புஜாரா சதம்: மீண்டது இந்தியா: சுழலில் பனேசர் அசத்தல்

மும்பை: மும்பை
டெஸ்டில் புஜாரா சதம் அடிக்க, இந்திய அணி மிகப் பெரும் சரிவில் இருந்து
மீண்டது. இங்கிலாந்து சார்பில் "சுழலில்' அசத்திய மான்டி பனேசர் நான்கு
விக்கெட் வீழ்த்தினார்.
இந்தியா, இங்கிலாந்து அணிகள் நான்கு
போட்டிகள் கொண்ட டெஸ்ட் தொடரில் பங்கேற்கின்றன. முதல் டெஸ்டில் இந்தியா
வென்றது. இரண்டாவது டெஸ்ட், மும்பையில் நேற்று துவங்கியது. "டாஸ்' வென்ற
இந்திய கேப்டன் தோனி "பேட்டிங்' தேர்வு செய்தார்.
ஹர்பஜன் வாய்ப்பு: இந்திய
அணியில் காயம் காரணமாக உமேஷ் யாதவ் பங்கேற்கவில்லை. மூன்றாவது
சுழற்பந்துவீச்சாளராக நீண்ட இடைவேளைக்கு பின் ஹர்பஜன் சிங் இடம்
பிடித்தார். இங்கிலாந்து அணியில், பெல் தாயகம் திரும்பியதால் பேர்ஸ்டோவ்
இடம் பிடித்தார். பிரஸ்னனுக்கு பதிலாக சுழற்பந்துவீச்சாளர் மான்டி பனேசர்
வாய்ப்பு பெற்றார்.
சேவக் ஏமாற்றம்: இந்திய அணிக்கு
சேவக், காம்பிர் ஜோடி சொதப்பல் துவக்கம் கொடுத்தது. ஆண்டர்சன் வீசிய
போட்டியின் முதல் பந்தில், பவுண்டரி அடித்த காம்பிர்(4), அடுத்த பந்தில்
அவுட்டானார். 100வது டெஸ்டில் களமிறங்கிய சேவக் (30) அதிக நேரம்
நீடிக்கவில்லை. இவர், பனேசர் "சுழலில்' போல்டானார். தொடர்ந்து மிரட்டிய
பனேசர் பந்தில் சச்சினும் (8) போல்டானார்.
"சுழல்' ஜாலம்: பின்
வந்த கோஹ்லியும் (19), பனேசர் வலையில் சிக்கினார். சுவான் "சுழலில்'
யுவராஜ்(0) போல்டானார். அப்போது இந்திய அணி 5 விக்கெட்டுக்கு 119 ரன்கள்
எடுத்து தத்தளித்தது.
பின் புஜாரா, கேப்டன் தோனி சேர்ந்து
போராடினர். இந்த நேரத்தில் மீண்டும் பந்துவீச வந்த பனேசர் இம்முறை தோனியை
(29) வெளியேற்றினார். அடுத்து வந்த அஷ்வின் ஒத்துழைக்க, புஜாரா தனது
அசத்தல் ஆட்டத்தை தொடர்ந்தார். இருவரும் சேர்ந்து அணியை சரிவிலிருந்து
மீட்டனர். தூணாக நின்று விளையாடிய புஜாரா, டெஸ்ட் அரங்கில் தனது மூன்றாவது
சதத்தை பதிவு செய்தார்.
அஷ்வின் அரைசதம்: அதிரடியாக ஆடிய
அஷ்வின், பிராட் ஓவரில் அடுத்தடுத்து இரண்டு பவுண்டரி அடித்தார்.
தொடர்ந்து ஆண்டர்சன் ஓவரில் மூன்று பவுண்டரிகள் விளாசினார். மீண்டும்
பிராட் பந்தை பவுண்டரிக்கு விரட்டிய அஷ்வின், டெஸ்ட் அரங்கில் தனது
இரண்டாவது அரைசதம் கடந்தார். புஜாராவுடன் சேர்ந்து ஏழாவது விக்கெட்டுக்கு
97 ரன்கள் சேர்த்தார்.
முதல் நாள் ஆட்டநேர முடிவில், இந்திய அணி
முதல் இன்னிங்சில் 6 விக்கெட்டுக்கு 266 ரன்கள் எடுத்தது. புஜாரா(114),
அஷ்வின் (60) அவுட்டாகாமல் இருந்தனர்.
இன்று புஜாரா தனது ரன்வேட்டையை தொடரும்பட்சத்தில், இந்திய அணி நல்ல இலக்கை எட்டலாம்.


