லட்சுமண், தோனி அசத்தல் சதம்! *வலுவான நிலையில் இந்தியா *வெ.இண்டீஸ் ஏமாற்றம்

by **ஜனனி** Wed Nov 16, 2011 7:41 am

கோல்கட்டா:
வெஸ்ட் இண்டீசுக்கு எதிரான இரண்டாவது டெஸ்டில் லட்சுமண், கேப்டன் தோனி
சதம் அடிக்க, இந்திய அணி வலுவான நிலையில் உள்ளது. பவுலிங், பேட்டிங்கில்
வெஸ்ட் இண்டீஸ் அணி ஏமாற்றம் அளித்தது.
இந்தியா வந்துள்ள வெஸ்ட் இண்டீஸ்
அணி, மூன்று போட்டிகள் கொண்ட டெஸ்ட் தொடரில் பங்கேற்கிறது. டில்லியில்
நடந்த முதல் டெஸ்டில் வெற்றி கண்ட இந்திய அணி 1-0 என முன்னிலை வகிக்கிறது.
இரண்டாவது டெஸ்ட், கோல்கட்டாவில் உள்ள ஈடன் கார்டன் மைதானத்தில் நடக்கிறது.
டிராவிட்
(119) சதம் அடித்து கைகொடுக்க, முதல் நாள் ஆட்டநேர முடிவில் இந்திய அணி
முதல் இன்னிங்சில் 5 விக்கெட்டுக்கு 346 ரன்கள் எடுத்திருந்தது. லட்சுமண்
(73) அவுட்டாகாமல் இருந்தனர்.
லட்சுமண் அபாரம்:
நேற்று
இரண்டாம் நாள் ஆட்டம் நடந்தது. முதல் இன்னிங்சை தொடர்ந்த இந்திய அணிக்கு
யுவராஜ் சிங் (25) ஏமாற்றினார். அடுத்து வந்த கேப்டன் தோனியுடன் இணைந்த
லட்சுமண், அனுபவ ஆட்டத்தை வெளிப்படுத்தினார். டேரன் சமி பந்தில் ஒரு
சூப்பர் பவுண்டரி அடித்த லட்சுமண், டெஸ்ட் அரங்கில் தனது 17வது சதத்தை
பதிவு செய்தார்.
தோனி அசத்தல்:
மறுமுனையில்
அபாரமாக ஆடிய கேப்டன் தோனி, டேரன் சமி, சாமுவேல்ஸ் பந்தில் தலா ஒரு
சிக்சர் அடித்தார். வெஸ்ட் இண்டீஸ் பந்துவீச்சை எளிதாக சமாளித்த இவர்,
டெஸ்ட் அரங்கில் தனது 5வது சதத்தை பூர்த்தி செய்தார். சதம் அடித்தபின்
அதிரடி ஆட்டத்துக்கு மாறிய தோனி, பிராத்வைட், கீமர் ரோச் பந்தையும்
விட்டுவைக்கவில்லை. இவர், 181 பந்தில் 144 ரன்கள் (5 சிக்சர், 10 பவுண்டரி)
எடுத்து அவுட்டானார். இவருக்கு ஒத்துழைப்பு தந்த லட்சுமண், 150 ரன்னை
கடந்தார்.
இமாலய இலக்கு:
முதல்
இன்னிங்சில் இந்திய அணி 7 விக்கெட்டுக்கு 631 ரன்கள் எடுத்து "டிக்ளேர்'
செய்தது. லட்சுமண் (176), அஷ்வின் (4) அவுட்டாகாமல் இருந்தனர்.
மோசமான துவக்கம்:
பின்
முதல் இன்னிங்சை துவக்கிய வெஸ்ட் இண்டீஸ் அணிக்கு அட்ரியன் பரத் (1)
மோசமான துவக்கம் அளித்தார். பிராத்வைட் (17) பெரிய அளவில் சோபிக்கவில்லை.
வெஸ்ட் இண்டீஸ் அணி முதல் இன்னிங்சில் 2 விக்கெட்டுக்கு 34 ரன்கள்
எடுத்திருந்த போது, போதிய வெளிச்சமின்மை காரணமாக, இரண்டாம் நாள் ஆட்டம்
முடிவுக்கு வந்தது. கிர்க் எட்வர்ட்ஸ் (12), டேரன் பிராவோ (4) அவுட்டாகாமல்
இருந்தனர்.
தற்போது 597 ரன்கள் பின்தங்கியுள்ள வெஸ்ட் இண்டீஸ் அணி,
இந்திய "சுழல்' சூறாவளியை சமாளித்து, "பாலோ-ஆனை' தவிர்க்கவே கடுமையாக போராட
வேண்டியிருக்கும்.

