மூளைச்சாவு: இளைஞரின் 7 உடலுறுப்புகள் தானம்

மூளைச்சாவு: இளைஞரின் 7 உடலுறுப்புகள் தானம்
விபத்தில் படுகாயமடைந்து மூளைசாவு ஏற்பட்ட இளைஞரின் ஏழு உடல் உறுப்புகள் நான்கு மருத்துவமனைகளுக்கு திங்கள்கிழமை (ஜூன் 16) தானமாக அளிக்கப்பட்டன.

காஞ்சிபுரம் மதுராந்தகம் பழையனூரைச் சேர்ந்தவர் லோகநாதன் (27). இவர் கடந்த 11-ஆம் தேதி சாலை விபத்தில் சிக்கி படுகாயத்துடன் செங்கல்பட்டு அரசு மருத்துவமனையில் சிகிச்சைக்காக அனுமதிக்கப்பட்டார். பின்னர் மேல்சிகிச்சைக்காக சென்னை ராஜீவ்காந்தி அரசு பொது மருத்துவமனையில் 12-ஆம் தேதி அனுமதிக்கப்பட்டார். இந்நிலையில் திங்கள்கிழமை காலையில் அவர் மூளைச்சாவு அடைந்ததை மருத்துவர்கள் உறுதி செய்தனர்.

லோகநாதனின் உடல் உறுப்புகளை தானமாக அளிக்க அவரின் தாய் முன்வந்தார். அதனைத் தொடர்ந்து தமிழ்நாடு உடலுறுப்பு மாற்று அறுவைச் சிகிச்சைச் திட்டத்தின் மூலம் யாருக்கெல்லாம் மாற்று அறுவைச் சிகிச்சைக்காக உடல் உறுப்பு தேவைப்படுகிறது என்றும், லோகநாதனின் உடல் உறுப்புகள் யாருக்கு பொருத்த முடியும் என்பது குறித்து ஆராயப்பட்டது.

தொடர்ந்து மதியம் 2 மணியளவில் உடல் உறுப்புகளை உடலில் இருந்து பிரித்தெடுக்கும் அறுவைச் சிகிச்சை தொடங்கியது.

இது குறித்து தமிழ்நாடு அரசின் உடலுறுப்பு மாற்று அறுவைச்சிகிச்சை திட்டத்தின் ஒருங்கிணைப்பாளர் டாக்டர் அமலோற்பவநாதன் கூறியது:

நோயாளியின் இதயம், சிறுநீரகங்கள், கல்லீரல், கண்கள் மற்றும் தோல் ஆகிய உறுப்புகள் பிரித்தெடுக்கப்பட்டன. இதயம் மற்றும் சிறுநீரகங்கள் சென்னை அடையாறில் உள்ள தனியார் மருத்துவமனைக்கும், கல்லீரல் வேலூர் சிஎம்சி மருத்துவமனைக்கும், கண்கள் சென்னை எழும்பூர் அரசு கண் மருத்துவமனைக்கும், தோல் சென்னை கீழ்ப்பாக்கத்தில் உள்ள தனியார் மருத்துவமனைக்கும் தானமாகக் கொடுக்கப்பட்டன என்றார் அவர்.

இதய மாற்று அறுவைச் சிகிச்சை: மும்பையைச் சேர்ந்த முன்னாள் ராணுவ வீரரின் மகள் ஹவோவி (21). கல்லூரியில் படித்து வந்த இவருக்கு, கடந்த நான்கு ஆண்டுகளாக இதயத்தில் பாதிப்பு இருந்துள்ளது. அமெரிக்காவுக்கு சிகிச்சைக்காக அழைத்துச் சென்றும் அங்கு இதயம் தானமாகப் பெற முடியவில்லை. இந்நிலையில் சென்னையில் உள்ள தனியார் மருத்துவமனையில் கடந்த ஒரு மாதமாக சிகிச்சை பெற்று வருகிறார் என்று கூறப்படுகிறது.

