ஏழைகளுக்கு பன்றிக் காய்ச்சல் தடுப்பூசி இலவசம்: கருணாநிதி

சென்னை : "பன்றிக் காய்ச்சலுக்கான தடுப்பூசி, அனைத்து மாவட்ட
தலைநகரங்களிலும் போடப்படும். வறுமைக் கோட்டுக்கு கீழே இருப்பவர்களுக்கு,
தடுப்பூசி இலவசம்' என, தமிழக முதல்வர் கருணாநிதி அறிவித்துள்ளார்.
அவரது அறிக்கை: சிலருக்கு நம்மைப் பற்றி குறை சொல்லிக் கொண்டே
இருக்க வேண்டும். இல்லாவிட்டால், அவர்களால் தூங்க முடியாது. டாக்டர்கள்
எதற்கு மருந்து கண்டுபிடிக்கிறார்களோ, இல்லையோ, இந்த நோய்க்கு முதலில்
மருந்து கண்டுபிடிக்க வேண்டும். "அரசு மருத்துவமனைகளிலே அந்த மருந்து
இல்லை; டாக்டர்கள் இல்லை; அந்தத் துறையே சரியில்லை' என்றெல்லாம் புலம்பிக்
கொண்டிருக்கின்றனர். மகாபாரதத்தில் வரும் காந்தாரி, குழவிக் கல்லை எடுத்து
வயிற்றிலே குத்திக் கொண்டதைப் போல சிலர், "தமிழகத்தில் சுகாதாரத் துறையே
சரியில்லை' என அறிக்கை விடுத்துள்ளனர்.
அ.தி.மு.க., ஆட்சியில் 2005-06ல் ஆரம்ப சுகாதார நிலையங்களில் நிகழ்ந்த
மகப்பேறுகளின் எண்ணிக்கை 81 ஆயிரத்து 190 மட்டும் தான். தி.மு.க.,
ஆட்சியில் ஆரம்ப சுகாதார நிலையங்களின் தரம் உயர்த்தப்பட்டதால், 2009-10ம்
ஆண்டில் அங்கு நிகழ்ந்த பிரசவங்களின் எண்ணிக்கை 2 லட்சத்து 98 ஆயிரத்து
253. அரசு காப்பீட்டுத் திட்டத்தின் மூலம் 650 தனியார் மருத்துவமனைகளின்
சேவை, பொதுமக்களுக்கு இலவசமாக கிடைத்துள்ளது. அதற்கு சான்று, 14
மாதங்களில் நிகழ்ந்துள்ள ஒரு லட்சத்து 93 ஆயிரம் அறுவை சிகிச்சைகள் மூலம்
பிணி நீங்கிய பயனாளிகள் தான். இந்த திட்டத்தில் 1.33 கோடி
குடும்பங்களுக்கு அடையாள அட்டை கொடுக்கப்பட்டுள்ளது. இந்த அட்டையால் 4.50
கோடிபொது மக்கள் இத்திட்டத்தில் பயனடைவர். ஒரு சில அறிக்கை ஜீவிகள் 3,000
கோடி ரூபாய், தனியார் காப்பீட்டு நிறுவனத்துக்கு வழங்கப்பட்டதாக
கூறியிருப்பதில் துளியும் உண்மை இல்லை. 796 கோடி ரூபாய் மட்டுமே
வழங்கப்பட்டுள்ளது.
இந்தியாவிலேயே எங்கும் இல்லாத வகையில், தமிழகத்தில் மட்டும் தான்
பன்றிக் காய்ச்சலுக்கு குறைந்த விலையில் தடுப்பூசி போடும் திட்டம், சென்னை
கிண்டி கிங்ஸ் நிலையத்தில் துவங்கப்பட்டு உள்ளது. மாவட்டத் தலைநகரங்களிலே
உள்ள அரசு பொது மருத்துவமனைகளில் இந்தத் தடுப்பு ஊசி போடவும், வறுமைக்
கோட்டுக்கு கீழே உள்ளவர்களிடம் இந்த குறைந்த தொகையையும் கூட இனி வசூலிக் க
தேவையில்லை எனவும் இந்த அரசு முடிவெடுத்து, உடனடியாக நடைமுறைப்படுத்த
ஆணையிட்டுள்ளது. தமிழகத்தில், மக்கள் நலனில் எவ்வித அக்கறையும்
இல்லாதவர்கள், அரசு செயல்படுத்தி வரும் திட்டங்களை குறை கூறி,வருவது
மக்களுக்கு உண்மையான விளக்கங்களை அளிக்கப் பயன்படுவதால், அவர்களின்
தூற்றுதல்களையும் வரவேற்போம். இவ்வாறு கருணாநிதி தெரிவித்துள்ளார்.