அசார் சாதனை சமன்
நேற்று
லட்சுமண், டெஸ்ட் அரங்கில் தனது 17வது சதத்தை பதிவு செய்தார். இது,
கோல்கட்டா ஈடன் கார்டன் மைதானத்தில் இவர் அடித்த ஐந்தாவது சதம். இதன்மூலம்,
இங்கு அதிக சதம் கடந்த வீரர்கள் வரிசையில் முதலிடத்தை முன்னாள் கேப்டன்
அசாருடன் (5 சதம்) பகிர்ந்து கொண்டார்.
* லட்சுமண்(176*), ஈடன் கார்டன்
மைதானத்தில் தனது இரண்டாவது அதிகபட்ச ஸ்கோரை பெற்றார். முன்னதாக கடந்த
2001ல் ஆஸ்திரேலியாவுக்கு எதிராக 281 ரன்கள் எடுத்தார்.
* வெஸ்ட்
இண்டீசுக்கு எதிராக நான்காவது சதத்தை பதிவு செய்தார் லட்சுமண். இதன்மூலம்
வெஸ்ட் இண்டீசுக்கு எதிராக அதிக சதம் அடித்த இந்திய வீரர்கள் வரிசையில்
நான்காவது இடத்தை முன்னாள் வீரர் குண்டப்பா விஸ்வநாத்துடன் பகிர்ந்து
கொண்டார். முதல் மூன்று இடங்களில் கவாஸ்கர் (13 சதம்), வெங்சர்க்கார் (6
சதம்), டிராவிட் (5 சதம்) ஆகியோர் உள்ளனர்.

நான்காவது அதிகபட்சம்
வெஸ்ட்
இண்டீசுக்கு எதிராக முதல் இன்னிங்சில் 7 விக்கெட்டுக்கு 631 ரன்கள்
எடுத்து "டிக்ளேர்' செய்த இந்திய அணி, ஈடன் கார்டன் மைதானத்தில் தனது
நான்காவது சிறந்த ஸ்கோரை பதிவு செய்தது. முன்னதாக ஆஸ்திரேலியா (657/7
டிக்ளேர், 2001), தென் ஆப்ரிக்கா (643/6 டிக்ளேர், 2010), ஆஸ்திரேலியா
(633/5 டிக்ளேர், 1998) ஆகிய அணிகளுக்கு எதிராக இங்கு நடந்த டெஸ்டில்
சிறந்த ஸ்கோரை பெற்றது.
* இது, ஈடன் கார்டனில் வெஸ்ட் இண்டீசுக்கு
எதிராக பதிவு செய்யப்பட்ட அதிகபட்ச ஸ்கோர். முன்னதாக கடந்த 1987ல், இங்கு
வெஸ்ட் இண்டீசுக்கு எதிராக 565 ரன்கள் எடுத்ததே அதிகபட்சமாக இருந்தது.
*
இது, இந்திய அணியின் 12வது சிறந்த ஸ்கோர். கடந்த 2009ல் மும்பையில்
இலங்கைக்கு எதிராக நடந்த டெஸ்டில் இந்திய அணி 9 விக்கெட்டுக்கு 726 ரன்கள்
(டிக்ளேர்) எடுத்து அதிகபட்ச ஸ்கோரை பதிவு செய்தது. தவிர இது, வெஸ்ட்
இண்டீசுக்கு எதிராக பதிவு செய்யப்பட்ட இரண்டாவது அதிகபட்ச ஸ்கோர். கடந்த
1979ல், கான்பூரில் நடந்த டெஸ்டில் இந்திய அணி 7 விக்கெட்டுக்கு 644 ரன்கள்
எடுத்து "டிக்ளேர்' செய்தது.

