போபால் நிவாரணம் குறித்த பரிந்துரைகளை அரசு ஏற்றது

by **மாலதி** Fri Jun 25, 2010 6:49 am

புதுடில்லி : போபால் விஷவாயு சம்பவம் தொடர்பாக நியமிக்கப்பட்ட
அமைச்சர்கள் குழுவின் பரிந்துரைகளை மத்திய அமைச்சரவை ஏற்றுக் கொண்டது.
பாதிக்கப்பட்டவர்களுக்கு நிவாரணம் வழங்க 1,500 கோடி ரூபாய் வழங்கவும்
சம்மதம் தெரிவித்தது. யூனியன் கார்பைடு சேர்மன் வாரன் ஆன்டர்சனை கொண்டு
வந்து விசாரிக்கவும் நடவடிக்கை எடுக்கப்படும்.
போபால் விஷவாயு சம்பவம் தொடர்பான விஷயங்கள் குறித்து ஆய்வு செய்ய
ஏற்கனவே நியமிக்கப்பட்டிருந்த அமைச்சர்கள் குழுவை கலைத்து விட்டு, மத்திய
உள்துறை அமைச்சர் சிதம்பரம் தலைமையில் புதிய குழுவை, பிரதமர் மன்மோகன்சிங்
சமீபத்தில் நியமித்தார். இந்தக் குழுவின் கூட்டம் தீவிர ஆய்வுகளை
நடத்தியது. இதில் எடுக்கப்பட்ட முடிவுகள், அறிக்கையாக தயாரிக்கப்பட்டு
பிரதமர் மன்மோகன்சிங்கிடம் வழங்கப்பட்டன. போபால் விஷவாயு கசிவால்
இறந்தவர்கள் குடும்பத்திற்கும், பாதிக்கப்பட்டவர்களுக்கும் நிவாரணம் வழங்க
1,500 கோடி ரூபாய் சலுகை திட்டத்தை மத்திய அரசு நிறைவேற்ற வேண்டும் என்பது
உட்பட பல பரிந்துரைகள் அந்த அறிக்கையில் இடம் பெற்றிருந்தன.
இந்நிலையில், மத்திய அமைச்சரவை கூட்டம் பிரதமர் மன்மோகன்சிங் தலைமையில்
நேற்று நடந்தது. இந்தக் கூட்டத்தில் சிதம்பரம் தலைமையிலான அமைச்சர்கள்
குழு அளித்த பரிந்துரைகள் ஏற்றுக் கொள்ளப்பட்டன.
இதுதொடர்பாக நிருபர்களுக்கு பேட்டி அளித்த மத்திய தகவல் ஒலிபரப்புத் துறை அமைச்சர் அம்பிகா சோனி கூறியதாவது:போபால்
விஷவாயு சம்பவம் தொடர்பாக நியமிக்கப்பட்ட அமைச்சர்கள் குழுவின்
பரிந்துரைகளை மத்திய அரசு ஏற்றுக் கொண்டுள்ளது. இதன்மூலம் விஷவாயுவால்
பாதிக்கப்பட்டவர்களுக்கு நிவாரணம் வழங்க 1,500 கோடி ரூபாய்
ஒதுக்கப்படும்.இதில், விஷவாயு பாதித்து இறந்தவர்களின் குடும்பங்களுக்கு
தலா 10 லட்சம் ரூபாயும், நிரந்தரமாக ஊனம் அடைந்தவர்களுக்கு ஐந்து லட்சம்
ரூபாயும், புற்றுநோய் மற்றும் சிறுநீரக பாதிப்பு ஏற்பட்டவர்களுக்கு இரண்டு
லட்சம் ரூபாயும் வழங்கப்படும்.விஷவாயு பாதிப்புக்கு காரணமான ஆலையை சுத்தம்
செய்ய 300 கோடி ரூபாய் தரப்படும். இது குறித்து ஏற்கனவே ஜபல்பூர்
ஐகோர்ட்டில் உள்ள வழக்கு முடியவும், அதையத்து சுத்தம் செய்வதை "டோ'
கெமிக்கல்ஸ் என்ற நிறுவனமா அல்லது எவரெடி நிறுவனமா என்று முடிவு
செய்யப்படும்.யூனியன் கார்பைடு நிறுவனத்தின் முன்னாள் தலைவர் வாரன்
ஆன்டர்சனை பிடித்துக் கொண்டுவருவதற்கான நடவடிக்கைகள் மேற்கொள்ளப்படும்.
போபால் விஷவாயு சம்பவம் தொடர்பாக சுப்ரீம் கோர்ட்டில் மறு சீராய்வு மனு
தாக்கல் செய்யப்படும். இவ்வாறு அம்பிகா சோனி கூறினார்.
இதற்கிடையில், உணவு தொடர்பாக அமைச்சர்கள் குழுவின் கூட்டம், மத்திய
நிதி அமைச்சர் பிரணாப் முகர்ஜி தலைமையில் இன்று நடக்கும் என்றும், அப்போது
வெள்ளை சர்க்கரைக்கு இறக்குமதி வரி விதிப்பது குறித்து முடிவு
செய்யப்படும் என, மத்திய அரசு வட்டாரங்கள் தெரிவித்துள்ளன.