையும் தூவினார்.

புரூஸ்வெல்ட்டை போலீசார் கைது செய்து, வழக்கு பதிவு செய்தனர். நாகர்கோவிலில் மகளிர் கோர்ட்டு தொடங்கப்பட்டதைத் தொடர்ந்து இந்த வழக்கு விரைவு மகளிர் கோர்ட்டுக்கு மாற்றப்பட்டு, நீதிபதி ஏ.முத்துசாரதா இந்த வழக்கை விசாரித்து வந்தார்.

நேற்று மாலை இந்த வழக்கில் தீர்ப்பு வழங்கப்பட்டது. அப்போது, "புரூஸ்வெல்ட்டுக்கு இரட்டை ஆயுள் தண்டனையும், 27 ஆண்டுகள் ஜெயில் தண்டனையும், ரூ.1 லட்சத்து 25 ஆயிரம் அபராதமும் விதித்து, இந்த தண்டனைகளை ஒன்றன்பின் ஒன்றாக அனுபவிக்க வேண்டும்" என்று நீதிபதி முத்துசாரதா தீர்ப்பு வழங்கினார்.