நலம் தரும் நவராத்திரி வழிபாடு!!

சிவனை வழிபட சிறந்த ஒரு ராத்திரி சிவராத்திரி. அதேபோல் அம்பாளை வழிபட சிறப்பான ஒன்பது ராத்திரிகள், நவராத்திரி என்று அழைக்கப்படுகின்றன. சக்தி வழிபாட்டுக்குரிய விரதங்களில் வெள்ளிக்கிழமை விரதம், பவுர்ணமி விரதம், நவராத்திரி விரதம் போன்றவை மிகவும் முக்கியமானவை. ஒன்பது நாட்கள் நவராத்திரியை தொடர்ந்து வரும் அடுத்த நாள் விஜயதசமி ஆகும். தொடர்ச்சியாக 10 நாட்கள் இந்த விழா கொண்டாடப்படுகிறது. எனவே இதனை வீட்டில் நடக்கும் ‘பிரம்மோற்சவம்’ என்று கூறுகிறார்கள். அம்பாளுக்குரிய பண்டிகைகள் எவ்வளவோ இருந்தாலும், அவற்றுள் முக்கியமானது நவராத்திரி விழாதான்.

ஆண்டிற்கு நான்கு நவராத்திரிகள் உண்டு. சக்தியைச் சித்திரை மாதத்தில் வழிபடுவது ‘வசந்த நவராத்திரி’ எனப்படும். ‘ஆஷாட நவராத்திரி’ ஆடி மாதத்தில் வரும் நவராத்திரியாகும். புரட்டாசி மாதத்தில் வழிபடுவது ‘பாத்ரபத நவராத்திரி’ அல்லது ‘சாரதா நவராத்திரி’ எனப்படும். புரட்டாசி மாதத்தின் வளர்பிறை, பிரதமை திதியில் ஆரம்பித்து ஒன்பது நாட்கள் இந்த விழா கொண்டாடப்படுகிறது.

நவராத்திரி வழிபாடு பெண்களுக்கே உரியது. எல்லா வயதுடைய, பருவத்தைச் சார்ந்த பெண்களும் இந்த வழிபாட்டில் ஈடுபடலாம். இவ்வழிபாட்டின் பயனாக, பெண் குழந்தைகள் பெறுவது மகிழ்ச்சி. கன்னிகள் பெறுவது திருமணப் பயன். சுமங்கலிகள் பெறுவது மாங்கலய பயன். மூத்த சுமங்கலிகள் பெறுவது மனமகிழ்ச்சி, மன நிறைவு. எல்லோரும் பெறுவது பரிபூரண திருப்தி.

நவராத்திரியின் சிறப்பு அம்சம் கொலு வைப்பதேயாகும். கொலு என்பது பல படிகளை கொண்ட மேடையில் பல வித பொம்மைகளை நேர்த்தியாக அலங்கரித்து வைப்பது. ‘ஐம் பூதங்களில் ஒன்றான மண்ணினால் செய்யப்பட்ட பொம்மைகளை சக்தியின் அம்சங்களாக எண்ணி, நவராத்திரியில் பூஜிப்பவர் களுக்கு சகல நலங்களையும் தருவேன்’ என்று அம்பிகையே கூறியிருக்கின்றாள்.

முதல் மூன்று நாட்கள் துர்க்கையின் வழிபாடு. நடுவில் உள்ள மூன்று நாட்கள் லட்சுமி வழிபாடு. கடைசி மூன்று நாட்கள் சரஸ்வதி வழிபாடு.

முப்பெரும் சக்திகளில், ஒவ்வொரு சக்திக்கும் மும்மூன்று அம்சங்கள் உள்ளன. துர்க்கையானவள், மகேசுவரி, கவுமாரி, வராகி ஆகிய மூன்று அம்சங்களிலும், லட்சுமிதேவியானவள், மகாலட்சுமி, வைஷ்ணவி, இந்திராணி ஆகிய மூன்று அம்சங்களிலும், கலைகளுக்கு அதிபதியான சரஸ்வதியானவள், சரஸ்வதி, நாரசிம்மி, சாமுண்டி ஆகிய மூன்று அம்சங்களிலும் இந்த ஒன்பது நாட்களில் அருள்பாலிப்பார்கள். ஒன்பது நாட்களும் இந்த தேவியர்களை முறையாக வழிபட வேண்டும். ஒரு தேவியை முதன்மையாகவும், மற்றவர்களைப் பரிவார தெய்வங்களாகவும் கொள்ள வேண்டும்.

துர்க்கையானவள் வீரத்தின் தெய்வம். வீரத்தின் தொடக்கத்திலும், முடிவிலும் வழிபடும் தெய்வம் இவள். நெருப்பின் அழகுடன் ஆவேசப் பார்வை கொண்டவள். சிவபிரியையான துர்க்கை இச்சா சக்தி ஆவாள். வன துர்க்கை, சூலினி துர்க்கை, ஜாதவேதோ துர்க்கை, ஜ்வாலா துர்க்கை, சாந்தி துர்க்கை, சபரி துர்க்கை, தீப் துர்க்கை, சூரி துர்க்கை, லவண துர்க்கை ஆகியோர் துர்க்கையின் அம்சங்கள்.

லட்சுமிதேவி செல்வத்தின் தெய்வம். மலரின் மென்மையுடன் அழகாக விளங்குபவள். விஷ்ணு பிரியையான இவள் கிரியா சக்தி. லட்சுமி அமுதத்துடன் தோன்றியவள். இந்த தேவி, செல்வ வளம் தந்து, வறுமையை அகற்றி அருள் புரிபவள். இவளுக்குத் தனிக் கோவில் இருக்குமிடம் திருப்பதியில் உள்ள திருச்சானூர். ஆதி லட்சுமி, மகாலட்சுமி, தன லட்சுமி, தான்ய லட்சுமி, சந்தான லட்சுமி, வீர லட்சுமி, விஜய லட்சுமி, கஜ லட்சுமி ஆகியோர் லட்சுமியின் அம்சங்கள்.

சரஸ்வதி தேவி கல்வியின் தெய்வம். இவள் அமைதிப் பார்வையுடன் வைரத்தின் அழகுடன் பிரகாசிப்பவள். பிரம்ம பிரியையான இவள், ஞான சக்தி. நவராத்திரியின் ஆறாவது மற்றும் ஏழாவது நாளில், மூல நட்சத்திரம் உச்சமாக இருக்கும்போது சரஸ்வதியை வழிபட வேண்டும். இவள் ஞானத்துடன் தொடர்புடையவள். எனவே, ஞானத்தின் தெய்வமான சரஸ்வதியைப் பூஜிப்பது சரஸ்வதி பூஜை. வாகீஸ்வரி, சித்ரேஸ்வரி, துளஜா, கீர்த்தீஸ்வரி, அந்தரிட்ச சரஸ்வதி, கடசரஸ்வதி, நீலசரஸ்வதி, கினி சரஸ்வதி ஆகியோர் சரஸ்வதியின் அம்சங்கள்.