சூப்பர் ஜோடி
நேற்று
224 ரன்கள் சேர்த்த இந்தியாவின் தோனி-லட்சுமண் ஜோடி, கோல்கட்டா ஈடன்
கார்டன் மைதானத்தில் இரண்டாவது முறையாக ஏழாவது விக்கெட்டுக்கு அதிக ரன்கள்
சேர்த்தது. முன்னதாக கடந்த ஆண்டு இங்கு நடந்த தென் ஆப்ரிக்காவுக்கு எதிரான
டெஸ்டில் ஏழாவது விக்கெட்டுக்கு 259 ரன்கள் சேர்த்து அவுட்டாகாமல்
இருந்தனர்.
* இது, டெஸ்ட் அரங்கில் 7வது விக்கெட்டுக்கு பதிவு
செய்யப்பட்ட, எட்டாவது சிறந்த ஸ்கோர். முன்னதாக கடந்த 1955ல்,
பிரிட்ஜ்டவுனில் நடந்த டெஸ்டில் ஆஸ்திரேலியாவுக்கு எதிராக வெஸ்ட் இண்டீசின்
அட்கின்சன், தீபியாசா ஜோடி 7வது விக்கெட்டுக்கு 347 ரன்கள் சேர்த்தது.

முதலிடம்
நேற்று
176 ரன்கள் எடுத்த லட்சுமண், ஈடன் கார்டன் மைதானத்தில் 10 டெஸ்டில் 1217
ரன்கள் (5 சதம், 3 அரைசதம்) எடுத்துள்ளார். இதன்மூலம் இந்தியாவில் உள்ள ஒரு
மைதானத்தில் அதிக ரன்கள் சேர்த்த இந்திய வீரர்கள் வரிசையில் முதலிடம்
பிடித்தார். இரண்டாவது இடத்துக்கு தள்ளப்பட்ட கவாஸ்கர், மும்பை, வான்கடே
மைதானத்தில் 11 டெஸ்டில் 1122 ரன்கள் எடுத்தார்.
* கோல்கட்டா ஈடன்
கார்டன் மைதானத்தில், தனது 5வது சதத்தை பதிவு செய்த லட்சுமண், இந்தியாவில்
உள்ள ஏதேனும் ஒரு மைதானத்தில் அதிக சதம் அடித்த வீரர்கள் பட்டியலில்
இணைந்தார். முன்னதாக அசார் (கோல்கட்டா), கவாஸ்கர் (மும்பை-வான்கடே),
சச்சின் (சென்னை) ஆகியோர் தலா 5 சதம் அடித்துள்ளனர்.

தோனியின் அதிர்ஷ்டம்
நேற்று
தோனிக்கு அதிர்ஷ்டம் அதிகமாகவே இருந்தது. 13 ரன்கள் எடுத்த போது, கீமர்
ரோச் பந்தில் விக்கெட் கீப்பர் கார்ல்டனிடம் பிடிபட்டார். ஆனால் இது "நோ
பாலாக' அமைந்தது. கீமர் ரோச்சின் அடுத்த ஓவரிலும், 16 ரன்கள் எடுத்த
நிலையில், வெஸ்ட் இண்டீஸ் கீப்பரிடம் பிடிபட்டார். இதுவும் "நோ பால்' ஆனது.
இரு முறை தப்பிய தோனி, 144 ரன்கள் எடுத்த போது, அதே கீமர் ரோச் பந்தில்,
அதே கார்ல்டனிடம் பிடிபட்டு, பெவிலியன் திரும்பினார்.

லட்சுமண், தோனி அசத்தல் சதம்! வலுவான நிலையில் இந்தியா வெ.இண்டீஸ் ஏமாற்றம்

லட்சுமண், தோனி அசத்தல் சதம்! வலுவான நிலையில் இந்தியா வெ.இண்டீஸ் ஏமாற்றம்