புலிகள் அமைப்பால் நாட்டின் பாதுகாப்புக்கு அபாயம்

புதுடில்லி : "விடுதலைப் புலிகள் அமைப்பிற்கு எதிரான
தடையை மேலும் இரண்டு ஆண்டுகளுக்கு நீட்டித்து மத்திய அரசு எடுத்த முடிவு
சரியானதே. அந்த அமைப்பால், நாட்டின் பாதுகாப்புக்கு தொடர்ந்து
அச்சுறுத்தல் உள்ளது' என, டில்லி ஐகோர்ட் நீதிபதி விக்கிரமஜித் சென்
தலைமையிலான சிறப்பு டிரிபியூனல் தெரிவித்துள்ளது.
முன்னாள் பிரதமர் ராஜிவ், ஸ்ரீபெரும்புதூரில் படுகொலை
செய்யப்பட்டதை அடுத்து, 1992ம் ஆண்டில், இந்தியாவில் விடுதலைப் புலிகள்
அமைப்பிற்கு தடை விதிக்கப்பட்டது. அதன்பின் இரண்டு ஆண்டுகளுக்கு ஒரு முறை
தடை நீட்டிக்கப்படுகிறது. கடந்த மே மாதமும், இரண்டு ஆண்டுகளுக்கு தடை
நீட்டிக்கப்பட்டது. விடுதலைப் புலிகள் அமைப்பில் மிச்சம் மீதி உள்ளவர்கள்,
தமிழகத்தில் மீண்டும் ஒன்று சேர்ந்து செயல்பட திட்டமிடுகின்றனர் என,
உளவுத் துறை தகவல் தெரிவித்ததை அடுத்து, தடை நீட்டிக்கப்பட்டது.
இதையொட்டி, மத்திய உள்துறை அமைச்சகம் வெளியிட்ட அறிக்கை விவரம்:
இலங்கையில் விடுதலைப் புலிகள் அமைப்பு முற்றிலும் ஒழிக்கப்பட்டு விட்டது.
இருந்தாலும், அந்த அமைப்பில் மிச்சம் மீதி உள்ள புலிகளும், தலைவர்களும்
தமிழகத்தில் மீண்டும் ஒன்று சேர்ந்து கொண்டிருக்கின்றனர் என, மத்திய
அரசுக்கு தகவல் கிடைத்துள்ளது. அப்படி ஒன்றுசேருவோர் இந்தியாவை, குறிப்பாக
தமிழகத்தை தங்களின் தளமாக பயன்படுத்த வாய்ப்பு உள்ளது. அதை மறுக்க
முடியாது. எனவே, புலிகள் அமைப்பிற்கான தடை, மேலும் இரண்டு ஆண்டுகளுக்கு
நீட்டிக்கப்படுகிறது. இவ்வாறு அறிக்கையில் தெரிவிக்கப்பட்டது.
இதையடுத்து, புலிகள் அமைப்பிற்கான தடையை நீட்டித்த மத்திய அரசின்
முடிவு சரியானதா என்பதை அறிய, டில்லி ஐகோர்ட் நீதிபதி விக்ரமஜித் சென்
தலைமையில் சிறப்பு தீர்ப்பாயம்(டிரிபியூனல்) அமைக்கப்பட்டது. அந்தத்
தீர்ப்பாயம் கூறியுள்ளதாவது: புலிகள் அமைப்பிற்கான தடையை மேலும் இரண்டு
ஆண்டுகளுக்கு நீட்டித்த மத்திய அரசின் முடிவு சரியானதே. அந்த அமைப்பால்
நாட்டின் பாதுகாப்புக்கு தொடர்ந்து அச்சுறுத்தல் உள்ளது. புலிகள்
அமைப்பில் மிச்சம், மீதி உள்ளவர்கள் ஒன்று சேர்ந்து, இந்திய மண்ணில்
சட்டவிரோத நடவடிக்கைகளில் ஈடுபடலாம். அதனால், சட்ட விரோத நடவடிக்கைகள்
தடைச் சட்டத்தின் கீழ், புலிகள் அமைப்பை சட்ட விரோத அமைப்பாக அறிவிக்க
போதுமான ஆதாரங்கள் இருக்கின்றன. புலிகளுக்கு ஆதரவானவர்களும், புலிகள்
அமைப்பில் மிச்சம், மீதி இருப்பவர்களும் உள்ளூர் கடத்தல்காரர்கள்
உதவியுடன் நாட்டில் சட்டவிரோத நடவடிக்கைகளில் ஈடுபட்டுக்
கொண்டிருக்கின்றனர் என்பதற்கு போதுமான ஆதாரங்கள் உள்ளன.
