மனநலம் பாதித்த, ஆதரவற்ற மூதாட்டிக்கு கண் பார்வை தந்தது அரசு மருத்துவமனை

by **மாலதி** Fri Sep 27, 2013 7:49 am

சென்னை: ஆதரவற்ற, மனநலம் பாதித்த மூதாட்டிக்கு, சென்னை, ராயப்பேட்டை அரசு மருத்துவமனை டாக்டர்கள் அறுவைச் சிகிச்சை செய்து, கண்ணொளி கொடுத்துள்ளனர்.
நெல்லையைச் சேர்ந்தவர் செலின், 63. மனநலம் பாதிக்கப்பட்ட மூதாட்டியான அவர், சென்னை, அயனாவரம் மனநல காப்பகத்தில், 15 ஆண்டுக்கு மேலாக, சிகிச்சை பெற்று வருகிறார். ஆதரவற்ற இவர், கடந்த, எட்டு மாதமாக, இரண்டு கண்களிலும் பார்வை பறிபோனதால், பரிதவித்து வந்தார். சென்னை, ராயப்பேட்டை அரசு மருத்துவமனையில், மூதாட்டி சிகிச்சைக்கு அனுமதிக்கப்பட்டார். பரிசோதனையில், வயது முதிர்வு காரணமாக, இரண்டு கண்களிலும் புரை வளர்ந்து, பார்வை பாதிக்கப்பட்டது தெரிந்தது. சிகிச்சைக்கு ஒத்துழைக்க முடியாத நிலையில் உள்ள மூதாட்டிக்கு, கண் சிகிச்சை பிரிவு பேராசிரியர் மணி, உதவி பேராசிரியர்கள் அருணா, சரவணன் குழுவினர், நேற்று முன்தினம், வலது கண்ணில் புரை நீக்கு அறுவைச் சிகிச்சை செய்தனர். சிகிச்சை வெற்றிகரமாக முடிந்து, அவருக்கு பார்வை கிடைத்துள்ளது.

மருத்துவமனை கண்காணிப்பாளர் குணசேகரன் கூறியதாவது: அறுவைச் சிகிச்சை விண்ணப்பத்தில் கையெழுத்திடக் கூட ஆளில்லை. மனநலம் பாதித்த மூதாட்டியால், எதற்கும் ஒத்துழைக்க முடியாத சிக்கலான சூழலில், டாக்டர்கள் குழு திறம்பட சிகிச்சை அளித்துள்ளது. சென்னை, ராயப்பேட்டை அரசு பொது மருத்துவமனையில், எல்லா நிலைகளிலும் தரமான சிகிச்சை அளிக்கப்பட்டு வருகிறது. இவ்வாறு, அவர் கூறினார்.

போராசிரியர் மணி கூறியதாவது:

மனநலம் பாதித்தோருக்கு இவ்வாறு சிகிச்சை அளிப்பது சிரமம். மூதாட்டிக்கு சர்க்கரை நோய் இருந்தது. அதன் அளவைக் குறைத்து, படிப்படியாக பரிசோத னைகள் செய்து தயார்படுத்தவே, ஒரு மாதமாகி விட்டது. அதன்பின், ஒரு கண்ணில் அறுவைச் சிகிச் சை செய்ததன் மூலம், பார்வை கிடைத்துள்ளது; இது முற்றிலும் இலவசம். சில மாதங்களுக்குப்பின், அடுத்த கண் ணில் புரை நீக்கு அறுவைச் சிகிச்சை செய்வோம். மனநலம் பாதித்த, ஆதரவற்ற ஒருவருக்கு, கண்ணில் அறுவைச் சிகிச்சை செய்தது, இந்த மருத்துவமனையில் இதுவே முதல் முறை. இவ்வாறு, அவர் கூறினார். சென்னை, ராயப்பேட்டை அரசு மருத்துவமனையில், புறநோயாளிகளாக, 4,000 பேரும், உள்நோயாளிகளாக, 550 பேரும் சிகிச்சை பெற்று வருவது குறிப்பிடத்தக்கது.