ஹசாரேவை சமரசம் செய்ய மத்திய அரசு முயற்சி?

புதுடெல்லி: நாடாளுமன்றத்தில் மத்திய அரசு தாக்கல் செய்த லோக்பால்
மசோதாவை திரும்ப பெற்றுவிட்டு, வலுவான லோக்பால் மசோதாவை நிறைவேற்ற வேண்டும்
என்று வலியுறுத்தி சமூக சேவகர் அன்னா ஹசாரே நேற்று 3வது நாளாக டெல்லி
ராம்லீலா மைதானத்தில் உண்ணாவிரதம் தொடர்ந்தார். அவருடன் பேச்சு நடத்த தயார்
என்று பிரதமர் மன்மோகன் சிங் நேற்று அறிவித்தார். ஆனால், இதுவரை எந்த
அழைப்பும் வராததால் இழுபறி நீடிக்கிறது.
ஊழலை ஒழிக்க வலிமையான லோக்பால்
சட்டம் கொண்டு வர வலியுறுத்தி, டெல்லி ஜெய் பிரகாஷ் நாராயன் பூங்காவில்
கடந்த 16ம் தேதி டெல்லியில் தடையை மீறி உண்ணாவிரதம் இருக்க திட்டமிட்டார்.
இதையடுத்து அவரை போலீசார் கைது செய்து திகார் சிறையில் அடைத்தனர். இதற்கு
எதிர்ப்பு தெரிவித்து நாடு முழுவதும் மக்கள் கொந்தளித்து எழுந்தனர்.
சிறையிலும் 3 நாள் ஹசாரே உண்ணாவிரதம் தொடர்ந்ததால், போலீஸ் அதிகாரிகள்
அவரிடம் தீவிர பேச்சு நடத்தினர். பின்னர் பல்வேறு நிபந்தனைகளை விதித்து
ராம்லீலா மைதானத்தில் 15 நாட்கள் உண்ணாவிரதம் இருக்க போலீசார் அனுமதி
அளித்தனர்.
இதையடுத்து நேற்றுமுன்தினம் சிறையை விட்டு வெளியேறிய ஹசாரே,
ஆயிரக்கணக்கான ஆதரவாளர்களுடன் ராம்லீலா மைதானத்தில் உண்ணாவிரதத்தை
தொடங்கினார். கைது செய்தது முதலே ஹசாரே தண்ணீர் கூட குடிக்கவில்லை.
மைதானத்தில் இன்று 3வது நாளாக ஹசாரே உண்ணாவிரதம் தொடர்ந்தார். அவரை அரசு
டாக்டர்கள் குழு அடிக்கடி பரிசோதனை செய்து வருகின்றனர். அவரது இருதய
துடிப்பு, ரத்த அழுத்தம் சீராக இருப்பதாக டாக்டர்கள் கூறினர்.
இன்று
விடுமுறை என்பதால், ஆயிரக்கணக்கான ஆதரவாளர்கள் மைதானத்தில்
திரண்டிருந்தனர். குடும்பம் குடும்பமாக வந்திருந்ததால் ராம்லீலா மைதானம்
திக்குமுக்காடியது. காலை 10 மணியளவில் ஹசாரே மேடைக்கு வந்தார். முழு மனதோடு
வந்து ஆதரவு தருவதற்கு நன்றி தெரிவித்து விட்டு அமர்ந்தார். முன்னதாக
ஹசாரே தனது நெருங்கிய உதவியாளர்களான அர்விந்த் கெஜ்ரிவால், கிரண்பேடி,
மனீஷ் சிசோடியா ஆகியோருடன் ஆலோசனை நடத்தினார். சமூக சேவகர் மேதா பட்கரும்
இதில் கலந்து கொண்டார்.
பிரதமர் மன்மோகன் சிங்கும், ‘திறந்த மனதுடன்
பேச்சு நடத்த தயார்‘ என்று நேற்று திட்ட கமிஷன் கூட்டத்துக்கு பிறகு
கூறினார். எனினும் இதுவரை பேச்சு எதுவும் தொடங்கப்படவில்லை. லோக்பால் மசோதா
நாடாளுமன்ற குழு பரிசீலனையில் உள்ளதாலும், இக்குழு மக்கள் கருத்து கேட்ட
திட்டமிட்டுள்ளதாலும் ஹசாரே கூறியபடி ஆக.30ம் தேதிக்குள் மசோதவை நிறைவேற்ற
முடியாத சூழல் உள்ளது.
இந்நிலையில் அவரை சமாதானப்படுத்தி உண்ணாவிரதத்தை
முடிவுக்கு கொண்டு வர மத்திய அரசு முயற்சிப்பதாக டெல்லி வட்டாரங்கள் கூறின.
ஆனால், அரவிந்த் கெஜ்ரிவால் மற்றும் கிரண்பேடி இன்று கூறும்போது, ‘நாங்கள்
பேச்சுவார்த்தைக்கு தயாராக இருக்கிறோம். ஆனால் அரசு சார்பில் எங்களை
யாரும் அணுகவில்லை. யாரை சந்திப்பது, எங்கு சந்திப்பது, எப்போது சந்திப்பது
என்று தெரியவில்லை. ஹசாரே 6 நாட்களாக எதுவும் சாப்பிடவில்லை. அதை பற்றி
அரசு கவலைப்படவில்லைÕ என்றனர். இதற்கிடையில், ஹசாரேவுக்கு ஆதரவு தெரிவித்து
மாணவர்கள், சமூக சேவை நிறுவனங்கள் என பல தரப்பினரும் நாடு முழுவதும்
உண்ணாவிரதம் இருந்து வருகின்றனர். அவர்களில் பலர் மயக்கம் அடைந்து
மருத்துவமனைகளில் சேர்க்கப்பட்டுள்ளனர். இதே நிலைமை இன்னும் சில நாட்கள்
தொடர்ந்தால் மத்திய அரசுக்கு கடும் நெருக்கடி ஏற்படும் என்று தெரிகிறது.