பெங்களூரு கோர்ட்டில் ஜெ., ஆஜராக வேண்டும்: சுப்ரீம் கோர்ட் உத்தரவு

புதுடில்லி: சொத்து குவிப்பு வழக்கு தொடர்பாக, பெங்களூரு தனி கோர்ட்டில்
நடக்கும் விசாரணையில் முதல்வர் ஜெயலலிதா நாளை (20ம்தேதி) ஆஜராக வேண்டும்
என சுப்ரீம் கோர்ட் உத்தரவிட்டுள்ளது.

தமிழக முதல்வர் ஜெ., மீதான சொத்துக்குவிப்பு வழக்கு பெங்களூரு தனி
கோர்ட்டில் நடந்து வருகிறது. இந்நிலையில், வரும் 20ம் தேதி ஜெ., நேரில்
ஆஜராக வேண்டும் என சுப்ரீம் கோர்ட் உத்தரவிட்டிருந்தது. இதையடுத்து
முதல்வரின் பாதுகாப்பைக் கருத்தில் கொண்டு பெங்களூரு ஓசூர் சாலையில் உள்ள
பரப்பன அக்ரஹாரத்தில் உள்ள சிறை வளாகத்தில் தற்காலிகமாக தனி கோர்ட்
அமைக்கப்பட்டுள்ளது. இந்நிலையில், முதல்வர் ஜெ., சார்பில் சுப்ரீம்
கோர்ட்டில் புதிய மனு ஒன்று தாக்கல் செய்யப்பட்டது. அதில் பரப்பன அக்ரஹார
கோர்ட்டில் போதுமான பாதுகாப்பு ஏற்பாடுகளை உறுதி செய்யும் வரையில்,
ஆஜராவதிலிருந்து விலக்களிக்க வேண்டும் என்று கோரப்பட்டிருந்தது. இம்மனுவை
விசாரித்த சுப்ரீம் கோர்ட், புதன்கிழமைக்குள் முதல்வருக்கான பாதுகாப்பு
ஏற்பாடுகள் குறித்த விவரங்களை கர்நாடக அரசு தெரிவிக்க வேண்டும் என
உத்தரவிட்டது.

இன்று மீண்டும் வழக்கு விசாரணைக்கு வந்த போது, கர்நாடக அரசு சார்பில்
ஜெ., பாதுகாப்பு குறித்த அறிக்கை தாக்கல் செய்யப்பட்டது. அதில், முதல்வர்
ஜெ., இசட் பிளஸ் பிரிவில் இருப்பதால், விமான நிலையம் முதல் கோர்ட் வரை
சிறப்பு பாதுகாப்பு ஏற்பாடு செய்யப்பட்டுள்ளதாக தெரிவிக்கப்பட்டது. இதற்கு
பதிலளித்த ஜெ., தரப்பு வக்கீல், முதல்வரின் பயணத்திட்டம் 96 மணி
நேரத்திற்கு முன்பாக செய்யப்பட வேண்டும். தற்போது போதுமான கால அவகாசம்
இல்லாததால், ஆஜராவதிலிருந்து விலக்களிக்க வேண்டும் என கேட்டுக்கொண்டார்.

இந்நிலையில், இவ்வழக்கில் தீர்ப்பளித்த சுப்ரீம் கோர்ட் நீதிபதிகள்,
ஜெ., தரப்பு கோரிக்கையை நிராகரித்ததுடன், நாளை விசாரணைக்கு ஆஜராக
உத்தரவிட்டனர்.