வியத்நாமுக்கு பிரம்மோஸ் ஏவுகணைகளை விற்பனை செய்கிறது இந்தியா

வியத்நாமுக்கு பிரம்மோஸ் ஏவுகணைகளை விற்பனை செய்கிறது இந்தியா

வியத்நாமுக்கு பிரம்மோஸ் ரக ஏவுகணைகளை விற்பனை செய்வது
குறித்து அந்நாட்டுக்கும், இந்தியாவுக்கும் இடையே ஞாயிற்றுக்கிழமை
(ஜூன் 5), திங்கள்கிழமை (ஜூன் 6) ஆகிய இரு தினங்கள் முக்கியப்
பேச்சுவார்த்தை நடைபெறவுள்ளது.

இதுகுறித்து இந்திய பாதுகாப்புப் படை வட்டாரத் தகவல்கள்
கூறியதாவது:

இந்தியா-ரஷியா ஆகிய நாடுகளின் கூட்டுத் தயாரிப்பில் உருவான
பிரம்மோஸ் ரக ஏவுகணை ஒலியை விட 3 மடங்கு அதிக வேகமாகப்
பாய்ந்து சென்று எதிரிகளின் இலக்கைத் தாக்கி அழிக்கும் வல்லமை
கொண்டது.

இந்த ஏவுகணையை, 3ஆவது நாட்டுக்கு விற்பனை செய்வதற்கு
இந்தியாவும், ரஷியாவும் முடிவு செய்திருந்தன.

பிரம்மோஸ் ரக ஏவுகணையை இந்தியாவிடம் இருந்து வாங்குவதற்கு
வியத்நாம் விருப்பம் தெரிவித்தது. இந்நிலையில், வியத்நாமில் இந்திய
பாதுகாப்புத் துறை அமைச்சர் மனோகர் பாரிக்கர் ஞாயிற்றுக்கிழமை
முதல் இரு நாட்கள் சுற்றுப்பயணம் செய்யவுள்ளார்.

அப்போது வியத்நாம் நாட்டுத் தலைவர்களை பாரிக்கர் சந்தித்துப்
பேசவுள்ளார். இந்தச் சந்திப்பின்போது வியத்நாமுக்கு பிரம்மோஸ்
ரக ஏவுகணைகளை இந்தியா ஏற்றுமதி செய்வது குறித்து முக்கியப்
பேச்சுவார்த்தை நடைபெறவுள்ளது.

தென்சீனக் கடல் விவகாரம் தொடர்பாக வியத்நாமுக்கும் சீனாவுக்கும்
இடையே கருத்து வேறுபாடு நிலவி வருகிறது. இருப்பினும், வியத்நாமைச்
சேர்ந்த கடற்படை வீரர்களுக்கு நீர்மூழ்கிக் கப்பல்களை இயக்குவது
குறித்தும், விமானப்படை வீரர்களுக்கு சுகோய்-30 ரக விமானங்களை
இயக்குவது குறித்தும் இந்தியா பயிற்சி அளித்து வருகிறது.

அதைத் தொடர்ந்து, பிரம்மோஸ் ரக ஏவுகணைகளை வழங்குவது குறித்தும்
வியத்நாமுடன் இந்தியா பேச்சுவார்த்தை நடத்தவிருப்பது மிகவும்
முக்கியமானதாக கருதப்படுகிறது என்று இந்தியப் பாதுகாப்புப் படை
வட்டாரத் தகவல்கள் தெரிவித்தன.
-
---------------------------------------------
தினமணி