ஏ.டி.எம்-ஐ உடைத்து கொள்ளை முயற்சி; கல்லூரி காவலாளிகள் 2 பேர் படுகொலை; நாகர்கோவில் அருகே பயங்கரம்

by **mmani** Fri May 06, 2011 7:35 am

நாகர்கோவில்,மே.5-

நாகர்கோவிலை
அடுத்த ராமனாதிச்சன்புதூரில் லார்ட்ஜெகநாத் என்ஜினீயரிங் கல்லூரி உள்ளது.
இங்கு உள்ளூர் மற்றும் வெளியூர் மாணவர்கள் தங்கி படிக்கிறார்கள். இவர்களது
வசதிக்காக கல்லூரி நுழைவாயில் அருகே சிட்டி யூனியன் பாங்கின் ஏ.டி.எம்.
மையமும் உள்ளது. கல்லூரி காவலாளிகளே ஏ.டி.எம். மையத்தையும் கண்காணித்து
வந்தனர். ஏ.டி.எம். மையம் அருகே காவலாளிகளுக்கான அறையும் உள்ளது. நேற்று
இரவு கல்லூரி காவல் பணியில் காவலாளிகள் சுடலைமுத்து, பால்பாண்டி ஆகியோர்
ஈடுபட்டு இருந்தனர்.

இன்று அதிகாலை 5.30 மணிக்கு
செய்தித்தாள்களை வாங்க மாணவர்கள் 2 பேர், காவலாளிகளின் அறைக்கு வந்தனர்.
அப்போது காவலாளி சுடலைமுத்து ரத்தவெள்ளத்தில் பிணமாக கிடந்தார். அவரது தலை
கல்லால் அடித்து நசுக்கப்பட்டு இருந்தது. அறைஎங்கும் ரத்தம்
சிதறிக்கிடந்தது. இன்னொரு காவலாளி பால்பாண்டி கல்லூரிக்கு அருகே பிணமாக
கிடந்தார். அவரது தலையும் சிதைக்கப்பட்டு இருந்தது.

ஏ.டி.எம்.
மையம் முற்றிலுமாக உடைக்கப்பட்டு இருந்தது. லார்ட்ஜெகநாத் கல்லூரி ஊருக்கு
வெளியே ஒதுக்குப்புறமான இடத்தில் இருக்கிறது. இங்கு என்ன நடந்தாலும்
வெளியே தெரியாது. இந்த இடத்தில் ஏ.டி.எம். மையம் இருப்பதை தெரிந்து கொண்ட
மர்ம நபர்கள் அதில் இருக்கும் பணத்தை கொள்ளையடிக்க வந்திருக்கலாம் என்றும்
அந்த முயற்சி பலிக்காதததால் அவர்கள் கல்லூரி காவலர்களை கொலை
செய்திருக்கலாம் என்று போலீசார் கருதுகிறார்கள்.

ஏ.டி.எம்.
எந்திரத்தில் பணம் இருக்கும் பகுதியை கொள்ளையர்களால் உடைக்க முடியவில்லை.
எனவே அதிலிருந்த பணம் தப்பிவிட்டது. இந்த சம்பவம் பற்றி போலீஸ்
சூப்பிரண்டு பவானீஸ்வரி கூறியதாவது:-

கல்லூரி
காவலாளிகளை கொலை செய்தவர்கள் பற்றி துப்பு துலக்கி வருகிறோம். சில முக்கிய
தடயங்கள் சிக்கியுள்ளன. ஏ.டி.எம்.மை தகர்த்து பணத்தை கொள்ளையடிக்க நடந்த
முயற்சியில் கொலை நடந்திருக்கலாம் என்று கருதுகிறோம். ஏ.டி.எம். மையத்தில்
வைக்கப்பட்டு இருந்த ரகசிய காமிராவில் சிலரது உருவங்கள் பதிவாகியுள்ளன.
அவற்றை போட்டு பார்த்து கொள்ளையடிக்க வந்தவர்கள் யார்? என்பதை
கண்டுபிடித்துவிடுவோம்.

இவ்வாறு அவர் கூறினார்.

கொலை
செய்யப்பட்ட காவலாளிகளில் சுடலை முத்து களக்காடு சாலை புதூரைச்
சேர்ந்தவர். 58 வயதாகிறது. இன்னொரு காவலாளி பால்பாண்டி நாகர்கோவில்
வழுக்கம்பாறையை சேர்ந்தவர். இவரது மனைவி பால்தங்கம். கணவர் பிணத்தை
பார்த்து கதறி அழுதது பரிதாபமாக இருந்தது. கொலை சம்பவத்தை தொடர்ந்து இன்று
கல்லூரிக்கு விடுமுறை அளிக்கப்பட்டது. பல்கலைக்கழக தேர்வுகள் மட்டும்
வழக்கம் போல நடைபெறும் என்று அறிவிக்கப்பட்டது.