இந்தியாவின் இறையாண்மைக்கும், ஒற்றுமைக்கும், பாதுகாப்புக்கும் புலிகள்
அமைப்பு தொடர்ந்து அச்சுறுத்தலாக உள்ளதால், அந்த அமைப்பிற்கு மேலும்
இரண்டு ஆண்டுகளுக்கு தடை விதித்து, கடந்த மே மாதம் 14ம் தேதி மத்திய அரசு
பிறப்பித்த உத்தரவு சரியானதே. புலிகளுக்கு ஆதரவாக செயல்படுவோர், பொது
இடங்களில் பேசுவதன் மூலமும், இன்டர்நெட் மூலமும் தமிழர்கள் மத்தியில்
இந்தியாவுக்கு விரோதமான கருத்துக்களை பரப்புகின்றனர். இதை மத்திய அரசு
ஆதாரங்களுடன் நிரூபித்துள்ளது. கடலோர பகுதிகள் மூலமாக புலிகள் அமைப்பினர்
சட்ட விரோதமாக ஊடுருவுகின்றனர். நிதி ஆதாரத்தைப் பெருக்க, போதைப்
பொருட்களை கடத்துகின்றனர். புலிகள் அமைப்பைச் சேர்ந்தவர்களுக்கு இன்னும்
எரிபொருள் மற்றும் வெடிமருந்து போன்றவை இந்திய மண்ணில் இருந்து சப்ளை
செய்யப்படுகின்றன. இவையெல்லாம் இந்தியாவில் புலிகள் அமைப்பினர் தீவிரமாக
செயல்படுகின்றனர் என்பதற்கான ஆதாரங்கள். இவ்வாறு நீதிபதி தெரிவித்துள்ளார்.
சிதம்பரத்திற்கு புலிகள் கடிதம்: ""நாங்கள் மறுபடியும் ஒன்று
சேர முயற்சிக்கவில்லை. இந்தியாவில் சட்ட விரோத நடவடிக்கைகளிலும்
ஈடுபடவில்லை' என, மத்திய உள்துறை அமைச்சர் சிதம்பரத்திற்கு, புலிகள்
அமைப்பினர் கடிதம் எழுதியுள்ளனர். அமைச்சர் சிதம்பரத்திற்கு, விடுதலைப்
புலிகள் அமைப்பிடம் இருந்து கடந்த 5ம் தேதி கடிதம் ஒன்று வந்துள்ளது.
இந்தக் கடிதத்தின் நகல்கள் வெளியுறவு அமைச்சர் எஸ்.எம்.கிருஷ்ணா, தமிழக
முதல்வர் கருணாநிதிக்கும் அனுப்பப்பட்டுள்ளன. அதில் கூறப்பட்டுள்ளதாவது:
இந்தியாவில் செயல்படும் நக்சலைட்களுக்கும், புலிகள் அமைப்பிற்கும்
தொடர்பிருப்பதாக இந்திய அதிகாரிகள் தெரிவித்துள்ளனர். அது முற்றிலும்
பொய்யான தகவல். நாங்கள் ஒன்று சேரும் முயற்சியிலும் ஈடுபடவில்லை.
இந்தியாவின் எந்தப் பகுதியிலும் சட்ட விரோத நடவடிக்கைகளில் ஈடுபடவில்லை.
அதேபோல், அன்னிய நாட்டு ஆயுதப் படையினருக்கும், எங்களுக்கும் எந்தத்
தொடர்பும் இல்லை. இந்தியாவிலும், மற்ற நாடுகளிலும் புலிகள் அமைப்பைச்
சேர்ந்தவர்களாலும், அவர்களின் ஆதரவாளர்களாலும் தங்கள் தரப்பு கருத்தைத்
தெரிவிக்க முடியவில்லை. எங்கள் தரப்பு நியாயத்தை தெரிவிக்க வாய்ப்பு வழங்க
வேண்டும். எங்கள் மீதான குற்றச்சாட்டுகளுக்கு கோர்ட்டில் பதில் அளிக்க
தயாராக உள்ளோம். இவ்வாறு கடிதத்தில் தெரிவிக்கப்பட்டுள்ளது. கடிதத்தில்
புலிகள் அமைப்பின் தலைமையக ஒருங்கிணைப்பாளர் ஆர்.எம்.சுபன்
கையெழுத்திட்டுள்ளார்.