ஸ்பெக்ட்ரம் விவகாரமா? தேர்தல் அறிக்கையா? சட்டசபை தேர்தலை கலக்கப்போவது எது?

by **அருள்** Mon Nov 29, 2010 8:02 am

ஒவ்வொரு தேர்தலின் போதும், ஏதாவது ஒரு அலை வீசும். அது, ஆளுங்கட்சிக்கு ஆதரவாகவோ அல்லது எதிர்க்கட்சிகளுக்கு ஆதரவாகவோ அமையும். ஆளுங்கட்சிக்கு எதிராக அலை வீசும் சூழலை, எதிர்க்கட்சிகள் "கண்கொத்தி பாம்பாக' பார்த்துக் கொண்டிருக்கும். வலுவாக ஏதாவது விஷயம் சிக்கிவிட்டால், அதை ஊதி, ஊதி ஆளுங்கட்சிக்கு எதிராக பெரிய அலையை ஏற்படுத்த எதிர்க்கட்சிகள் முயற்சிக்கும்.அந்த வகையில், நெருங்கிக்கொண்டிருக்கும் தமிழக சட்டசபை தேர்தலில், நிறைவேற்றியுள்ள பல்வேறு திட்டங்களை மக்களிடம் எடுத்துக்கூறி, ஓட்டு கேட்பதற்கு ஆளும் தி.மு.க., திட்டமிட்டிருந்த நிலையில், திடீரென வெடிகுண்டுபோல் வெடித்துள்ள, "ஸ்பெக்ட்ரம்' விவகாரம், அ.தி.மு.க., வுக்கு, "அல்வா' போல் சிக்கியுள்ளது.

தமிழக அரசியலில் மட்டுமில்லாமல், தேசிய அரசியல் வரை மிகப்பெரிய அதிர்வலையை, "ஸ்பெக்ட்ரம்' விவகாரம் ஏற்படுத்தி விட்டது. ஒரு லட்சத்து 76 ஆயிரம் கோடி சம்பந்தப்பட்ட இந்த சம்பவத்தில், மத்திய அரசின் தலையில் சுப்ரீம் கோர்ட் குட்டு வைத்துள்ளது, தி.மு.க., மற்றும் காங்கிரஸ் கட்சிகளை பீதியில் ஆழ்த்தியுள்ளது. மத்திய அரசுக்கு எந்தவித ஆபத்தும் இல்லை என்றாலும், இந்த விவகாரம் தமிழக சட்டசபை தேர்தலில் தி.மு.க., கூட்டணியை கவிழ்த்துவிடுமோ என்ற அச்சம், அந்த முகாமில் இருப்பர்களுக்கு ஏற்பட்டுள்ளது.அதே நேரத்தில், தேர்தல் பிரசாரத்தின்போது, "ஸ்பெக்ட்ரம்' விவகாரத்தை வைத்து, தி.மு.க., அணிக்கு அதிர்ச்சி வைத்தியம் கொடுப்பதற்கு எதிர்க்கட்சிகள் திட்டமிட்டுள்ளன. எதிர்க்கட்சிகளின் ஸ்பெக்ட்ரம் பிரசாரத்திற்கு, சுப்ரீம் கோர்ட் பிரதமருக்கு வைத்த குட்டு, சி.பி.ஐ.,யில் அளிக்கப்பட்டுள்ள ஆதாரங்கள் கை கொடுக்கும். தேர்தல் வருவதற்கு இன்னும் ஐந்து மாதங்கள் இடைவெளி உள்ள நிலையிலேயே, எதிர்க்கட்சிகள் ஸ்பெக்ட்ரம் விவகாரத்தை மக்களிடம் விரிவாக எடுத்துக் கூறி வருகின்றன. தேர்தல் நேரத்தில் இது உச்சக்கட்டத்தை அடையும் என்று எதிர்பார்க்கலாம்.

