"டார்கெட்' விஜயகாந்த்: தொடர்ந்து குறிவைக்கும் தி.மு.க., பிரசாரம்

by **mmani** Wed Apr 06, 2011 7:26 am

தமிழக தேர்தல் களத்தில், அ.தி.மு.க., பொதுச் செயலர் ஜெயலலிதாவை விட
அதிகம் விமர்சிக்கப்படும் நபராக, தே.மு.தி.க., தலைவர் விஜயகாந்த்
இருக்கிறார். தனிப்பட்ட தாக்குதல்கள் நடத்தி, அவரது, "கேரக்டரை'
சீர்குலைக்கும் நோக்கில் தி.மு.க., செயல்பாடுகள் இருக்கின்றன.
தமிழக முதல்வரும், தி.மு.க., தலைவருமான கருணாநிதி, தான் போட்டியிடும்
திருவாரூர் தொகுதியில் பிரசாரத்தைத் துவக்கினார். கூட்டணியில் உள்ள
அனைத்துக் கட்சித் தலைவர்களும் கலந்து கொண்ட அந்தக் கூட்டத்தில், நடிகர்
வடிவேலுவும் பேசினார். தே.மு.தி.க., தலைவர் விஜயகாந்தை மிகவும்
தரக்குறைவாகவும், தனிப்பட்ட முறையிலும் விமர்சனம் செய்தார். அதை, மேடையில்
இருந்த முதல்வர் உள்ளிட்ட பலரும், மகிழ்ச்சியுடன் ரசித்துக் கேட்டனர்.அதன்
பின் பிரசாரத்தைத் துவக்கிய கருணாநிதியும், தன் பிரசாரத்தில், அ.தி.மு.க.,
பொதுச் செயலர் ஜெயலலிதாவை விட, விஜயகாந்த் பற்றியும், தேர்தல் கமிஷன்
பற்றியும் தான் கடுமையாக விமர்சித்து வருகிறார். "நேற்று முளைத்தவர்கள்
எல்லாம் என்னைப் பற்றி பேசுகின்றனர்' எனக் குறிப்பிடுகிறார்.அதேபோல், துணை
முதல்வர் ஸ்டாலின், மத்திய அமைச்சர் அழகிரி, மத்திய இணையமைச்சர்
நெப்போலியன், பா.ம.க., நிறுவனர் ராமதாஸ், வி.சி., திருமாவளவன் உள்ளிட்ட
பலரும், தே.மு.தி.க., தலைவர் விஜயகாந்தை, "ரவுண்டு கட்டி'
விமர்சிக்கின்றனர்.
இதுகுறித்து, மத்திய மண்டலத்தைச் சேர்ந்த தி.மு.க., முக்கிய பிரமுகர் கூறியதாவது:
தற்போது தி.மு.க.,வின் நேரடி எதிரி விஜயகாந்த் தான். அதனால், "டார்கெட்
விஜயகாந்த்' என்ற பிரசாரத் திட்டமே வகுக்கப்பட்டுள்ளது. சில மாதங்களாக
அ.தி.மு.க.,வை விட, தே.மு.தி.க., தலைவர் விஜயகாந்த் தான், தி.மு.க.,வைப்
பற்றியும், முதல்வரின் குடும்பத்தினர் பற்றியும் கடுமையான விமர்சனங்களை
வெளியிட்டு வருகிறார். அதுமட்டுமல்லாமல், "தி.மு.க.,வை மீண்டும் ஆட்சிக்கு
வரவிடாமல் தடுக்க, எது வேண்டுமானாலும் செய்வேன்' என, பொதுக்கூட்ட
மேடைகளில் சவாலே விட்டார். அதற்காகத் தான், தனித்துப் போட்டி என்ற, தன்
நெடுநாள் கொள்கையிலிருந்து இறங்கியும் வந்தார்.அவர் சேர்ந்திருக்கும்
தைரியத்தில், அ.தி.மு.க., கூட்டணியே உற்சாகமாகத் திரிகிறது. தே.மு.தி.க.,
- அ.தி.மு.க., கூட்டணி முறிந்தால், தி.மு.க.,வுக்கு வெற்றி எளிதாகிவிடும்
என்று உளவுத்துறை கொடுத்த தகவலின் அடிப்படையில், நாங்கள் மேற்கொண்ட சில
முயற்சிகள் பலனளிக்கவில்லை.
இவையெல்லாம் தான், "டார்கெட் விஜயகாந்த்' திட்டத்துக்கு காரணமாக
இருந்தவை. சினிமா பின்னணி காரணமாக அவருக்கு இருக்கும், "ஹீரோ இமேஜை'
சேதப்படுத்துவது தான் அதன் நேரடி நோக்கம்.இதன் விளைவு தான், தி.மு.க.,
மேடைகளிலும், சிரிப்பு நடிகர் வடிவேலுவின் பிரசாரங்களிலும் கிளம்பியுள்ள
விமர்சனங்கள். அதனால் தான், விஜயகாந்த் பற்றிய காட்சிகளும் அடிக்கடி
ஒளிபரப்பப்படுகின்றன.இவ்வாறு அந்த பிரமுகர் கூறினார்.
குறிப்பாக, அ.தி.மு.க., ஆதரவு தொலைக்காட்சியை விட, இவர்களது சேனல்களில்
தான் விஜயகாந்த் பிரசாரம் அதிகம் காட்டப்படுகிறது. என்ன தான் காரணம்
சொன்னாலும், தமிழக முதல்வர் கருணாநிதியையே, ஒரு காட்சியில் ஒரு முறை
மட்டுமே காட்டும் அவர்கள், சிரிப்பு நடிகர் வடிவேலுவுக்கு, இரண்டு
காட்சிகள் காட்டுவது அதிசயம் தான்!
கடந்த லோக்சபா தேர்தலில், பா.ம.க., வேட்பாளர்கள் ஏழு பேரையும்
தி.மு.க., குறிவைத்து தோற்கடித்தது போல், இம்முறை தே.மு.தி.க.,
போட்டியிடும், 41 தொகுதிகளிலும் விசேஷ கவனம் செலுத்த, தி.மு.க., தலைமை
உத்தரவிட்டுள்ளது.மே 13ம் தேதி தேர்தல் முடிவுகள் தெரியும்போது, யார்
வென்றாலும், யார் தோற்றாலும், தமிழக அரசியல் மேடை தரம் தாழ்ந்தது தான்
மிச்சம்.