அர்ஜுன் சிங் வாய் திறப்பாரா? ம.பி., முதல்வர் கேள்வி: போபால் விவகாரம் வலுக்கிறது

புதுடில்லி :"வாரன் ஆன்டர்சன், இந்தியாவில் இருந்து எப்படி தப்பினார்
என்பது குறித்து அர்ஜுன் சிங் விளக்கம் அளிக்க வேண்டும். விஷவாயு கசிவால்
பாதிக்கப்பட்ட மக்களுக்கு நீதி கிடைப்பதற்கு, மாநில அரசு பெரிய அளவிலான
நடவடிக்கைகளை மேற்கொள்ள தயாராக உள்ளது' என, ம.பி., முதல்வர் சிவராஜ் சிங்
சவுகான் கூறினார்.
போபால் விஷவாயு கசிவு வழக்கில் வழங்கப்பட்ட தீர்ப்பு குறித்து ம.பி.,
முதல்வர் சிவராஜ் சிங் சவுகான், செய்தியாளர்களிடம் கூறியதாவது:யூனியன்
கார்பைடு நிறுவனத்தின் தலைவர் வாரன் ஆன்டர்சன், விஷவாயு கசிவு விபத்து
ஏற்பட்டதுமே, அமெரிக்காவுக்கு தப்பிச் சென்று விட்டார். இன்னும் அவரை கைது
செய்ய முடியவில்லை. ஆன்டர்சன் தப்பிச் செல்வதற்கு வசதியாக, மாநில அரசுக்கு
சொந்தமான விமானத்தை அவருக்கு அளிக்க அனுமதித்ததாக அப்போதைய ம.பி.,
முதல்வர் அர்ஜுன் சிங் மீது புகார் கூறப்பட்டுள்ளது.உண்மையில் இந்த
விஷயத்தில் என்ன நடந்தது என்பதை அர்ஜுன் சிங் விளக்க வேண்டும். ஆன்டர்சன்,
அமெரிக்காவுக்கு தப்பிச் சென்றது எப்படி என்பது குறித்து அவர் பதில்
அளிக்க வேண்டும். இதற்கான பொறுப்பு அவருக்கு உள்ளது. இது தொடர்பாக அர்ஜுன்
சிங்கிற்கு கடிதம் எழுதியுள்ளேன்.விஷவாயு கசிவால் பாதிக்கப்பட்ட
மக்களுக்கு நீதி கிடைப்பதற்காக, எத்தகைய நடவடிக்கைகளையும் மேற்கொள்ள மாநில
அரசு தயாராக உள்ளது.
ஆன்டர்சன் தப்பிச் சென்றது தொடர்பான விஷயத்தில் காங்கிரஸ் தலைவர்கள்
சிலர், மாறுபட்ட கருத்துக்களை கூறி வருகின்றனர். யார் என்ன கூறினாலும்,
அதை நான் பொருட்படுத்தப் போவது இல்லை. இந்த விஷயத்தை அரசியலாக்க
விரும்பவில்லை. இது குழப்பத்தை ஏற்படுத்த வழி வகுக்கும்.இந்த வழக்கில்
அடுத்த கட்டமாக என்ன நடவடிக்கை எடுப்பது என்பது குறித்து ஆய்வு
செய்வதற்காக, ஐந்து பேர் கொண்ட கமிட்டியை மாநில அரசு அமைத்துள்ளது. இந்த
கமிட்டி தெரிவிக்கும் கருத்துக்களின் அடிப்படையில் அடுத்த கட்ட நடவடிக்கை
எடுக்கப்படும்.இவ்வாறு சிவராஜ் சிங் சவுகான் கூறினார்.
இந்திய கம்யூனிஸ்ட் கட்சியின் பொதுச் செயலர் பரதன் கூறுகையில், "போபால்
விஷவாயு கசிவு வழக்கின் முக்கிய குற்றவாளியான வாரன் ஆன்டர்சனை கைது
செய்து, இந்தியாவுக்கு கொண்டு வருவதற்கான நடவடிக்கையை, மத்திய அரசு
உடனடியாக எடுக்க வேண்டும்' என்றார்.இதற்கிடையே, வாரன் ஆன்டர்சனை கைது
செய்வதற்கான உத்தரவை போபால் கோர்ட் கடந்தாண்டு பிறப்பித்ததாகவும், இதற்கு
சி.பி.ஐ., தரப்பில் எந்த ஒரு எழுத்துப்பூர்வமான பதிலும் தாக்கல்
செய்யப்படவில்லை என்றும் தகவல்கள் வெளியாகியுள்ளன.
அடுத்தடுத்த புகார்: போபால் விஷவாயு கசிவு விஷயத்தில் இந்திய
மக்களை மிகவும் மோசமாக அமெரிக்கா நடத்தியிருக்கிறது என்ற பேச்சு இப்போது
அதிகரித்திருக்கிறது. நஷ்டஈடாக அமெரிக்க கம்பெனி தரமுன்வந்த தொகை,
தலைக்கு சில ஆயிரங்கள் மட்டுமே, தவிரவும் இக்கம்பெனியான யூனியன் கார்பைடை
வாங்கிய, "டோவ் கெமிக்கல்ஸ்' இங்கிருந்த விஷவாயு பாதித்த பகுதிகளைக் கூட
சுத்தம் செய்ய மறுத்தது. அது மட்டும் அல்ல, அக்கம்பெனியின் தலைமை வக்கீலாக
காங்கிரஸ் தகவல் தொடர்பாள் அபிஷேக் சிங்வி பணியாற்றி வருகிறார். அவரோ,
"டோவ் கெமிக்கல்ஸ்' நஷ்ட ஈடு தர முன்வராததது பற்றி கருத்து தெரிவிக்க
முன்வரவில்லை.அர்ஜுன் சிங் முதல்வராக இருந்த போது, யார் உத்தரவின் பேரில்
ஆன்டர்சனை ராஜமரியாதையுடன் அனுப்பி வைத்தார் என்பது பற்றி விஷயம்
வெளிவரும் போது, மேலும் பல உண்மைகள் தெரியும். ம.பி., முன்னாள் முதல்வர்
திக்விஜய் சிங் வெளிப்படையாக, "அர்ஜுன் சிங், மற்றும் அன்றைய ம.பி.,
தலைமைச் செயலர் பிரம்ம சுவரூப் ஆகியோருக்குதான் நடந்தது தெரியும்'
என்றிருக்கிறார்.