தனியார் பள்ளிகள் கூடுதல் கட்டணம் வசூலிக்க கூடாது : சுப்ரீம் கோர்ட் உத்தரவு

புதுடில்லி : தனியார் பள்ளிகள் கல்வி கட்டணம் நிர்ணயம் தொடர்பாக,
சென்னை ஐகோர்ட் டிவிஷன் பெஞ்ச் பிறப்பித்த உத்தரவில் தலையிட சுப்ரீம்
கோர்ட் மறுத்து விட்டது. இந்த கல்வியாண்டில் ஜூனில் வசூலிக்கப்பட்ட
கட்டணத்தை விட, கூடுதல் கட்டணம் வசூலிக்கவும் கூடாது என்றும் தனியார்
பள்ளிகளுக்கு உத்தரவிட்டுள்ளது.
தனியார் பள்ளிகளில் கல்வி கட்டணத்தை நிர்ணயம் செய்ய, ஓய்வு பெற்ற
நீதிபதி கோவிந்தராஜன் தலைமையில் கமிட்டியை தமிழக அரசு நியமித்தது.
கேள்விப் பட்டியலை இக்குழு தயாரித்து, 10 ஆயிரத்து 934 பள்ளிகளுக்கு
அனுப்பியது. இதில், 10 ஆயிரத்து 233 பள்ளிகள், படிவத்தை நிரப்பி அனுப்பின.
அதன்பின், ஒவ்வொரு பள்ளிக்கும் கல்விக் கட்டணம் நிர்ணயம் செய்து,
தனித்தனியாக உத்தரவு பிறப்பிக்கப்பட்டது. இதற்கான உத்தரவு, கடந்த மே மாதம்
பிறப்பிக்கப்பட்டது. கல்வி கட்டணம் நிர்ணயம் செய்ததில் அதிருப்தியடைந்த
6,400 பள்ளிகள், ஆட்சேபனை தெரிவித்து கமிட்டியிடம் மேல்முறையீடு செய்தன.
"தங்களுக்கு நிர்ணயம் செய்த கட்டணம் மிகக்குறைவானது, அதை மாற்றியமைக்க
வேண்டும்' என, கோரின. இதையடுத்து, பள்ளிகளை நேரில் ஆய்வு செய்து கட்டணத்தை
நிர்ணயிக்க கால அவகாசமாகும் என்பதால், இந்த கல்வியாண்டில் ஏற்கனவே கமிட்டி
நிர்ணயித்த கட்டணத்தை வசூலிக்க வேண்டும் என, நீதிபதி கமிட்டி அறிவிப்பு
வெளியிட்டது. இதை எதிர்த்து பள்ளிகளின் சங்கங்கள் சார்பில் ஐகோர்ட்டில்
மனுக்கள் தாக்கல் செய்யப்பட்டன. இந்த மனுக்களை தலைமை நீதிபதி இக்பால்,
நீதிபதி சிவஞானம் அடங்கிய டிவிஷன் பெஞ்ச் விசாரித்தது.
பின்னர் நீதிபதிகள் பிறப்பித்த உத்தரவு விவரம் வருமாறு:
கட்டணத்தை எதிர்த்து ஆட்சேபனை தெரிவித்துள்ள 6,400 பள்ளிகளும் கல்வியாண்டு
துவக்கத்தில் (ஜூன்) வசூலித்த கட்டணத்துக்கும் மேலாக வசூலிக்க
உரிமையில்லை. அதாவது, 2009-10ம் ஆண்டுக்கு நிர்ணயிக்கப்பட்ட
கட்டணத்துக்கும் மேலாக வசூலிக்க உரிமையில்லை. வசூலிக்கப்பட்ட கட்டணமானது,
கமிட்டி நிர்ணயித்த கட்டணத்துக்கும் அதிகமாக இருந்தால், அந்த கூடுதல்
கட்டணத்தை அந்த பள்ளிகள் டிபாசிடாக கருதி வைத்திருக்க வேண்டும். கமிட்டி
எடுக்கும் இறுதி முடிவுக்கு அது கட்டுப்பட்டது. ஐகோர்ட் இடைக்கால
உத்தரவுக்குப் பின், 6,400 பள்ளிகளில் கூடுதலாக கட்டணம்
வசூலித்திருந்தால், அதையும் டிபாசிடாக வைத்திருந்து, கமிட்டி எடுக்கும்
இறுதி முடிவுக்கு கட்டுப்பட வேண்டும். கமிட்டி பிறப்பித்த உத்தரவை ஏற்றுக்
கொண்ட 4,534 பள்ளிகள், கமிட்டி அனுமதித்ததை விட கூடுதலாக கட்டணம் வசூலிக்க
உரிமையில்லை. மேலே குறிப்பிட்டதற்கும் அதிகமாக கட்டணத்தை, பெற்றோரிடம்
எந்த கல்வி நிறுவனமும் கேட்க கூடாது. குறிப்பிட்ட பள்ளிக்கு எதிராக
அதிகாரிகளுக்கு புகார் வந்தால், அந்தப் பள்ளிக்கு நோட்டீஸ் அனுப்பிய பின்,
சட்டப்படி பரிசீலிக்க வேண்டும். இவ்வாறு ஐகோர்ட் டிவிஷன் பெஞ்ச்
உத்தரவிட்டது.
