"நானா கபட நாடகம் ஆடுகிறேன்! மல்லாந்து படுத்திருப்பவன் காறித் துப்புகிற கதை!- கருணாநிதி ஆவேசம்"

"நானா கபட நாடகம் ஆடுகிறேன்! மல்லாந்து படுத்திருப்பவன் காறித் துப்புகிற கதை!- கருணாநிதி ஆவேசம்"


இலங்கைத் தமிழர் நலனுக்காகப் பாடுபடும் என்னை கபட நாடகம் ஆடுவதாக முதல்வர்
கூறுவது மல்லாந்து படுத்திருப்பவன் காறித் துப்புகிற கதை என்று கருணாநிதி
ஆவேசமாகத் தெரிவித்துள்ளார்.


அதிமுக செயற்குழுவில் திமுக
தலைவர் கருணாநிதியை விமர்சித்து நிறைவேற்றப்பட்ட தீர்மானத்துக்கு பதிலடியாக
இன்று கருணாநிதி வெளியிட்டுள்ள அறிக்கையில் இதனைத் தெரிவித்துள்ளார்.

மல்லாந்து படுத்திருப்பவன் காறித் துப்புகிற கதை!” என்று தலைப்பிட்டு கருணாநிதி இன்று வெளியிட்டுள்ள அறிக்கையில்,

ஜெயலலிதா முதலமைச்சராக இருந்தபோதுதான் இலங்கைத் தமிழர்களின்
நல்வாழ்வுக்காக மிகவும் பாடுபட்டவரும், விடுதலைப் புலிகளின் அரசியல்
ஆலோசகராக இருந்த அருமை நண்பர் அன்டன் பாலசிங்கம், நோய்வாய்ப்பட்ட நிலையில்
அவருக்கு சிகிச்சை அளிப்பது பற்றி ஓர் பிரச்சினை எழுந்தது.


அப்போது பிரதமர் வாஜ்பாய் அவர்களிடம் அதுபற்றி கேட்டபோது, மனிதாபிமான
அடிப்படையில் பாலசிங்கத்துக்கு சிகிச்சை பெறுவது பற்றி பரிசீலிக்கப்படும்
என்றுதான் கூறினார்.

அப்போது தமிழக முதல் அமைச்சராக இருந்த ஜெயலலிதா, வாஜ்பாயின் கருத்தைக் கடுமையாக எதிர்த்தார்.

தமிழகம் உள்பட இந்தியாவின் எந்த இடத்திலும் அன்டன் பாலசிங்கம் சிகிச்சை பெற, மத்திய அரசு அனுமதி அளிக்கக் கூடாது என்றே கூறினார்.

தமிழகத்தில் விடுதலைப் புலிகள் இயக்கத்துக்கு ஆதரவாகச் செயல்படுபவர்கள்
மீது புதிய “பொடா” சட்டத்தின்கீழ் நடவடிக்கை எடுக்கப்படும் என்றும்
எச்சரித்தார்.

12-4-2002 அன்று முதலமைச்சர் ஜெயலலிதா விடுதலைப் புலிகள் பிரச்சினை தொடர்பாக இரண்டு முறை விரிவாகப் பேட்டி அளித்தார்.

அந்தப் பேட்டியின் போது அவர் கூறியதாவது:
விடுதலைப் புலிகளுக்கும், இலங்கை அரசுக்கும் இடையிலான சமரசப்
பேச்சுவார்த்தையில் இந்தியா பங்கேற்காது எனப் பிரதமர் கூறியுள்ளது
வரவேற்கத்தக்கது.

ஆனால் அதேசமயம் விடுதலைப் புலிகளின் அரசியல்
ஆலோசகர் பால சிங்கத்துக்கு இந்தியாவில் சிகிச்சை அளிப்பது குறித்து
மனிதாபிமான அடிப்படையில் பரிசீலிக்கப்படும் எனப் பிரதமர் தெரிவித்துள்ளதை
எதிர்க்கிறேன்.

தமிழகம் மட்டுமின்றி இந்தியாவின் எந்த இடத்திலும்
அன்டன் பாலசிங்கம் சிகிச்சை பெற மத்திய அரசு அனுமதி அளிக்கக் கூடாது
என்பது அ.தி.மு.க. அரசின் நிலைப்பாடு.

இந்த விஷயத்தில் தமிழகத்தை மத்திய அரசு நிர்ப்பந்திக்காது என்ற நம்பிக்கை உள்ளது.

இப்படியெல்லாம் பேட்டி கொடுத்தவர் இலங்கைத் தமிழர்களுக்கு உதவி
செய்பவராம்! ஆனால் நான் இலங்கைத் தமிழர்கள் அழிவிற்குக் காரணமானவனாம்!

ஜெயலலிதாவிடம் செய்தியாளர்கள், “விடுதலைப் புலிகள் மீதான தடையை நீக்க
வேண்டும்” என்று ம.தி.மு.க., பா.ம.க., போன்ற சில கட்சிகள் கோரிக்கை
விடுத்து வருகிறார்களே என்று கேட்டபோது,

விடுதலைப் புலிகள் தடை
செய்யப்பட்ட ஒரு பயங்கரவாத அமைப்பு. விடுதலைப் புலிகளுக்கு ஆதரவு
தெரிவிப்பவர்கள் தேசத் துரோகக் குற்றம் செய்ததாகக் கருதப்பட வேண்டும்.

எனவே விடுதலைப் புலிகளுக்கு ஆதரவாகச் செயல்படுபவர்கள் மீது புதிய “பொடா” சட்டத்தின்கீழ் மத்திய அரசு நடவடிக்கை எடுக்க முடியும்.

இச்சட்டத்தின்கீழ் புலிகளுக்கு ஆதரவாகச் செயல்படுபவர்கள் மீது நடவடிக்கை
எடுக்கும் அதிகாரம் தமிழக அரசுக்கும் உள்ளது” - என்று பதிலளித்தார்.

நானாக இதை இட்டுக்கட்டிக் கூறவில்லை. தினமணி நாளிதழ் 13-4-2002ல் முதல் பக்கத்தில் வந்துள்ள தலைப்புச் செய்தியே இதுதான்
இத்தகைய முரண்பாடுகளுக்கு சொந்தக்காரர் தமிழக முதலமைச்சர் ஜெயலலிதா, இவர்
நம்மைப் பார்த்து “கபட நாடகம்” ஆடுவதாகச் சொல்வது, மல்லாந்து
படுத்திருப்பவன் காறித் துப்பிய கதையாகவே ஆகிவிடும் என்று கருணாநிதி
கூறியுள்ளார்.