தனியார் பஸ்களில் கட்டணம் உயர்வு

Last Updated :




சென்னை, ஜூலை 4: டீசல் விலை உயர்வைத் தொடர்ந்து தமிழகத்தில் பல பகுதிகளில்
தனியார் பஸ்களில் கட்டணம் உயர்த்தப்பட்டுள்ளன. இதுதொடர்பாக அரசுத் தரப்பில்
நடவடிக்கை எதுவும் இதுவரை எடுக்கப்படவில்லை.
கடந்த ஜூன் 24-ல் டீசல் விலை உயர்வு, 30-ம் தேதி கமிஷன் உயர்வு ஆகியவற்றை
அடுத்து டீசல் விலை லிட்டருக்கு ரூ.40.86 ஆக உயர்ந்துள்ளது. இதனால் லாரிகளில் வாடகை
உயர்ந்துவிட்டது.
பஸ்களைப் பொருத்தவரை அரசு அறிவித்தால்தான் கட்டணத்தை உயர்த்த முடியும் என்ற
நிலை இதுவரை இருந்து வந்தது.
ஆனால் சமீப காலமாக தனியார் பஸ் உரிமையாளர்கள் அந்தந்தப் பகுதியில் முடிவு
செய்து கட்டணத்தை ரூ.1 முதல் ரூ.2 வரை உயர்த்தி வருகின்றனர்.
கடந்த ஆண்டு கோவை, திருப்பூர், ஈரோடு உள்ளிட்ட சில பகுதிகளில் இதுபோல தனியார்
பஸ்களில் கட்டண உயர்வு இருந்தது.
அவ்வாறு வசூலிக்கக் கூடாது என்றும், வசூலித்தால் கடும் நடவடிக்கை
எடுக்கப்படும் என்றும் அரசுத் தரப்பில் எச்சரிக்கை விடுக்கப்பட்டது. ஆனால்
உயர்த்தப்பட்ட கட்டணம் குறையவே இல்லை.
எம்.எல்.ஏ.க்கள், அமைச்சர்கள் பலரும் பஸ் உரிமையாளர்களாக இருப்பதால்தான்
இதுகுறித்து அதிகாரிகள் கண்டுகொள்வது இல்லை என்ற குற்றச்சாட்டு உள்ளது.
இப்போது டீசல் விலை உயர்வை அடுத்து நீண்டதூரம் செல்லும் தனியார் ஆம்னி
பஸ்களில் ரூ.50 முதல் ரூ.100 வரை கட்டணம் உயர்த்தப்பட்டுள்ளன. ஏற்கெனவே ரயிலில் ஏ.சி.
பயணத்தைவிட அதிகமாக சில ஆம்னி பஸ்களில் கட்டணம் வசூலிக்கப்படுகிறது. இப்போது அதுவும்
அதிகரித்துவிட்டது.
அரசு விரைவு பஸ்களின் எண்ணிக்கையை அதிகரித்து, மூட்டைப் பூச்சி தொந்தரவு
இல்லாமல், செüகரியமான பயணத்துக்கு ஏற்பாடு செய்தால், ஆம்னி பஸ்களில் அதிக கட்டணம்
கொடுத்து பயணிக்கும் தேவை குறைந்துவிடும். ஆனால் இதில் அதிகாரிகள் அக்கறை
காட்டுவதாகத் தெரியவில்லை.
இப்போது காஞ்சிபுரம், விழுப்புரம், தர்மபுரி, கடலூர், கன்னியாகுமரி உள்ளிட்ட
மாவட்டங்களில் தனியார் பஸ்களில் கட்டணம் உயர்ந்துள்ளது.
மினி பஸ்களின் கட்டணமும் பல இடங்களில் ரூ.1 அதிகமாகிவிட்டதாகத் தகவல்கள்
தெரிவிக்கின்றன.
காஞ்சிபுரத்தில் அரசு எக்ஸ்பிரஸ் பஸ் கட்டணத்துக்கு இணையாக தனியார் பஸ்களில்
இப்போது ரூ.2 கூடுதலாக வசூலிக்கின்றனர்.
கடலூர் - புதுவை இடையே பஸ்களுக்கு அரசு நிர்ணயித்துள்ள கட்டணம் ரூ.6.50.