பத்தாண்டுக்கு பின்...
இந்திய
ஆடுகளங்களில் "சுழல்' தான் கைகொடுக்கும் என்பதால், இரு அணிகளும் போட்டி
போட்டுக் கொண்டு சுழற்பந்துவீச்சாளர்களை களமிறக்கின. இங்கிலாந்து அணியில் 6
ஆண்டுகளுக்கு பின் மூன்று சுழற்பந்து வீச்சாளர்கள் (மான்டி பனேசர்,
சுவான், சமித் படேல்) இடம் பெற்றனர்.
இதே போல் இந்திய அணியிலும்
10 ஆண்டுகளுக்கு பின் மூன்று சுழற்பந்து வீச்சாளர்களுடன் (அஷ்வின்,
ஹர்பஜன் சிங், ஓஜா)களமிறங்கியது. இதற்கு முன் கடந்த 2001ல் இங்கிலாந்துக்கு
எதிராக பெங்களூருவில் நடந்த போட்டியில் மூன்று சுழற்பந்துவீச்சாளர்களுடன்
களமிறங்கியது.


11வது வீரர்
நேற்றைய
போட்டியில் சதம் அடித்த புஜாரா, இங்கிலாந்து அணிக்கு எதிரான ஒரே டெஸ்ட்
தொடரில் இரண்டு சதம் அடித்த 11வது இந்திய வீரர் என்ற பெருமை பெற்றார்.
முன்னதாக விஜய் ஹசாரே (1951), பங்கஜ் ராய் (1951), புதி குன்தேரன் (1964),
குண்டப்பா விஸ்வநாத் (1981), ரவி சாஸ்திரி (1984, 1990), முகமது அசார்
(1984, 1990), திலீப் வெங்சர்க்கார் (1986), சச்சின் (1996), கங்குலி
(1996), டிராவிட் (2002, 2011) ஆகியோர் இச்சாதனை படைத்திருந்தனர்.


*
நேற்று புஜாரா 60 ரன்கள் எடுத்த போது, பனேசர் பந்தில் "சிலிப்' பகுதியில்
கொடுத்த கடினமான "கேட்ச்சை' ஆண்டர்சன் கோட்டைவிட்டார். பின், 94 ரன்களில்
சுவான் பந்தில் பிடிபட்டார். ஆனால், "ரீப்ளேயில்' பந்து தரையில் பட்டு,
பின் "மிட்' விக்கெட் பகுதியில் நின்ற பீல்டரின் கால் நுனியில் விழுந்து
சென்றது நன்றாகத் தெரிந்தது. இப்படி இரு முறை கண்டம் தப்பிய புஜாரா,
மீண்டும் சதம் அடித்து அவுட்டாகாமல் உள்ளார்.


இரண்டாவது அரைசதம்
நேற்று
பொறுப்பாக ஆடிய தமிழக வீரர் அஷ்வின், டெஸ்ட் அரங்கில் 2வது முறையாக
அரைசதம் அடித்தார். முன்னதாக இந்த ஆண்டு சிட்னியில் நடந்த
ஆஸ்திரேலியாவுக்கு எதிரான டெஸ்டில் 62 ரன்கள் எடுத்தார். இவர், ஒரே ஒரு
சதம் அடித்துள்ளார். கடந்த ஆண்டு மும்பையில் நடந்த வெஸ்ட் இண்டீசுக்கு
எதிரான டெஸ்டில் சதம் (103) அடித்தார்.