மருத்துவ நுழைவுத்தேர்வு, பெட்ரோல் விலை உயர்வுக்கு ஜெ., கண்டனம்

சென்னை : ""மருத்துவப் படிப்பிற்கான பொது நுழைவுத் தேர்வையும்,
பெட்ரோல் விலை உயர்வையும் மத்திய அரசு உடனடியாக கைவிட வேண்டும்,'' என,
அ.தி.மு.க., பொதுச் செயலர் ஜெயலலிதா கூறியுள்ளார்.
அவர் நேற்று வெளியிட்டுள்ள அறிக்கை: பொது நுழைவுத்தேர்வு நடத்த
இந்திய மருத்துவக் குழுவிற்கு (எம்.சி.ஐ.,) சுப்ரீம் கோர்ட் அனுமதி
அளித்ததோடு, இத்தேர்வு நடத்துவதற்கான விதிமுறைகளை வகுக்க சுப்ரீம்
கோர்ட்டின் அனுமதி தேவையில்லை என்றும் தெரிவித்துள்ளது. இதனால், 2011-12ம்
ஆண்டு முதலே மருத்துவப் படிப்பை படிக்க விரும்பும் மாணவர்கள், அகில இந்திய
பொது நுழைவுத் தேர்வை சந்திக்க வேண்டிய கட்டாயத்திற்கு ஆளாகியுள்ளனர்.
எம்.சி.ஐ.,யின் இந்த முடிவு, ஏழை, கிராமப்புற மக்களை பாதிக்கும் செயல்
மட்டுமின்றி, மாநில சுயாட்சிக்கும் எதிரான செயல். மத்திய அரசின் இந்த
முடிவால், என் ஆட்சியில் நிலைநாட்டப்பட்ட 69 சதவீத இட ஒதுக்கீட்டிற்கு
ஆபத்து ஏற்படும்.
ஆகஸ்டில் இப்பிரச்னை எழுந்தபோதே, "கருணாநிதி, காங்கிரஸ் கட்சி
தலைவரையும், பிரதமரையும் நேரில் சந்தித்து அகில இந்திய பொது நுழைவுத்
தேர்வினால் தமிழக ஏழை மாணவர்களுக்கு ஏற்படும் பாதிப்புகளை விரிவாக
எடுத்துரைத்து, பொது நுழைவுத் தேர்வை கைவிட வலியுறுத்த வேண்டும்' என நான்
வலியுறுத்தினேன். கருணாநிதி அதை செய்யவில்லை."இந்த வழக்கை தமிழக அரசு
உன்னிப்பாக கவனித்து வருகிறது' என்றார் கருணாநிதி. தற்போது 2011-12ம்
கல்வியாண்டு முதல் மருத்துவப் படிப்புகளுக்கு அகில இந்திய அளவில் நுழைவுத்
தேர்வு நடத்த சுப்ரீம் கோர்ட் அனுமதியும் பெற்றாகி விட்டது. இது தான்
கருணாநிதி எடுத்த நடவடிக்கையா?
விலைவாசி உயர்வுக்கு முக்கிய காரணம், அடிக்கடி உயர்த்தப்படும்
பெட்ரோல், டீசல் விலை உயர்வு. சர்வதேச சந்தை விலைக்கு ஏற்ப பெட்ரோல்
விலையை அந்தந்த எண்ணெய் நிறுவனங்களே உயர்த்திக் கொள்ளலாம் என்ற மத்திய
அரசின் முடிவுக்கு, தி.மு.க., முழு ஒத்துழைப்பு கொடுத்ததால், எண்ணெய்
நிறுவனங்கள் தங்கள் விருப்பம் போல் பெட்ரோல் விலையை உயர்த்துகின்றன.
தற்போது பெட்ரோல் விலை மூன்று ரூபாய் உயர்த்தப்பட்டுள்ளது. நடப்பாண்டில்
மட்டும் இதுவரை எட்டு முறை (11 ரூபாய் 86 காசு அளவிற்கு) பெட்ரோல் விலை
உயர்த்தப்பட்டுள்ளது. பெட்ரோல் விலை உயர்வு, விலைவாசி உயர்வுக்கு
வழிவகுப்பதோடு, ஏழை, நடுத்தர மக்களை கடுமையாக பாதித்துள்ளது. டீசல் விலையை
உயர்த்துவது குறித்து, தற்போது மத்திய அரசு ஆலோசித்து வருவதாகவும்
செய்திகள் வருகின்றன. "2ஜி' ஸ்பெக்ட்ரம் ஒதுக்கீட்டில் கருணாநிதி
குடும்பத்தினரால் கொள்ளையடிக்கப்பட்ட ஒரு லட்சத்து 80 ஆயிரம் கோடி ரூபாய்
அரசு கருவூலத்திற்கு சென்றிருந்தால், பெட்ரோல் விலை உயர்வு
ஏற்பட்டிருக்காது என்பதே பொதுமக்கள் கருத்து.
மருத்துவப் படிப்பிற்கு பொது நுழைவுத்தேர்வு, பெட்ரோல் விலை உயர்வு
ஆகியவற்றிற்கு காரணமான மத்திய அரசுக்கும், மத்திய அரசின் முடிவுகளுக்கு
முழு ஒத்துழைப்பு கொடுத்து கொண்டிருக்கும் தி.மு.க., அரசின் முதல்வர்
கருணாநிதிக்கு கடும் கண்டனத்தை தெரிவிக்கிறேன். மருத்துவப் படிப்பிற்கான
பொது நுழைவுத் தேர்வையும், பெட்ரோல் விலை உயர்வையும் மத்திய அரசு உடனே
கைவிட வேண்டும். மாநில சுயாட்சி குறித்து வாய்கிழிய பேசும் கருணாநிதி,
மத்திய அரசில் தனக்குள்ள செல்வாக்கை பயன்படுத்தி, மருத்துவப் படிப்பிற்கான
பொது நுழைவுத் தேர்வை கைவிட நடவடிக்கை எடுக்க வேண்டும். இவ்வாறு ஜெயலலிதா
கூறியுள்ளார்.