அடாவடியாக முல்லைப் பெரியாறு அணைகட்ட தமிழக தொழிலாளிகளிடம் பணம் வசூலிப்பு!!

by **ஜனனி** Mon Dec 05, 2011 7:29 am

தமிழகத்தில் இருந்து கேரள
தோட்டங்களுக்கு வேலைக்கு செல்லும் ஜீப்களை கம்பம் மெட்டு பகுதியில் ஒரு
கும்பல் இன்று காலை வழிமறித்து மிரட்டி பணம் வசூலித்தது. முல்லை பெரியாறில்
புதிய அணை கட்ட கேரள அரசு நிதி வசூலிக்க சொல்லியிருப்பதாக அவர்கள்
கூறியுள்ளனர். பணம் தர மறுத்த பெண் தொழிலாளர்களிடம் அத்துமீறி நடக்க
முயன்றுள்ளனர். இதனால், எல்லை பகுதியில் பதற்றம் ஏற்பட்டுள்ளது.

தமிழக எல்லையையொட்டி கேரள பகுதியில் முல்லை பெரியாறு அணை உள்ளது. இந்த
அணை மூலம் தென் மாவட்ட விவசாயிகள் பாசன வசதி பெற்று வருகின்றனர்.

அணையில் 142 அடி வரை தண்ணீர் தேக்கலாம் என சுப்ரீம் கோர்ட் அளித்த
தீர்ப்பை கேரள அரசு அமல்படுத்தவில்லை. அணை பலவீனமாக இருப்பதாக வதந்தி
கிளப்பி, புதிய அணை கட்டப் போவதாக கூறி வருகின்றனர்.

புதிய அணை கட்டுவதில் கேரள அரசு தற்போது தீவிரம் காட்ட தொடங்கியுள்ளது.
நில அதிர்வுகளால் அணை பலமிழந்து விட்டதாகவும் பேரழிவு ஏற்பட போகிறது
என்றும் மக்களிடையே பீதி கிளப்பப்பட்டு வருகிறது. புதிய அணை கட்ட
வலியுறுத்தி கேரள அரசியல் கட்சிகள் போராட்டத்தில் குதித்துள்ளன.

பெரியாறு அணைக்குள் நேற்று அத்துமீறி புகுந்த கேரள இளைஞர் காங்கிரசார்
கடும் ரகளையில் ஈடுபட்டனர். தமிழகத்துக்கு தண்ணீர் திறந்து விடும் தலைமதகு
பகுதிக்குள் நுழைந்து தமிழக பொதுப்பணித்துறை மற்றும் மின்வாரிய அலுவலகங்களை
சூறையாடினர். பணியில் இருந்த ஊழியர் களையும் தாக்க முயன்றுள்ளனர்.
அவர்கள் உயிரை காப்பாற்றிக்கொள்ள வனப்பகுதிக்குள் ஓடி ஒளிந்தனர்.

அணைக்கு ஊர்வலமாக வந்த காங்கிரசார், உருட்டுக்கட்டைகளால் கண்ணில்
தென்பட்ட தமிழ் விளம்பர போர்டுகளை அடித்து நொறுக்கினர். இதையடுத்து,
பெரியாறு அணையில் நூற்றுக்கணக்கான கேரள போலீசார் குவிக்கப்பட்டுள்ளனர்.
அங்கு பாதுகாப்பு மற்றும் கண்காணிப்பு பலப்படுத்தப்பட்டுள்ளது.

இந்நிலையில், கேரள எல்லையில் தமிழ் பெண்களை இழிவுபடுத்தும் செயலில்
சிலர் இறங்கியுள்ளனர். தேனி மாவட்டம் சின்னமனூர், உத்தமபாளையம், கம்பம்,
கூடலூர், கோம்பை, தேவாரம் உள்ளிட்ட பகுதிகளில் இருந்து கேரள மாநிலம்
நெடுங்கண்டம், கட்டப்பணை, மேட்டுக்குழி, மாழி உள்ளிட்ட பகுதிகளில் உள்ள
ஏலம், காபி தோட்டங்களுக்கு ஏராளமான தொழிலாளர்கள் வேலைக்கு சென்று
வருகின்றனர்.

தோட்ட உரிமையாளர்கள் ஜீப்களை மாத வாடகைக்கு பேசி, தொழிலாளர்களை வேலைக்கு
அழைத்து செல்கின்றனர். தமிழகத்தை சேர்ந்த நூற்றுக்கணக்கான ஜீப்கள் தினமும்
தொழிலாளர்களை கேரளாவுக்கு ஏற்றிச் சென்று வருகின்றன.

இன்று காலை தொழிலாளர்களை ஏற்றி வந்த ஜீப்களை எல்லைப் பகுதியான கம்பம்
மெட்டில் ஒரு கும்பல் வழிமறித்தது. ‘முல்லை பெரியாறில் புதிய அணை கட்ட
வேண்டும். அதற்கு நிதி திரட்ட வேண்டும் என எங்கள் அரசு அறிவுறுத்தியுள்ளது.

இதனால் கேரள மாநிலத்துக்குள் செல்ல வேண்டும் என்றால் ரூ.100 தர
வேண்டும்’ என்று கேட்டு தகராறு செய்தனர். பணத்தை வாங்கிக் கொண்டு,
‘டிரைவர்ஸ் அசோசியேஷன்’ என்று மலையாளத்தில் அச்சடித்த ரசீதை கொடுத்தனர்.

அதில், எந்த பதிவெண்ணும் கிடையாது. சந்தேகமடைந்த ஒரு சில ஜீப்
டிரைவர்கள், பணம் கொடுக்க மறுத்துள்ளனர். ஆத்திரமடைந்த அந்த கும்பல்,
வேனில் இருந்த தமிழக பெண்களை வெளியே இழுத்துப்போட்டு ரகளையில் ஈடுபட்டனர்.

அவர்களிடம் அத்துமீறி நடக்க முயன்றனர். ‘பணம் கொடுக்காமல் யாரும்
கேரளாவுக்குள் நுழைய முடியாது’ என்று எச்சரித்தனர். இதை பார்த்ததும் மற்ற
ஜீப்களில் அமர்ந்திருந்த பெண்கள் அலறியடித்து ஓட்டம் பிடித்தனர்.

பயத்தில் பலர் வேலைக்கு செல்லாமல் வீடு திரும்பி விட்டனர். இந்த சம்பவம்
தேனி மாவட்டத்தில் பெரும் பதற்றத்தையும் பரபரப்பையும் ஏற்படுத்தி உள்ளது.

வீண் வதந்திகளையும் பிரச்னைகளையும் எழுப்பி வன்முறையை தூண்ட கேரளா
முயன்று வருவதாக தொழிலாளர் அமைப்புகள் கூறுகின்றன. இந்த விஷயத்தில் மத்திய,
மாநில அரசுகள் தலையிட்டு ஆரம்பத்திலேயே சுமுக தீர்வு காண வேண்டும் என
எல்லை பகுதி மக்கள் வலியுறுத்தியுள்ளனர்.