அரசு மருத்துவமனை "கைவிரிப்பு' : நடுரோட்டில் பெண்ணுக்கு "குவா, குவா'

by **ஜனனி** Fri Oct 01, 2010 7:32 am

அன்னூர் : பிரசவத்துக்கு வந்த கர்ப்பிணியை "டாக்டர் இல்லை' எனக் கூறி,
அன்னூர் அரசு மருத்துவமனை ஊழியர்கள் கோவைக்கு செல்லுமாறு கூறினர்.ஆனால்,
கோவை செல்ல இயலாத அந்தப்பெண், மருத்துவமனை முன், ரோட்டில் குழந்தை
பெற்றார்.
அச்சம்பாளையம் காலனியை சேர்ந்தவர் வீரன் (26); கூலித் தொழிலாளி. இவரது
மனைவி லட்சுமி (23). திருமணமாகி நான்கு ஆண்டுகளாகி விட்டது. இரண்டு வயதில்
பெண் குழந்தை உள்ளது. லட்சுமி மீண்டும் கர்ப்பம் தரித்தார். அன்னூர் அரசு
மருத்துவமனையில் மருத்துவ ஆலோசனை பெற்று வந்தார். நிறைமாத கர்ப்பிணியான
அவருக்கு நேற்று முன்தினம் இரவு 10.00 மணிக்கு பிரசவ வலி வந்தது.
அங்கிருந்த சரக்கு ஆட்டோவில் மூன்று பெண்களுடன் அன்னூர் அரசு
மருத்துவமனைக்கு சென்றார். அங்கு அவரை பரிசோதித்த நர்ஸ், "மருத்துவமனையில்
டாக்டர் இல்லை. குழந்தை எடை குறைவாக இருக்கிறது. இன்னும் 10
நிமிடத்திற்குள் கோவை அரசு மருத்துவமனைக்கு கொண்டு செல்லுங்கள்' என்று
கூறியுள்ளார். "இங்கேயே பிரசவம் பார்க்கிறோம்' என்று உறவினர்கள்
கூறியதற்கு "இங்கு எடை குறைவான குழந்தையை வைத்து பராமரிக்கும்
"இன்குபேட்டர்' வசதி இல்லை' என்று கூறி அனுப்பியுள்ளார்.
மருத்துவமனைக்கு வெளியே வந்த பெண்கள் "108' ஆம்புலன்ஸ்சுக்காக ரோட்டில்
காத்திருந்தனர். அதற்குள் லட்சுமிக்கு வலி அதிகமாகி ரோட்டோரத்தில்
படுத்தார். உடன் வந்த பெண்கள் அங்கேயே பிரசவம் பார்த்தனர். அழகான பெண்
குழந்தை பிறந்தது. இத்தகவலை கூறியவுடன் மருத்துவமனை ஊழியர்கள் லட்சுமியை
மருத்துவமனைக்கு வரும்படி அழைத்தனர். குழந்தையுடன் லட்சுமியை அட்மிட்
செய்து, மருத்துவ சிகிச்சை அளித்தனர். லட்சுமியின் உறவினர்கள் கூறுகையில்,
"வலி வந்தவுடன் 108க்கு போன் செய்தோம். 45 நிமிடமாகியும் வரவில்லை.
அன்னூர் அரசு மருத்துவமனையில் இரவு நேரத்தில் டாக்டர் இருப்பதில்லை. "நவீன
வசதிகள் இல்லை. நள்ளிரவில் கோவை செல்லும்படி கூறுகின்றனர். அன்னூர்
மருத்துவமனையிலேயே நவீன வசதிகள் செய்ய வேண்டும்' என்றனர்.