இவருக்கு லோகநாதனின் இதயம் அறுவைச் சிகிச்சை மூலம் பொருத்தப்பட்டது.

13 நிமிடத்தில் சென்ற இதயம்
தானம் மூலம் பெறப்பட்ட இதயம், சென்னை ராஜீவ்காந்தி அரசு பொது மருத்துவமனையில் இருந்து அடையாறில் உள்ள தனியார் மருத்துவமனைக்கு திங்கள்கிழமை (ஜூன் 16) 13 நிமிடம் 12 விநாடிகளில் கொண்டு செல்லப்பட்டது. சென்னை ராஜீவ்காந்தி அரசு மருத்துவமனையில் இருந்து மாலை 6.45 மணிக்கு காவல்துறை வாகனப் பாதுகாப்புடன் தனியார் மருத்துவமனையின் ஆம்புலன்ஸ் வாகனம் புறப்பட்டது. மெரீனா கடற்கரை சாலை, சாந்தோம் வழியாக ஆம்புலன்ஸ் வாகனம் அடையாறு தனியார் மருத்துவமனையை சென்றடைந்தது. வழியில், 11 போக்குவரத்து சிக்னல்களையும் 13 நிமிடம் 12 வினாடிகளில் ஆம்புலன்ஸ் வாகனம் கடந்து மருத்துவமனையை அடைந்தது.

போக்குவரத்துத் துறை துணை ஆணையர் சிவானந்தத்தின் தலைமையில் 2 உதவி ஆணையர்கள், 5 காவல்துறை ஆய்வாளர்கள், 12 உதவி ஆய்வாளர்கள் உள்பட மொத்தம் 60 போலீஸார் ஆம்புலன்ஸ் வாகனம் விரைவாகச் சென்றடைய ஏதுவாக போக்குவரத்தை ஒழுங்குபடுத்தினர். வழியில் எந்தத் தடங்கலும் ஏற்படாத வண்ணம் போக்குவரத்தை ஒழுங்குபடுத்த க்ரீன் காரிடார் முறை செயல்படுத்தப்பட்டது.

என் மகனை உலகம் வாழ்த்த வேண்டும்!
உடலுறுப்புகளை தானமாகக் கொடுத்த என் மகனை உலகம் வாழ்த்த வேண்டும் என லோகநாதனின் தாயார் ராஜலெட்சுமி கூறினார். வந்தவாசி அருகில் உள்ள ஓசூர் என்ற இடத்தில் ஆரம்ப சுகாதார நிலையத்தில் கிராம சுகாதார செவிலியராகப் பணியாற்றி வரும் ராஜலெட்சுமிக்கு லோகநாதன் ஒரே மகன். பொறியியல் டிப்ளமோ படித்து முடித்திருந்த இவர், இப்போதுதான் சிறிது நாள்களாக சென்னையில் ஒரு தனியார் நிறுவனத்தில் ஓட்டுநராகப் பணியாற்றி வந்தார் எனக் கூறப்படுகிறது. உறவினர் வீட்டு துக்க நிகழ்வில் பங்கேற்க சொந்த ஊருக்குச் சென்றபோது சாலை விபத்தில் சிக்கியதாக அவரின் உறவினர்கள் தெரிவித்தனர். இது குறித்து தாயார் ராஜலெட்சுமி கூறியது:

எந்தவித ஆதரவும் இல்லாமல் தனியாளாக இருந்து என் மகனை வளர்த்தேன். அவன் என்னை வைத்துக் காப்பாற்றுவேன் என்று நினைத்தேன். நான் வளர்த்த வளர்ப்பு வீணாகக் கூடாது என்ற காரணத்தினால், என் மகனின் உடலுறுப்புகளை தானம் கொடுக்கச் சம்மதித்தேன். தன் உடலுறுப்புகளை தானமளித்து பலரின் வாழ்வில் ஒளியேற்றிய அவனை உலகம் வாழ்த்த வேண்டும். அதுதான் எனக்கு வேண்டும் என்றார் அவர்.

நன்றி: தினமணி

மனதை கலங்க வைக்கிறது