இரட்டை வருவாய்! வைப்புத் தொகையுடன் உறுப்பினர் அட்டை திட்டம்: இரட்டை வருவாய் குவிக்கப் போகும் "எலைட் ஷாப்'

அரசுக்கு இரட்டை வருவாய் கிடைக்கும் வகையில், "எலைட் ஷாப்' மதுக்கடைகள் அமையவுள்ளன. தற்போது, மாநில அளவில், 6,696 டாஸ்மாக் கடையும், 6,300 கடைகளில் பார் வசதியும் உள்ளன. விலை உயர்ந்த சரக்குகளை வாங்குவோரை திருப்திப்படுத்த, அரசு மூலம், 57 இடங்களில், "எலைட் ஷாப்' திறக்க நடவடிக்கை எடுக்கப்படுகிறது. இங்கு, அமர்ந்து குடித்துச் செல்ல வசதி இல்லாவிட்டாலும், குறைந்த விலையில் உள்ள சாதாரண சரக்குகள் தவிர, உயர்ந்த விலையில் உள்ள அனைத்து ரக சரக்குகளும் கிடைக்க வழி செய்யப்பட்டுள்ளது.

ஸ்காட்ச், கிரீன் லேபிள், பிளாக் டாக், 1,000 பைப்ஸ், டீச்சர்ஸ், பிரிட்டிஷ் எம்பயர், பிளாக் சாயிட்ஸ் போன்ற ரகங்களும், பல்வேறு நாடுகளில் இருந்து இந்திய மக்களின் ரசனைக்கேற்ற புதிய ரக சரக்குகளும் வாங்கி, விற்க திட்டமிடப்பட்டுள்ளது. ஸ்டார் ஓட்டல்கள், பெரிய தங்கும் விடுதியுடன் கூடிய பார்களில்பாட்டில்களாக விற்கும் எண்ணிக்கையை விட, லார்ஜ், ஸ்மால் போன்ற அளவீடுகளில், "சைடு டிஷ்' உடன் சரக்கு விற்பனை செய்யப்படுகிறது. இவற்றின் விலை மிக அதிகம் என்பதால், தங்களுக்கு தேவையான சரக்குகளை, சென்னை பர்மா பஜார் மற்றும் வெளிநாட்டு பொருட்கள் விற்போரிடம் இருந்து, தொகை கூடுதலாக வழங்கி, வாங்கிக் குடிப்பதை பலரும் விரும்புகின்றனர். இது போன்றவர்களை கவர, "எலைட் ஷாப்' வடிவமைக்கப்படுகிறது. இங்கு, ஒரு லிட்டர் அல்லது ஒரு புல் பாட்டில் குறைந்தபட்சம், 1,500 முதல், 2,000 ரூபாய்க்கு மேல் இருக்கும். இக்கடைகள் மூலம், ஆண்டுக்கு, 2,000 கோடி ரூபாய் வருவாய் கிடைக்கும்.

தனியார் ஓட்டல்களில் உள்ள பெரிய கிளப் மற்றும் பார்களில், குறிப்பிட்ட தொகையை செலுத்தி உறுப்பினரானால் மட்டுமே, அந்த பார்களில் அமர்ந்து குடிக்க இயலும். அதிலும், ஒரு நபர் அனுமதி, ஐந்து நபர், 10 நபர் அனுமதி என, அதற்கான தொகை செலுத்தி, அதற்கான எண்ணுடன் கூடிய பாஸ் பெற வேண்டும். அதுபோன்றநடைமுறையை, இங்கும் பின்பற்ற திட்டமிட்டுள்ளனர். உறுப்பினர்கள் மட்டுமே சரக்கு வாங்க முடியும் என்பதால், பலரும் முன்கூட்டியே பணம் செலுத்தி உறுப்பினராக முயல்வர். உறுப்பினர் சேர்க்கை மூலம், அரசுக்கு நிரந்தரமாக ஒரு தொகை கிடைக்கும். இவ்வாறு, மது விற்பனை மற்றும் உறுப்பினர் சேர்க்கை வைப்புத் தொகை மூலம், அரசுக்கு இரட்டை வருவாய் கிடைக்கும். இத்திட்ட அறிவிப்பு விரைவில் வெளியாக உள்ளது.