ஸ்பெக்ட்ரம் விவகாரம் காரணமாக, தமிழரின் பெருமைக்கு நாடு தழுவிய அளவில் களங்கம் ஏற்பட்டுவிட்டது என்று தற்போதே எதிர்க்கட்சிகள் பேசத்துவங்கிவிட்டன. இந்திய கம்யூனிஸ்ட் மாநில செயலர் தா.பாண்டியன் ஒரு பேட்டியில்,"நாட்டின் முதல் பட்ஜெட்டை வெளியிட்ட சண்முகம் செட்டியார் ஒரு தமிழன்; பசுமை புரட்சியை ஏற்படுத்திய சி.சுப்ரமணியம் ஒரு தமிழன்; இளைஞர்களை தன் பக்கம் திரும்பி பார்க்க வைத்த முன்னாள் ஜனாதிபதி அப்துல் கலாம் ஒரு தமிழன். தமிழனுக்கு இதுபோன்ற இன்னும் பல பெருமைகள் உள்ள நிலையில், நாட்டில் இதுவரை நடந்த ஊழலில் அதிகபட்ச தொகையாக ஸ்பெக்ட்ரம் ஊழலை குறிப்பிட்டு, இதற்கு சொந்தக்காரரும் ஒரு தமிழன் தான் என்ற கரும்புள்ளியை ஆளும் கட்சி ஏற்படுத்திவிட்டது' என்றார்.இதனால், முன் எப்போதும் இல்லாத அளவிற்கு, ஒரு இக்கட்டான சூழ்நிலையை இந்த தேர்தலில் தி.மு.க., எதிர்கொள்ள உள்ளது. எதிர்க்கட்சிகள், இம்முறை ஸ்பெக்ட்ரம் விவகாரத்தை பெரிதுபடுத்தும் என்பது, மூத்த அரசியல்வாதியான முதல்வர் கருணாநிதிக்கு தெரியாத ஒன்றல்ல. எனவே, எதிர்க்கட்சிகளின் தேர்தல் வியூகத்தை எதிர்கொள்ள தி.மு.க.,வும் தயாராகி வருகிறது.இதை மெய்ப்பிக்கும் வகையில், சமீபத்தில் துணை முதல்வர் ஒரு கருத்தை வெளியிட்டார்.

"கடந்த தேர்தலைப் போல், வரும் தேர்தலிலும் தேர்தல் அறிக்கை தான் தி.மு.க.,விற்கு கதாநாயகனாக விளங்கும்' என அவர் பேசியிருப்பது, எதிர்த் தாக்குதலுக்கு தி.மு.க., தயாராகிவிட்டது என்பதையே இது காட்டுகிறது. ஊழலைத் தாண்டி மக்களை ஓட்டுப் போட வைக்கும் அளவுக்கு தி.மு.க.,வின் தேர்தல் அறிக்கை இருக்கும் என்று எதிர்பார்க்கப்படுகிறது. பார்லிமென்ட் தேர்தலின் போது, இலங்கைப் பிரச்னை விஸ்வரூபம் எடுத்தது. இது ஆளும் கட்சிக்கு பெரும் பின்னடைவை ஏற்படுத்தும் என்று பேசப்பட்டது. ஆனால், தேர்தல் முடிவுகள் வேறு மாதிரியாக அமைந்துவிட்டன. அதுபோலவே, இம்முறையும் எதிர்க்கட்சிகளின் ஸ்பெக்ட்ரம் பிரசாரம் பிசுபிசுத்துவிடும் என்று ஆளுங்கட்சி பிரமுகர்கள் உறுதியாக கூறுகின்றனர். கருத்து பலவேறாக இருப்பினும், தேர்தலில், ஹீரோவாகப்போவது தேர்தல் அறிக்கையா; ஸ்பெக்ட்ரம் விவகாரமா என்பது மே மாத மத்தியில் தெரிந்துவிடும்.

"ஸ்பெக்ட்ரம் சீரியஸ்' : பார்லி தேர்தலில், இலங்கைப் பிரச்னை குறித்து அரசியல்வாதிகள் மட்டுமே பேசிக் கொண்டிருந்தனர். சாதாரண மக்களிடம் இந்த விஷயம் முக்கியத்துவம் பெறவில்லை. ஆனால், ஸ்பெக்ட்ரம் விவகாரம் அப்படி இல்லை. ஒரு லட்சத்து 76 ஆயிரம் கோடி ரூபாய் நாட்டிற்கு நஷ்டம் என்று வெளியாகியுள்ள ஆதாரமான தகவல், மக்களை அதிர்ச்சியடைய வைத்துள்ளது. எனவே, இலங்கை தமிழர்கள் பிரச்னை போல், ஸ்பெக்ட்ரம் பிரச்னையை அவ்வளவு சுலபமாக ஆளும்கட்சியினரால் மூடி மறைக்க முடியாது. அதுமட்டுமல்ல, அதிகரித்துள்ள விலைவாசி, மாவட்டங்களில் உள்ள மின்வெட்டு, பஸ் கட்டண உயர்வு, அமைச்சர்களின் வாரிசுகள் போட்டி போன்றவை மக்களிடையே பெரும் அதிருப்தியை ஏற்படுத்தியுள்ளது. எனவே, இம்முறை எதிர்க்கட்சிகளின் தேர்தல் பிரசாரத்தை, முன்னைப் போல் ஆளும் கட்சி அவ்வளவு எளிதாக சமாளிக்க முடியாது.