விபத்தில் மூளைச்சாவு அடைந்த இளம்பெண் உறுப்புகள் தானம் 6 பேருக்கு புது வாழ்வு:

சென்னை: சென்னை பாடி பகுதியை சேர்ந்தவர் எப்சிபா (22). தனியார்  நிறுவனம் ஒன்றில் பணியாற்றி வந்தார். கடந்த 17ம் தேதி  அசோக்பில்லர் அருகில் இருசக்கர வாகனத்தில் சென்று கொண்டிருந்த  போது ஏற்பட்ட விபத்தில் அவருக்கு தலையில் பலத்த காயம் ஏற்பட்டது.  அக்கம்பக்கத்தினர் அவரை மீட்டு அருகில் உள்ள மருத்துவமனையில்  சேர்த்தனர்.  பின்னர், மேல் சிகிச்சைக்காக அவர் ராமாபுரத்தில் உள்ள  மியாட் மருத்துவமனையில் சேர்க்கப் பட்டார். அங்கு அவருக்கு தீவிர  சிகிச்சை அளிக்கப்பட்டது. எனினும், அவர் கோமா நிலைக்கு சென்றார்.  அவருக்கு மூளைசாவு ஏற்பட்டு விட்டதாக அவரது உறவினர்களிடம்  தகவல் தெரிவிக்கப்பட்டது. அவர்கள், எப்சிபாவின் உடல் உறுப்பு களை  தானம் செய்ய முன்வந்தனர். இதனை தொடர்ந்து, சென்னை நகரில்  உடல் உறுப்பு தானம் எதிர்பார்த்திருக்கும் நோயாளிகளின் பட்டியல்  பெறப்பட்டது. அதில், முகப்பேரில் உள்ள தனியார் மருத்துவமனையில்  இதயத்திற்காக நோயாளி ஒருவர் காத்திருந்தது தெரிய வந்தது.  இதை  தொடர்ந்து, மியாட் மருத்துவமனை மருத்துவர்கள் மற்றும் அந்த  தனியார் மருத்துவமனை மருத்துவர்கள் இணைந்து எப்சிபாவின் உடல்  உறுப்புகளை பிரித்தெடுக்கும் அறுவை சிகிச்சையில் ஈடுபட்டனர். இதில்,  எப்சிபாவின் உடலில் இருந்து இதயம், 2 சிறுநீரகங்கள், கல்லீரல்,  கண்கள் ஆகியவை பிரித்தெடுக்கப்பட்டன. இதற்கிடையே, இதயத்தை  விரைவாக கொண்டு செல்வ தற்காக சென்னை மாநகர போலீசாரின்  உதவி கோரப்பட்டது.

இதனை தொடர்ந்து, ராமாபுரம் மியாட் மருத்துவமனை முதல் முகப்பேர்  தனியார் மருத்துவமனை வரை 17 கிமீ தூரத்துக்கு போக்குவரத்தை  நிறுத்தி வழி ஏற்படுத்த போலீசார் நிறுத்தப்பட்டனர். போக்குவரத்து  போலீசார், போக்குவரத்து நெரிசல் ஏற்படாதபடி அதற்கான பணிகளை  செய்தனர். இந்த பணிகளில் 100க்கும் மேற்பட்ட போலீ சார் ஈடுபட்டனர்.  இதனை தொ டர்ந்து, எப்சிபாவின் இதயம் ஆம்புலன்ஸ் மூலம் முகப்பேர்  தனியார் மருத்துவமனைக்கு கொண்டு செல்லப்பட்டது. ஆம்புலன்சை  டிரைவர் சீனிவாசன் ஓட்டினார். ராமாபுரம் மியாட் மருத்துவமனை முதல்  முகப்பேர் தனியார் மருத்துவமனை இடைப்பட்ட 17 கிமீ தூரத்தை 8  நிமிடத்தில் மின்னல் வேகத்தில் கடந்த ஆம்புலன்ஸ், முகப்பேர்  தனியார் மருத்துவமனைக்கு வந்தது. அங்கு தயாராக காத்திருந்த  மருத்துவர் குழு நோயாளிக்கு இதயத்தை பொருத்தினர். மேலும்,  எப்சிபாவின் ஒரு சிறுநீரகமும், கல்லீரலும், மியாட் மருத்துவமனை  நோயாளிகள் 2 பேருக்கு பொருத்தப்பட்டது. மற்றொரு சிறுநீரகம், அரசு  மருத்துவமனை நோயாளி ஒருவருக்கு வழங்கப்பட்டது. இரண்டு  கண்களும் சங்கரநேத்ராலயா மருத்துவமனையிடம் வழங்கப்பட்டது.

எப்சிபாவின் உடல் உறுப்புகள் தானம் அளிக்கப்பட்டதன் மூலம் 6 பேர்  புதுவாழ்வு பெற்றுள்ளனர். இது குறித்து ஆம்புலன்ஸ் டிரைவர்  ஸ்ரீனிவாசன் கூறுகையில், மொத்தம் 17 கிமீ தூரம். போக்குவரத்து  நெரிசலான பகுதி. போலீசார் போக்குவரத்தை ஒழுங்குபடுத்தி வழி  அமைத்து கொடுத்தனர். அதனால் எளிதாக 8 நிமிடத்தில் இந்த  இடத்தை கடக்க முடிந்தது என்றார். எப்சிபாவின் உறவினவர் ஒருவர்  கூறுகையில், எப்சிபா விபத்தில் தலையில் பலத்த காயமடைந்து  மருத்துவமனையில் சிகிச்சை பெற்று வந்தார். எனினும், அவருக்கு  மூளை சாவு ஏற்பட்டுவிட்டதாக டாக்டர்கள் கூறினர். இதனை தொடர்ந்து  அவரது உறுப்புகளை தானம் செய்ய முடிவு செய்தோம். அவரது  உறுப்புகள் மூலம் 6 பேர் புதுவாழ்வு பெற்றுள்ளனர் என்றார்.