புதுவையில் பதிவு செய்து இயக்கப்படும் பஸ்களில் ரூ.7 வசூலிக்கப்படுகிறது. இதை தமிழக
அதிகாரிகளால் தடுக்க முடியவில்லை. இப்போது தமிழக தனியார் பஸ்களில் ரூ.8
வசூலிக்கப்படுகிறது.
கடலூர் நகருக்குள் தனியார் நகர பஸ்களில் குறைந்தபட்சக் கட்டணம் ரூ.3 என்பது
ரூ.4 ஆக உயர்த்தப்பட்டுள்ளது. வெளியூர் பஸ்களில் குறைந்தபட்சம் ரூ.4 ஆக இருந்த
கட்டணம் ரூ.5 ஆக உயர்ந்துள்ளது. கடலூர் - பண்ருட்டி இடையே கட்டணம் ரூ.8-ல் இருந்து
ரூ.9 ஆக உயர்ந்துள்ளது. கடலூர் - சிதம்பரம் வழியில் ரூ.1.50 அதிகரித்துள்ளது.
தர்மபுரி- கிருஷ்ணகிரி, தர்மபுரி - சேலம் வழியில் ரூ.1 முதல் ரூ.1.50 வரை
கட்டணம் உயர்ந்துள்ளது.
விழுப்புரம் மாவட்டத்தில் ரூ.3 வரை கட்டணம் உயர்ந்துள்ளது. நீண்டதூர பஸ்களில்
ரூ.5 வரை அதிகரித்துள்ளது.
டீசல் லிட்டர் ரூ.18-க்கு விற்றபோது நிர்ணயித்த கட்டணமே இப்போதும் அமலில்
இருப்பதாக பஸ் உரிமையாளர்கள் கூறுகின்றனர். அப்போது ரூ.14 ஆயிரத்துக்கு விற்ற டயர்
இப்போது ரூ.32 ஆயிரமாகிவிட்டதாகவும், காப்பீட்டுத் தொகை ரூ.20 ஆயிரம்
உயர்ந்துவிட்டதாகவும் அவர்கள் குறிப்பிடுகின்றனர்.
இதேபோல மற்ற செலவுகளும் அதிகரித்துள்ளதாகப் பட்டியலிடுகின்றனர்.
அரசு பஸ்களில் சொகுசு பஸ், எக்ஸ்பிரஸ் என வெவ்வேறு பெயர்களில் கூடுதல் கட்டணம்
வசூலித்து, வருவாயை ஈடுகட்டிக் கொள்கிறார்கள். ஆனால் தனியார் பஸ் உரிமையாளர்கள்தான்
பாதிக்கப்படுகிறோம் என அவர்கள் கூறுகின்றனர்.
டீசல் விலை உயரும்போது அதற்கேற்ற விகிதாசாரத்தில் பஸ் கட்டணத்தையும் உயர்த்த
அரசு அனுமதிக்க வேண்டும் என பஸ் உரிமையாளர்கள் கோருகின்றனர்.
தனியார் பஸ் உரிமையாளர்கள் பெரும்பாலானோர் அரசியல் செல்வாக்கு உள்ளவர்களாக
இருந்தாலும், கட்டண உயர்வு விஷயத்தில் அரசின் அனுமதியைப் பெற முடியாத நிலை உள்ளது.

அரசே கட்டணத்தை உயர்த்தினால் தேர்தல் நேரத்தில் மக்களின் அதிருப்தியை
சந்திக்க வேண்டி வரும் என்பதே இதற்குக் காரணம்.
எனவே பஸ் உரிமையாளர்கள் தாங்களாக கட்டணத்தை உயர்த்திக் கொண்டுள்ளனர்.
நடவடிக்கை எடுக்க வேண்டிய அதிகாரிகள் இதைக் கண்டு கொண்டதாகத் தெரியவில்லை.
தனியார் பஸ் உரிமையாளர்களை அரசு தன் கட்டுப்பாட்டில் கொண்டு வருவதோடு, அரசு
பஸ்களிலும் தரமான சேவையை அளிக்க நடவடிக்கை எடுக்க வேண்டும் என பொது மக்கள்
எதிர்பார்க்கின்றனர்.