உண்ணாவிரதத்தை தடுத்து நிறுத்த முயற்சி: சுப்ரீம் கோர்ட்டில் வழக்கு தொடருவேன்- அன்னா ஹசாரே

புதுடெல்லி, ஜுலை.18-


ஊழல்
செய்யும் அரசியல்வாதிகள் மற்றும் அதிகாரிகளை பிரத்தியேகமாக விசாரித்து
தண்டனை வழங்க வகை செய்யும் `லோக்பால் சட்டம்' கொண்டு வரப்படுகிறது.

அந்த
சட்டத்துக்கான விதிகளை வரையறை செய்வதற்காக காந்தியவாதி அன்னா ஹசாரே
தலைமையில் சமூக ஆர்வலர்கள் மற்றும் மத்திய மந்திரிகள் கொண்ட கூட்டுக்குழு
அமைக்கப்பட்டுள்ளது.

ஆனால், பிரதமர் மற்றும் அரசு
ஊழியர்கள் அனைவரையும் லோக்பால் சட்ட விசாரணை வரம்புக்குள் கொண்டு வர
வேண்டும்` என சமூக ஆர்வலர்கள் குழுவினர் வலியுறுத்தி வருகின்றனர். அதை
மத்திய அரசு ஏற்கவில்லை. எனவே, அரசு கொண்டு வரும் லோக்பால் சட்ட மசோதாவில்
கடுமையான விதிகள் இல்லை என அன்னா ஹசாரே குழுவினர் குற்றஞ்சாட்டியுள்ளனர்.

மேலும்,
வலுவான லோக்பால் சட்டத்தை அமல்படுத்தக் கோரி ஆகஸ்டு 16-ந் தேதி முதல்
காலவரையற்ற உண்ணாவிரத போராட்டத்தை மீண்டும் தொடங்குவதாக அன்னா ஹசாரே
அறிவித்தார். ஏற்கனவே, டெல்லியில் யோகா குரு ராம்தேவ் நடத்திய போராட்டத்தை
நள்ளிரவில் தடியடி நடத்தி கலைத்தது போலவே அன்னா ஹசாரே போராட்டத்தையும்
அடக்கப்போவதாக மத்திய அரசும், காங்கிரஸ் கட்சியை சேர்ந்த திக்விஜய் சிங்
உள்ளிட்ட சில தலைவர்களும் கூறி வருகின்றனர்.

இந்த
நிலையில், மத்திய அரசுக்கு எதிராக சுப்ரீம் கோர்ட்டில் வழக்கு
தொடரப்போவதாக அன்னா ஹசாரே நேற்று அறிவித்தார். டெல்லியில் பேட்டியளித்த
அவர், இது பற்றி கூறியதாவது:-

அன்னா ஹசாரே
நடத்தும் போராட்டத்தை, ராம்தேவ் போராட்டத்தை நசுக்கியது போலவே நாங்கள்
அடக்குவோம் என மத்திய அரசு கூறி வருகிறது. இந்தியாவில் ஜனநாயகம் உள்ளது?
சர்வாதிகாரம் கிடையாது? எனவே, நாங்கள் ஏன் சுப்ரீம் கோர்ட்டில் வழக்கு
தொடரக்கூடாது? சுப்ரீம் கோர்ட்டு தலைமை நீதிபதியை நாளை (இன்று) நான்
சந்திக்கிறேன்.

அப்போது, காங்கிரஸ் கட்சியை
சேர்ந்த சில தலைவர்கள் வெளியிடும் மிரட்டல் குறித்து தெரிவிப்பேன். ஜனநாயக
வழியில் எதிர்ப்பை தெரிவிக்க ஒவ்வொரு குடிமகனுக்கும் அரசியலமைப்பு சட்டம்
உரிமை வழங்கியுள்ளது. எனவே, திட்டமிட்டபடி ஆகஸ்டு 16-ந் தேதி முதல்
எங்களுடைய போராட்டத்தை நாங்கள் தொடங்குவோம். இவ்வாறு அன்னா ஹசாரே
தெரிவித்தார்.