சட்டசபையில் கருணாநிதி உருவப்படம் வைப்பது சபை உரிமை மீறிய செயல் : ஜெயலலிதா

சென்னை
: ""பழைய மற்றும் புதிய சட்டசபை வளாகத்தில், கருணாநிதியின் உருவப் படம்
வைக்கப்படும் என்ற தி.மு.க., அமைச்சரவையின் முடிவு, அவை உரிமையை மீறிய
செயல். சட்டசபை வளாகத்தில் கருணாநிதியின் உருவப்படம் தேவையற்றது,'' என,
ஜெயலலிதா கடும் கண்டனம் தெரிவித்துள்ளார்.



ஜெயலலிதா விடுத்துள்ள அறிக்கை:தன்னலமற்ற,
மக்கள் சேவை புரிந்தவர்களையும், சமுதாயத்தில் மறுமலர்ச்சியை உருவாக்க
பாடுபட்டவர்களையும், மக்களின் உரிமைகளை மீட்க போராட்டங்கள்
நடத்தியவர்களையும் கவுரவிக்கும் விதத்தில், அவர்களுக்கு விருதுகள்
வழங்கப்படுவதும், பார்லிமென்ட், சட்டசபை வளாகங்களில் சிலை வைப்பதும்,
திருவுருவப்படங்களை திறப்பதும் கடைபிடிக்கப்பட்டு வரும் மரபு.இந்த வகையில்
தான் தமிழக முன்னாள் முதல்வர்கள் காமராஜர், அண்ணா துரை, எம்.ஜி.ஆர்.,
திருவுருவப்படங்கள் தமிழக சட்டசபையில் திறந்து வைக்கப்பட்டன. பார்லிமென்ட்
வளாகத்திலும் சிலைகள் திறந்து வைக்கப்பட்டன.இத்தலைவர்கள் மறைந்த பின்,
அவர்களுக்கு பின்னால் ஆட்சியில் அமர்ந்தவர்களால், இவர்களது படங்கள்,
சிலைகள் வைக்கப்பட்டு திறப்பு விழாக்கள் நடத்தப்பட்டன.இதற்கு முற்றிலும்
நேர்மாறாக, தனக்கு தானே விருதுகளை வழங்கிக் கொள்வதும், தன் சிந்தனைகளை
பாடமாக பல்கலைக்கழகத்தில் அறிமுகப்படுத்துவதும், தன் குடும்ப
உறுப்பினர்களுக்கு சிலைகள் வைப்பதும், அரசு திட்டங்களை தன் பெயரில்
வைத்துக் கொள்வதுமான மரபுக்கும், நடைமுறைக்கும் ஒவ்வாத செயல்கள் தான்
கருணாநிதி ஆட்சியில் நடக்கிறது.


இவற்றின்
உச்சகட்டமாக கருணாநிதி தலைமையில் நடந்த அமைச்சரவைக் கூட்டத்தில், "ஜனநாயக
நெறிமுறைகளை அரசியலிலும், ஆட்சியிலும் கடைபிடித்து வருவதுடன், தமிழக
மக்களின் தரம் உயர தொலை நோக்குப் பார்வையுடன் திட்டங்கள் தீட்டி பணியாற்றி
வருபவர்' என்று அவரை வர்ணித்து, சட்டசபைக்கு சிறப்பு சேர்த்து வரும்
கருணாநிதியின் உருவப் படத்தை புதிய சட்டசபை வளாகத்திலும், பழைய சட்டசபை
வளாகத்திலும் வைக்க அமைச்சரவைக் கூட்டத்தில் முடிவெடுத்துள்ளதாக
பத்திரிகைகளில் செய்தி வந்தது. இது சட்டசபை மரபுகளுக்கு முரணான செயல்.


பார்லிமென்டில்
சிலை மற்றும் திருவுருவப்படம் வைப்பது குறித்து சபாநாயகர் தலைமையில்
அமைக்கப்பட்ட குழுவின் மூலம் தான் முடிவு செய்யப்படும். இக்குழுவில்
எதிர்க்கட்சி உறுப்பினர்களும் இருப்பார்கள். இது பார்லிமென்ட்
நடைமுறை.தமிழக சட்டசபையில் எம்.ஜி.ஆரின் திருவுருவப்படத்தை வைக்க
அ.தி.மு.க., விரும்பியது. அப்போது, சட்டசபை எதிர்க்கட்சியாக இருந்த
காங்கிரஸ் கட்சியும் விரும்பியது. அனைவரின் ஆதரவுடன் திருவுருவப்படம்
திறந்து வைக்கப்பட்டது.யாரும் கோரிக்கை விடாத சூழ்நிலையில், தமிழக
சட்டசபையின் ஒப்புதலைப் பெறாமலும், எதிர்க்கட்சி உறுப்பினர்களின் ஆதரவைப்
பெறாமலும், தோழமைக் கட்சிகளிடம் கலந்தாலோசிக்காமலும் தன்னிச்சையாக
அமைச்சரவைக் கூட்டத்தில் முடிவு எடுப்பது ஜனநாயகத்திற்கு விரோதமானது.


அமைச்சரவையின்
முடிவு அவை உரிமை மீறிய செயல். சட்டசபை வளாகத்தில் கருணாநிதியின்
உருவப்படம் தேவையற்றது. தன்னலக்காரர்கள் தான் தன்னைத் தானே கவுரவித்துக்
கொள்வார்கள் என்ற உண்மையை கருணாநிதிக்கு சுட்டிக்காட்ட விரும்புகிறேன்.
கருணாநிதியின் செயலுக்கு கடும் கண்டனத்தை தெரிவித்துக் கொள்கிறேன்.அடுத்த
ஆண்டு அ.தி.மு.க., ஆட்சி மலர்ந்ததும் இதுபோன்ற மரபு மீறிய செயல்கள் மாற்றி
அமைக்கப்படும்.இவ்வாறு ஜெயலலிதா அறிக்கையில் கூறியுள்ளார்.

அம்மாட படம் வைக்க வில்லையென்ற கவலைபோல!