கைத்தொழிலில் ஈடுபடும் கைதிகள்: கோடிக்கணக்கான வருவாய் ஈட்டி சாதனை

திருச்சி : திருச்சி மத்திய சிறைக்கு குற்றவாளியாக வருபவர்கள், தண்டனை
காலம் முடிந்து வெளியேறும் போது, நல்ல தொழிலாளியாக செல்லும் பணியை,
சிறைத்துறை நிர்வாகம் செயல்படுத்தி வருகிறது.
திருச்சி மத்திய சிறையில், ஆயுள்தண்டனை கைதி, தண்டனைக் கைதி, விசாரணைக்
கைதி, குண்டர் சட்டத்தில் கைதானவர் உட்பட மொத்தம் 1,900 பேர், கைதிகளாக
உள்ளனர்.சிறைக்கு வரும் கைதிகளின் மனவோட்டத்தை தொழில்சார்ந்த விஷயங்களில்
செலுத்துவதால், அவர்களிடம் குற்ற எண்ணங்கள் மறைந்து விடும் என்ற கருத்தின்
அடிப்படையில், திருச்சி மத்திய சிறையில் உள்ள கைதிகள், பல்வேறு
கைத்தொழில்களில் ஈடுபடுத்தப்படுகின்றனர்.
சோப், கம்பளி உல்லன்
தயாரிப்பது, சீருடை தைத்துக் கொடுப்பது, பைண்டிங் மற்றும் பைல் செய்யும்
தொழில் போன்றவைகளை செய்து வருகின்றனர்.சோப்பு தயாரிக்கும் தொழில்,
தமிழகத்திலேயே திருச்சி சிறையில் மட்டும் தான் நடக்கிறது. இங்கு
தயாரிக்கப்படும் சோப்பு தமிழகத்தில் உள்ள சிறை, அரசு மருத்துவமனை, அரசு
இல்லம், தீயணைப்புத்துறை ஆகியவைகளுக்கு சப்ளை செய்யப்படுகிறது.திருச்சி
மத்திய சிறையில் சோப்பு தயாரிக்கும் தொழிலில் 15க்கும் மேற்பட்ட கைதிகள்
ஈடுபட்டுள்ளனர். அவர்கள் 2009-10ம் ஆண்டில் மட்டும், இரண்டு லட்சத்து 79
ஆயிரத்து 552 சோப்பு பார் தயாரித்து (ஒரு பார் என்பது 8 சோப்பு), ஒரு
கோடியே 18 லட்சத்து 80 ஆயிரத்து 960 ரூபாய் வருவாய் ஈட்டியுள்ளனர். இது
கடந்த ஆண்டை விட, 82 லட்சத்து 64 ஆயிரத்து 374 ரூபாய் அதிகம் என்பது
குறிப்பிடத்தக்கது.
அதேபோல் 20க்கும் மேற்பட்ட கைதிகள், 2009-10ம் ஆண்டில் 11 ஆயிரத்து 514
உல்லன் கம்பளிகள் தயாரித்து, 26 லட்சத்து 32 ஆயிரத்து 854 ரூபாய் வருவாய்
ஈட்டியுள்ளனர்; ஒரு லட்சத்து 25 ஆயிரம் பைல் தயாரித்து 14 லட்சத்து 35
ஆயிரத்து 700 ரூபாய் வருவாய் ஈட்டப்பட்டுள்ளது. கடந்த ஆண்டு முதல்,
கைதிகளால் தயாரிக்கப்படும் காயத்திற்கு கட்டு கட்டும் துணி மூலம், மூன்று
லட்சத்து 61 ஆயிரத்து 100 ரூபாய் வருவாய் கிடைத்துள்ளது. இப்படி சிறையில்
கைத்தொழில் மூலம் கைதிகள், கோடிக்கணக்கான ரூபாய் வருவாய்
ஈட்டியுள்ளனர்.கைத்தொழிலில் ஈடுபட்டுள்ள கைதிகளுக்கு சிறைத்துறை
நிர்வாகத்தால், மாதந்தோறும் சம்பளம் வழங்கப்படுகிறது. அதை அவர்கள், தங்கள்
குடும்பங்களுக்கு அனுப்பி வருகின்றனர்.
திருச்சி மத்திய சிறை கண்காணிப்பாளர் முருகேசன் கூறியதாவது:பல்வேறு
தொழில்களை இவர்கள் மத்தியில் புகுத்துவதன் மூலம், அவர்கள் தங்களின்
தவறுகளை மறந்து, புதிய வாழ்க்கைப் பாதையை அமைத்துக் கொள்ள வாய்ப்பு
கிடைக்கிறது. இங்கு இருப்பவர்களில் குறிப்பிட்டவர்கள் தான்,
கைத்தொழில்களில் ஈடுபடுகின்றனர். மீதியுள்ளவர்கள் மத்தியிலும்
கைத்தொழிலில் ஈடுபடும் ஆர்வத்தை வளர்க்க முயற்சி மேற்கொள்ளப்படுகிறது.
சிறையில் இருப்போரின் வசதிக்காக அரசும், பல்வேறு திட்டங்களை செயல்படுத்தி
வருகிறது.திருச்சி சிறையில் ப்ரவுன் சீட் தயாரிக்கும் யூனிட் அமைப்பது
குறித்து, கரூர் காகித ஆலையுடன் பேச்சு நடத்தப்பட்டுள்ளது. அவர்களும்
ஆலையின் சார்பிலேயே, ப்ரவுன் சீட் தயாரிக்கும் யூனிட் அமைத்துத்தர ஒப்புக்
கொண்டுள்ளனர்.திருச்சி சிறைக்கு குற்றவாளியாக வருபவர், வெளியே செல்லும்
போது, நல்ல, நேர்மையான தொழிலாளியாக செல்வது நிச்சயம். இவ்வாறு முருகேசன்
கூறினார்.