முல்லைப் பெரியாறு அணை விவகாரம்: தமிழக அரசுக்கு உச்ச நீதிமன்றம் 6 வார அவகாசம்

by **அருள்** Wed Jul 06, 2011 7:13 am

Last Updated :

முல்லைப் பெரியாறு அணை விவகாரம்: தமிழக அரசுக்கு உச்ச நீதிமன்றம் 6 வார அவகாசம் Scourt

புது தில்லி, ஜூலை 5: முல்லைப் பெரியாறு அணை விவகாரத்தில் கேரள அரசு தாக்கல்
செய்த பதில் மனுவுக்கு தமிழக அரசு ஆறு வார காலத்துக்குள் பதில் அளிக்கும்படி உச்ச
நீதிமன்றம் உத்தரவிட்டுள்ளது.
இந்த வழக்கை விசாரித்து வரும் நீதிபதி டி.கே. ஜெயின் தலைமையிலான 5 நீதிபதிகள்
கொண்ட அரசியல் சாசன அமர்வு இந்த உத்தரவைப் பிறப்பித்தது.
முல்லைப் பெரியாற்றில் கேரள அரசு புதிய அணை கட்டுவதற்காக ஆய்வு மேற்கொண்டது.
அதை தமிழகம் ஆட்சேபித்து உச்ச நீதிமன்றத்தில் மனு தாக்கல் செய்திருந்தது.
கோடை விடுமுறைக்குப் பின் இந்த மனு மீதான விசாரணை உச்ச நீதிமன்றத்தில்
செவ்வாய்க்கிழமை நடந்தது. டி.கே. ஜெயின் தலைமையிலான அரசியல் சாசன அமர்வு வழக்கை
விசாரித்தது.
இந்த வழக்கில் கேரள அரசு சார்பில் வழக்கறிஞர் கிரி செவ்வாய்க்கிழமை ஆஜரானார்.
தமிழக அரசு சார்பில் கூடுதல் பதில் மனு தாக்கல் செய்யப்பட்டுள்ளதை அவர் சுட்டிக்
காட்டினார்.
புதிய அணை கட்டுவதைத் தவிர வேறு வழியில்லை. எனவே, புதிய அணைக்கு உச்ச
நீதிமன்றம் அனுமதி தரவேண்டும் என கேரள வழக்கறிஞர் கேட்டுக் கொண்டார்.
தமிழக அரசின் சார்பாக ஆஜரான வழக்கறிஞர் பாப்டே, முல்லைப் பெரியாறு
அணையிலிருந்து தமிழகத்துக்கு தண்ணீர் திறந்து விடப்படும் கால்வாய்களில் குப்பை
கூளங்களால் அடைப்பு ஏற்பட்டுள்ளதாகவும், அவற்றை அகற்ற கேரள அரசு அனுமதிக்க
மறுக்கிறது என்றும் குறிப்பிட்டார். இது தவிர பேபி அணியைச் சீரமைக்கவும் மறுக்கிறது
என்றார் அவர்.
அப்போது இடைமறித்த கேரள அரசின் வழக்கறிஞர் கால்வாய்ப் பகுதிகளை சுத்தம்
செய்வதில் கேரளத்துக்கு ஆட்சேபம் இல்லை என்று தெரிவித்தார். எனவே, இது தொடர்பான
கோரிக்கையை தமிழக அரசு தனது மனுவில் இருந்து நீக்கும்படியும் கேட்டுக் கொண்டார். அதை
ஏற்று அக்கோரிக்கையை நீக்கிக் கொள்வதற்கு நீதிபதிகள் முன் தமிழக வழக்கறிஞர் ஒப்புதல்
அளித்தார்.
இரு தரப்பு வாதங்களையும் கேட்ட அரசியல் சாசன அமர்வு, இது தொடர்பாக உச்ச
நீதிமன்றம் அமைத்த முன்னாள் தலைமை நீதிபதி ஏ.எஸ். ஆனந்த் தலைமையிலான 5 பேர் கொண்ட
நிபுணர் குழுவின் விசாரணையின் நிலை என்ன என்று கேட்டது.
அதற்கு பதில் அளித்த வழக்கறிஞர்கள், நிபுணர் குழு நவீன முறையில் ஆய்வு
நடத்தியதாகவும், அந்த ஆய்வுகளின் அறிக்கை அக்குழுவிடம் அளிக்கப்பட்டுள்ளதாகவும்
தெரிவித்தனர்.
முன்னாள் நீதிபதி ஆனந்த் தலைமையிலான குழு மீண்டும் ஆகஸ்ட் மாதம் கூடி
விவாதிக்க உள்ளதாகவும் அவர்கள் தெரிவித்தனர். இதனிடையே கேரள அரசின் பதில் மனு
தொடர்பாக ஆறு வாரத்துக்குள் பதில் அளிக்கும்படி தமிழக அரசுக்கு நீதிபதிகள்
உத்தரவிட்டனர்.