ஏற்றுமதி, இறக்குமதியில் நடந்த ஊழல் தான் உணவு பொருள் விலை உயர்வுக்கு காரணம்

புதுடில்லி:
"அத்தியாவசியப் பொருட்களின் ஏற்றுமதி, இறக்குமதியில் நடந்த ஊழல் தான்,
பொருட்களின் விலை உயர்வுக்கு காரணமாக அமைந்துள்ளது' என, ராஜ்யசபாவில்
பாரதிய ஜனதா கட்சி தெரிவித்துள்ளது. ராஜ்யசபாவில் ஜனாதிபதி உரைக்கு நன்றி
தெரிவிக்கும் தீர்மானத்தின் போது, பா.ஜ., உறுப்பினர் வெங்கையா நாயுடு
கூறியதாவது: அத்தியாவசியப் பொருட்களின் விலை வானளாவ உயரும் போதெல்லாம்
அரசு மவுனமாகி விடுகிறது. உணவுப் பொருட்களின் விலை உயர்வை
கட்டுப்படுத்துவதில் அரசு தோல்வியடைந்து விட்டது.


சர்க்கரை
உள்ளிட்ட பொருட்களை இறக்குமதி செய்தது மற்றும் ஏற்றுமதி செய்த விஷயத்தில்
நடந்த முறைகேடுகளை பார்லிமென்ட் கூட்டுக் குழு அமைத்து விசாரிக்க
வேண்டும். விலை உயர்வுக்கு ஐ.மு., கூட்டணியில் இடம் பெற்றுள்ள கட்சிகளே
அதிருப்தி தெரிவித்துள்ளன. அத்தியாவசியப் பொருட்களின் விலை உயர்வு அப்பாவி
மக்களை வெகுவாக பாதித்துள்ளது. சர்க்கரை, அரிசி உள்ளிட்ட பொருட் களை
இறக்குமதி, ஏற்றுமதி செய்ததில் நடந்த ஊழல்கள் தான் விலை உயர்வுக்கு
காரணமாக அமைந்துள்ளது. காங்கிரஸ் தலைமையிலான அரசு அமையும் போதெல்லாம் பண
வீக்கமும் உடன் வந்து விடுகிறது. விலைவாசி உயர்வுக்கு மத்திய
அமைச்சரவையில் உள்ளவர்கள் ஒருவரையொருவர் குறை கூறுகின்றனர். விலை
உயர்வுக்கு மத்திய அமைச்சரவையில் உள்ளவர்கள் கூட்டாக பொறுப்பேற்க வேண்டும்.


பயங்கரவாதத்தை
சமாளிக்க அரசு புதிய உத்திகளை உருவாக்கியுள்ளதாக கூறியது. ஆனால், புனே
தாக்குதல் எப்படி நடந்தது என்பதை அரசு விளக்கவில்லை. உள்நாட்டு பாதுகாப்பு
கவலையளிப்பதாக உள்ளது. அரசினுடைய கொள்கையெல்லாம் பயங்கரவாதத்தால்
பலியானவர்களுக்கு அஞ்சலி செலுத்துவது, இறந்தவர்களின் குடும்பத்துக்கு
நிவாரணம் அளிப்பது என்ற அளவில் தான் உள்ளது. தெலுங்கானா விவகாரத்தை அரசு
குழப்பி வருகிறது. மத அடிப்படையில் ஆந்திராவில் இடஒதுக்கீடு அறிவிப்பது
கண்டனத்துக்குரியது.


பாகிஸ்தானிலிருந்து
இந்தியாவுக்கு பயங்கரவாதம் ஏற்றுமதி செய்யப்பட்டு கொண்டிருக்கும் போது,
அந்த நாட்டுடன் அமைதி பேச்சுவார்த்தை நடத்திய மத்திய அரசின் செயலில்
கொஞ்சமும் நியாயம் இல்லை. காஷ்மீரிலிருந்து இளைஞர்களை பாகிஸ்தானுக்கு
செல்ல அனுமதித்து விட்டு, அங்கு பயிற்சி பெற்று திரும்பும் இளைஞர்கள்
சரணடைந்தால் ஏற்றுக் கொள்வோம் என, அரசு கூறுவது நம் நாட்டின் அழிவுக்கு
வழிவகுப்பதாக உள்ளது. இவ்வாறு வெங்கையா நாயுடு கூறினார்.