சரமாரி வெட்டுக் காயங்களுடன் சுடுகாட்டில் இளைஞரின் சடலம்: காஞ்சிபுரம் அருகே பயங்கரம்

காஞ்சிபுரம் அருகே
கிராமத்தில் உள்ள சுடுகாட்டில் வாலிபர் கத்தியால் குத்தி கொலை
செய்யப்பட்டார். இதுகுறித்து விசாரணை நடத்திய போலீசார், அவருடன் மது
அருந்திய நண்பரை கைது செய்துள்ளனர். இந்த சம்பவம் காஞ்சிபுரத்தில் பெரும்
பரபரப்பை ஏற்படுத்தியுள்ளது.

காஞ்சிபுரம் அருகே வெள்ளக்குளம் சுடுகாட்டையொட்டி உள்ள மேட்டுநகரில்
வாலிபர் ஒருவர் உடல் முழுவதும் வெட்டுக்காயங்களுடன் இறந்து கிடந்தார். அந்த
வழியாக இன்று அதிகாலை சென்றவர்கள், வாலிபர் உடல் கிடப்பதை பார்த்து
திடுக்கிட்டனர். காஞ்சிபுரம் போலீசாருக்கு உடனே தகவல் கொடுத்தனர்.

இதையடுத்து காஞ்சிபுரம் டிஎஸ்பி ராஜேந்திரன், தாலுகா போலீஸ்
இன்ஸ்பெக்டர் அனுமந்தன், சிவகாஞ்சி இன்ஸ்பெக்டர் பாலசுப்பிரமணியம் ஆகியோர்
அங்கு விரைந்தனர். அந்த பகுதி மக்களிடம் விசாரணை நடத்தினர்.

பின்னர், வாலிபர் உடலை கைப்பற்றி பிரேத பரிசோதனைக்காக காஞ்சிபுரம் அரசு மருத்துவமனைக்கு அனுப்பி வைத்தனர்.

இறந்த வாலிபர் சிவப்பு கலர் முழுக்கை சட்டை, சிவப்பு கலர் பனியன்,
கருப்பு கலர் பேன்ட் அணிந்திருந்தார். அவரை பற்றிய விவரம் தெரியவில்லை.
வாலிபர் உடல் அருகே பீர் பாட்டில், பிளாஸ்டிக் டம்ளர் இருந்தது.

இதுசம்பந்தமாக காஞ்சிபுரம் தாலுகா போலீசார் வழக்குப்பதிவு செய்து
விசாரித்தனர். இதில் இறந்தவர் பற்றிய தகவல்கள் கிடைத்துள்ளன. இறந்தவர்
காஞ்சிபுரம் பல்லவர்மேடு பகுதியை சேர்ந்த மூர்த்தி (21). பெயின்டர். நண்பர்
ரகுவரன் (21) என்பவருடன் சேர்ந்து டிராவல்ஸ் நடத்தினார்.

2001ம் ஆண்டு அன்பு என்பவரை கொலை செய்தார். வெள்ளக்குளம் மேட்டுநகரில்
நேற்று மாலை மூர்த்தியும், ரகுவரனும் மது அருந்தியுள்ளனர். அப்போது தொழில்
சம்பந்தமாக அவர்களிடையே தகராறு ஏற்பட்டுள்ளது.

கோபம் அடைந்த மூர்த்தி, இடுப்பில் மறைத்து வைத்திருந்த கத்தியை எடுத்து
ரகுவரனை குத்த முயற்சித்துள்ளார். ஆனால் அவரிடம் இருந்து கத்தியை பிடுங்கிய
ரகுவரன், மூர்த்தியை சரமாரியாக குத்திவிட்டார். மூர்த்தி இறந்ததும்
அங்கிருந்து தப்பி ஓடிவிட்டார். இவ்வாறு விசாரணையில் தெரியவந்துள்ளது.

இதனிடையே, காஞ்சிபுரம் பகுதியில் பதுங்கியிருந்த ரகுவரனை போலீசார் இன்று
காலை கைது செய்தனர். அவரிடம் மேலும் விசாரிக்கின்றனர். தொழில் போட்டி
காரணமாக நடந்ததா? ஏற்கனவே நடந்த கொலைக்கு பழியாக நடந்ததா என்ற கோணத்தில்
போலீசார் விசாரிக்கின்றனர்.

கொலை நகரமாகும் கோயில் நகரம்....

கோயில் நகரம் என்று பெயர் எடுத்துள்ள காஞ்சிபுரம் தற்போது கொலை நகரமாக
மாறி வருகிறது. அந்த அளவுக்கு அங்கு அடிக்கடி கொலைகள் நடக்கின்றன. கடந்த
மாதத்தில் துபாயை சேர்ந்த இன்ஜினியர் கிருஷ்ணாராவ் (45) முகமூடி
கொள்ளையர்களால் கொலை செய்யப்பட்டார்.

விப்பேடு கிராமத்தை சேர்ந்த கல்லூரி மாணவர் சாந்தகுமார் (21) ஆங்கில
புத்தாண்டு அன்று அடித்துக் கொல்லப்பட்டார். நேற்று சர்வதீர்த்தக்குளம்
தென்கரை பகுதியை சேர்ந்த லட்சுமி (60) என்ற மூதாட்டி குத்திக்
கொல்லப்பட்டார்.

இதுதவிர, காஞ்சிபுரம் நகரில் கொள்ளைகளும் அதிகரித்துள்ளன. கொலை, கொள்ளை சம்பவங்களால் காஞ்சிபுரம் மக்கள் பீதியில் ஆழ்ந்துள்ளனர்.