இந்த உத்தரவை எதிர்த்து தமிழ்நாடு தனியார் பள்ளிகள் சம்மேளனம்
சார்பில், சுப்ரீம் கோர்ட்டில் மனு தாக்கல் செய்யப்பட்டது. அந்த மனுவில்
கூறப்பட்டதாவது: கட்டண நிர்ணயத்தை எதிர்த்து 6, 400 பள்ளிகளும்
ஆட்சேபனைகள் தெரிவித்துள்ளன. இவற்றை 30 நாட்களுக்குள் கமிட்டியானது
பரிசீலிக்க வேண்டும். சம்பந்தப்பட்ட சட்ட விதிகளைப் பரிசீலிக்காமல்
ஐகோர்ட் சில உத்தரவுகளைப் பிறப்பித்துள்ளது. எனவே, ஐகோர்ட்டின் உத்தரவை
ரத்து செய்ய வேண்டும். அதன் செயல்பாட்டிற்கு இடைக்கால தடை விதிக்க
வேண்டும். இவ்வாறு மனுவில் தெரிவிக்கப்பட்டிருந்தது.
இந்த மனுவை விசாரித்த நீதிபதிகள் சதாசிவம் மற்றும் சவுகான் ஆகியோர்
அடங்கிய சுப்ரீம் கோர்ட் பெஞ்ச் பிறப்பித்த உத்தரவு: தனியார் பள்ளிகள்
கட்டணம் நிர்ணயம் தொடர்பாக, சென்னை ஐகோர்ட்டின் டிவிஷன் பெஞ்ச் அக்டோபர்
5ம் தேதி பிறப்பித்த உத்தரவில் குறுக்கிட எந்த முகாந்திரமும் இல்லை.
அதனால், இந்த கல்வியாண்டின் துவக்கத்தில் அதாவது ஜூனில், வசூலிக்கப்பட்ட
கட்டணத்தை விட கூடுதல் கட்டணத்தை தனியார் பள்ளிகள் வசூலிக்க முடியாது.
கட்டண நிர்ணயத்தை எதிர்த்து பள்ளிகள் தாக்கல் செய்துள்ள அப்பீல் மனுக்களை,
கமிட்டியானது விரைவாக விசாரித்து தங்களது உத்தரவை பிறப்பிக்க வேண்டும்.
மேலும், இந்த வழக்கு தொடர்பாக தாக்கல் செய்யப்பட்டுள்ள முக்கியமான ரிட்
மனுவை, விரைவாக விசாரித்து 2011 ஏப்ரல் 30ம் தேதிக்குள் சென்னை
ஐகோர்ட்டின் டிவிஷன் பெஞ்ச் தீர்ப்பு வழங்க வேண்டும். கட்டண நிர்ணயம்
தொடர்பாக நிபுணர் குழு ஒன்று ஆய்வு செய்து வருகிறது. அதனால், இது தொடர்பான
அனைத்து விவகாரங்களிலும் நாங்கள் தலையிட முடியாது. கட்டண நிர்ணய கமிட்டி
முன், மனுத்தாரர்கள் தங்களின் குறைகளை தெரிவிக்க வேண்டும். அதை கமிட்டி
பரிசீலித்து உரிய உத்தரவுகளைப் பிறப்பிக்கும். இவ்வாறு நீதிபதிகள்
உத்தரவில் குறிப்பிட்டனர்.